ვინ უზრუნველყოფს ქართველ მოცეკვავეებს ძვირად ღირებული სამოსით

"ცეკვავენ ვარსკვლავების" ერთ-ერთი მოცეკვავე - ლელო ჩქარეული პროექტის შემდეგ, აქტიურ ქორეოგრაფიულ საქმიანობას ჩვეულ რიტმში განაგრძობს. ლელო საკმაოდ დახვეწილი, სასიამოვნო გარეგნობით გამოირჩევა, პროფესიის წყალობით კი მუდმივად ფორმაშია და წონაზეც დიდად არ ზრუნავს.

ჩაცმის სტილი

- ზაფხულში უპირველესი "სამოსი", ნამზეურია. ვგიჟდები გარუჯვაზე. რაც შეეხება ტანისამოსს - ძირითადად, კლასიკურ სტილში ვიცვამ. მართალია, სპორტული სამოსიც მომწონს, მაგრამ საჩემო ნამდვილად არ არის. ცეკვას რადგან სხვადასხვა ასაკის ადამიანებს ვასწავლი, დღის განმავლობაში ტანსაცმლის გამოცვლა რამდენჯერმე მიწევს. ასეთ დროს მთავარია, მოხერხებულად მეცვას. ისე კი, ჩემთვის შარვალი უფრო მეტად პრაქტიკულია. თუმცა, კაბაც ბევრი მაქვს. მოკლე ქვედაბოლოები იშვიათად მაცვია. ადამიანი სასაცილოდ რომ არ გამოიყურებოდეს, ყოველთვის სიტუაციის შესაფერისად უნდა ჩაიცვას. პიჯაკებიც ძალიან მომწონს და ბევრი მაქვს - გრძელი, მოკლე, სხვადასხვა ფერის. ის შარვალსაც უხდება, ქვედაბოლოსაც და კაბასაც.

ფერები

- შავი ძალიან მომწონს. ამ ფერის სამოსი პრაქტიკულია და მოდიდანაც არასდროს გადადის. თან, მისი სხვა ფერებთან შეხამებაც იოლია. ლურჯიც მომწონს, ზაფხულში კი პასტელის ხალისიან ფერებს ვანიჭებ უპირატესობას.

შოპინგი და საკონცერტო კოსტიუმები

- პირველ რიგში, მინდა აღვნიშნო, რომ ბრენდებს დიდ ყურადღებას არ ვაქცევ. მთავარია, სამოსი ხარისხიანი იყოს და მიხდებოდეს. შოპინგი, როგორც ყველა ქალს, მეც სიამოვნებას მანიჭებს. როცა საზღვარგარეთ მივდივარ, დროც ბევრი მაქვს და მაღაზიებსაც ხშირად ვსტუმრობ. სიმართლე გითხრა, ჩაცმა-დახურვაზე გაგიჟებული ნამდვილად არ ვარ. იქ ყოფნისას, ვცდილობ, ქალაქის ღირსშესანიშნაობები დავათვალიერო, ამა თუ იმ ქვეყნის კულტურას გავეცნო, სუვენირები და საჩუქრები შევიძინო. მოგზაურობა ძალიან მიყვარს. ყველაზე მეტად, ათენი და ვენეცია დამამახსოვრდა.

რაც შეეხება საკონცერტო კოსტიუმებს: მოგეხსენებათ, სპორტულ-სამეჯლისო ცეკვები ერთ-ერთი ყველაზე ძვირად ღირებული სიამოვნებაა, რადგან სასცენო კაბის, სარეპეტიციო ქვედაბოლოს, ფეხსაცმლის, აქსესუარების შეძენა ძვირი ჯდება; ლათინურამერიკულ ცეკვას სხვანაირი კოსტიუმები სჭირდება, ევროპულს - სხვანაირი. კონკურსსა და ტურნირებზე აუცილებლად, ძვირად ღირებული სამოსი უნდა გეცვას, კაბა ტანზე კარგად მორგებული უნდა გქონდეს. ასეთი კაბები ძვირფასი ქსოვილებით იკერება და მათზე აუცილებლად, სვაროვსკის ფერადი თვლებია დამაგრებული. ქართველი მოცეკვავეები იძულებული ვართ, სამოსით თავადვე უზრუნველვყოთ საკუთარი თავი, უცხოელებს კი როგორც წესი, ვიღაცები აფინანსებენ. პირადად მე, 16 წელია, ვცეკვავ და ბევრი კოსტიუმი დამიგროვდა. სხვათა შორის, არც სცენაზე და არც ყოველდღიურ ცხოვრებაში ზედმეტად გაშიშვლება არ მომწონს. ვფიქრობ, ქალი მაშინ უფრო საინტერესოა, როცა ვულგარულად არ გამოიყურება.

ყველაზე ძვირად ღირებული კაბა

- ათენში ერთი ქუჩაა, სადაც სხვადასხვა ბრენდის მაღაზიებია ჩამწკრივებული. სწორედ ასეთ მაღაზიაში შევიძინე საღამოს კაბა, მოსაცმელით. მასში დაახლოებით ათასი ევრო გადავიხადე.

აქსესუარები

- აქსესუარების ტარება მიყვარს. სამკაულებს ძირითადად, საზღვარგარეთ ვყიდულობ, სხვათა შორის, ბაქოში მოცეკვავეებისთვის დიდი არჩევანია, შესანიშნავი ქსოვილებიც იყიდება. ადრე მზის სათვალე არ მომწონდა და არც ვიკეთებდი, ბოლო დროს კი ვიყენებ, განსაკუთრებით - ზაფხულში.

ფეხსაცმელი

- ამბობენ, რომ ქალის გარდერობში მთავარი მაინც, ფეხსაცმელი და ჩანთაა. შესაძლოა, ბევრი კარგი კაბა გქონდეს, მაგრამ მას თუ კარგი ფეხსაცმელი არ შეუხამე, კაბაც "დაიკარგება". ამიტომაცაა, რომ მასში ფული არასდროს მენანება. მოცეკვავეს (და არა მარტო მოცეკვავეს), აუცილებლად მოხერხებული ფეხსაცმელი უნდა ეცვას. მასზეა დამოკიდებული, რამდენად მაღალი ქუსლით შეუძლია იცეკვოს. ჩემი ფეხსაცმლის ქუსლი 8-სანტიმეტრიანია. ყოველდღიურ ცხოვრებაში, დატვირთული დღის რეჟიმის მიუხედავად, მაღალქუსლიანებით დავდივარ. მიმაჩნია, რომ ასეთი ფეხსაცმელი ქალის სხეულს უფრო მეტად დახვეწილსა და ლამაზს აჩენს.

მაკიაჟი და თავის მოვლა

- სარელაქსაციო მასაჟზე სიარულის დრო სამწუხაროდ, არ მაქვს. სავარჯიშოდ დილაუთენია ნამდვილად არ ვდგები, რადგან ცეკვისას ვარჯიში ისედაც მიწევს და დღის განმავლობაში ენერგიასაც ვხარჯავ. მიყვარს ცურვა. სპორტის ეს სახეობა ყველაფერზე დადებითად მოქმედებს - კანზე, ნერვულ სისტემაზე, სახსრებზე... სილამაზის სალონსაც რეგულარულად ვსტუმრობ, რადგან ხშირად მიწევს სიარული შეხვედრებზე, ივენთებზე და ყოველთვის ფორმაში უნდა ვიყო. მაკიაჟს თავად ვიკეთებ, სადად და სიტუაციის შესაბამისად.

დიეტა

- დიეტა არასოდეს დამიცავს. თუმცა, ზოგჯერ "განტვირთვის დღეს" ვიწყობ და შედარებით მსუბუქ საკვებს მივირთმევ. "გარდატეხის პერიოდში" მქონდა წონაში დაკლების მცდელობა, მაგრამ ახლა ვხვდები, მაშინ ეს სულაც არ მჭირდებოდა.

მეგობრები და გართობა

- დატვირთული დღის რეჟიმის მიუხედავად, გართობას მაინც ვახერხებ. საკმაოდ კომუნიკაბელური ვარ და ხალხთან ურთიერთობა, მუსიკის მოსმენა და ცეკვა მიყვარს. მოკლედ, მეგობრებისა და ახლობლებისთვის დრო ყოველთვის მაქვს. კლუბური ცხოვრება დიდად არ მიზიდავს. ე.წ. დახურულ ივენთებზე უფრო ხშირად დავდივარ. ხშირად, მეგობრები ერთმანეთს ვსტუმრობთ და ჯაზს, გემოვნებიან მუსიკას ვუსმენთ, საინტერესო თემებზე ვსაუბრობთ.

ფანები და საჩუქრები

- ჩემი გულშემატკივრებით არასდროს ვწუხდები. შევთანხმდეთ, რომ ყურადღება ყველას სიამოვნებს. ახლა შემთხვევით ვისარგებლებ და ყველას, ვინც ჩემ მიმართ სიმპათიით არის განწყობილი, დიდ მადლობას გადავუხდი. ზოგჯერ თაყვანისმცემლები საჩუქრებს მიგზავნიან, ამა თუ იმ ადგილას მეპატიჟებიან, მაგრამ უცხო ადამიანებისგან რაიმეს მიღება ჩემთვის მიუღებელია. ჰოდა, მათ "ლამაზი" უარით, კულტურულად ვისტუმრებ ხოლმე. ჩემს პირად ცხოვრებაში მნიშვნელოვანი არაფერი ხდება, ჩიტივით თავისუფალი ვარ (იცინის).

კარიერა

- სპორტულ-სამეჯლისო ცეკვების ფედერაცია, ბატონი თენგიზისა და ქალბატონი ლარისას ხელმძღვანელობით, ყოველწლიურად, მაისში საერთაშორისო თასის გათამაშებას აწყობს, ამიტომ მალე უცხოელი მსაჯები, მოცეკვავეები ჩამოვლენ და სამზადისიც დაგვეწყება. გარდა ამისა, ნინო ცქიტიშვილთან, სამოდელო სააგენტოში ვმუშაობ და ყოველი წლის ივნისში გამოსაშვებ საღამოს - თეატრალიზებულ პოდიუმს ვაწყობთ ხოლმე. შარშან მაგალითად, ასეთი საღამო მარინა საღარაძესთან ერთად მოვაწყვეთ. კიდევ, გოგონათა ესთეტიკური აღზრდის სტუდიაში, სადაც მე, ჯულიანა ბარგ-ნარი და ოთო ფოლადაშვილი ვმუშაობთ, ივენთისა და ჩვენების გაკეთებას ვაპირებთ. სხვათა შორის, ცოტა ხნის წინ, ლიკა ყაზბეგთან ერთად კარგი პროექტი გავაკეთეთ - "წარმატებული ქალი პოდიუმზე". გარდა ამისა, მაქვს ფოტოსესიები. ამას წინათ ბექა ელბაქიძესთან ერთად, პროფესიონალური ფოტოები გადამიღეს. ასევე, მონაწილეობა მივიღე ორ კლიპში. ამ ყველაფრის პარალელურად, მოგეხსენებათ, ცეკვაში ვავარჯიშებ მოყვარულებს. მოკლედ, ძალიან აქტიური ვარ და ბევრი გეგმაც მაქვს....

თამთა დადეშელი

ჟურნალი ”გზა”

(გამოდის ხუთშაბათობით)