თინა ხიდაშელი - უარს ვამბობთ, მოვუსმინოთ ადამიანს, რომელმაც პარლამენტის უფლებები მიიტაცა

მას შემდეგ, რაც პარლამენტს დაუბრუნდება უფლებამოსილება, მთავრობის ფორმირება ხალხის ნების შესაბამისად მოახდინოს, მზად ვიქნებით, მიხეილ სააკაშვილს მოვუსმინოთ, - ამის შესახებ უმრავლესობის ერთ-ერთმა ლიდერმა, თინათინ ხიდაშელმა დღეს განაცხადა.

მისივე თქმით, საკონსტიტუციო ცვლილებებთან დაკავშირებით, რომლის მიხედვითაც, პრეზიდენტს უფლებამოსილება ეზღუდება, გუშინ პოლიტიკური დებატები იმ მიზნით გაიმართა, რომ უმცირესობას საკუთარი არგუმენტები წარედგინა.

როგორც ხიდაშელმა აღნიშნა, გუშინ უმცირესობას შანსი ჰქონდა, ქართული სახელმწიფოსთვის მათი პოზიცია ნათელი გამხდარიყო.

"უარს ვამბობთ, მოვუსმინით ადამიანს, რომელსაც მიტაცებული აქვს პარლამენტის უფლებები. ყველაზე მთავარი ის არის, რომ მთავრობის ფორმირება ხალხის ნების შესაბამისად უნდა მოხდეს", - აღნიშნა მან.

საქართველოს პრეზიდენტი მიხეილ სააკაშვილი ხვალ პარლამენტის წინაშე ყოველწლიური მოხსენებით აღარ წარსგება. ამის შესახებ გადაწყვეტილება საპარლამენტო უმრავლესობამ მიიღო.

გასული წლის დეკემბრის ბოლოს 78 დეპუტატის ხელმოწერით ინიცირებულია საკონსტიტუციო ცვლილებები, რომელიც პრეზიდენტის უფლებამოსილებებს ეხება. კერძოდ, კონსტიტუციიდან ის მუხლები ამოდის, რომელიც პრეზიდენტს ახლად არჩეული პარლამენტის პირველი ექვსი თვის განმავლობაში და საკუთარი უფლებამოსულების ამოწურვამდე ბოლო ექვის თვის განმავლობაში დათხოვნას უკრძალავს. ეს კი იმას ნიშნავს, რომ პრეზიდენტს უფლება ეძლევა დაითხოვოს პარლამენტი და დანიშნოს რიგგარეშე არჩევნები ნებისმიერ დროს - მათ შორის პარლამენტის არჩევნების ჩატარებიდან ექვსი თვისა და პრეზიდენტის უფლებამოსილების ვადის ბოლო ექვსი თვის განმავლობაში.

ამავდროულად, ამავე საკონსტიტიციო პროექტის ფარგლებში, ქვეყნის პირველი პირის უფლებები მთავრობის დათხოვნის მიმართულებით იზღუდება. კერძოდ, მოქმედი საკონსტიტუციო ნორმით, თუ მთავრობის შემადგენლობა და სამთავრობო პროგრამა ზედიზედ სამჯერ პარლამენტის ნდობას ვერ მიიღებს, პრეზიდენტი ხუთი დღის ვადაში პრემიერ-მინისტრის ახალ კანდიდატურას წამოაყენებს ან პარლამენტის თანხმობის გარეშე პრემიერ-მინისტრს ნიშნავს, ხოლო პრემიერ-მინისტრი, ასევე ხუთი დღის ვადაში, პრეზიდენტის თანხმობით მინისტრებს დანიშნავს. ასეთ შემთხვევაში პრეზიდენტი პარლამენტს დაითხოვს და რიგგარეშე არჩევნებს დანიშნავს. წარმოდგენილი ცვლილებების პროექტის თანახმად კი, თუ მთავრობის შემადგენლობა და სამთავრობო პროგრამა პარლამენტის ნდობას ზედიზედ სამჯერ ვერ მიიღებს, პრეზიდენტი სამი დღის ვადაში პარლამენტს დაითხოვს და რიგგარეშე არჩევნებს დანიშნავს. მთავრობის უფლებამოსილება კი მისმა ძველმა შემადგენლობამ უნდა განახორციელოს.

საპარლამენტო უმრავლესობის ამ ინიციატივას უმცირესობა მხარს არ უჭერს.

"ინტერპრესნიუსი"