მსოფლიოს ათი ყველაზე ძვირადღირებული ხელოვნების ნიმუში

ბრიტანულმა გამოცემა "ტელეგრაფმა" მსოფლიოს ის ათი ყველაზე ძვირადღირებული ხელოვნების ნიმუში გამოაქვეყნა, რომლებიც თავის დროზე სხვადასხვა აუქციონებზე რეკორდულ თანხად გაიყიდა.

ათეულს ლიდერობს პოლ სეზანის 1890 წელს შესრულებული ფერწერული ტილო "ბანქოს მოთამაშეები", რომელშიც 2011 წელს ყატარის სამეფო ოჯახმა 250 მილიონი აშშ დოლარი გადაიხადა. თუმცა, მიუხედავად იმისა, რომ ტილო 2011 წელს გაიყიდა, დეტალები ცნობილი მხოლოდ 2012 წელს გახდა.

140 მილიონ აშშ დოლარად გაიყიდა "სოთბის" აუქციონზე ჯექსონ პოლოკის ტილო No. 5. გავრცელებული ინფორმაციით, 2006 წელს ის კინოკომპანია "Dreamworks"-ის თანადამფუძნებელ დევიდ გიფენისგან ვინმე დევიდ მარტინესმა შეიძინა. თუმცა, მოგვიანებით, მარტინესის ადვოკატმა ეს ინფორმაცია არ დაადასტურა.

იმავე, 2006 წელს რეკორდულ თანხად - 137,5 მლნ აშშ დოლარად გაიყიდა ჰოლანდიელი აბსტრაქციონისტის ნამუშევარი "ქალი III". 1953 წელს შექმნილი კიონინგის ეს ნამუშევარი ერთ-ერთია მისი სერიიდან "ქალი", რომელიც ექვს ფერწერულ ტილოს აერთიანებს.

კოსმეტიკური საშუალებების მაგნატმა რონალდ ლაუდერმა რეკორდი დაამყარა გუსტავ კლიმიტის ნამუშევრებში ოდესმე გადახდილი თანხის მხრივ. 2006 წელს მაგნატმა 135 მილიონი აშშ დოლარი გადაიხადა კლიმტის "ადელ ბლოხ-ბაუერი I"-ის სანაცვლოდ. თუმცა, მასში გადახდილი თანხა მხოლოდ საქმეში მონაწილე ექსპერტების ნავარაუდევია, რადგან "სოთბის" აუქციონმა ლაუდერს საქმის დეტალების გახმაურება აუკრძალა.

2012 წელს, ნიუ-იორკში ანონიმმა მყიდველმა 120 მილიონ აშშ დოლარად შეიძინა ედვარდ მუნკის ცნობილი ტილო "ყვირილი".

"სოთბის" აუქციონზე 104,1 მილიონ აშშ დოლარად გაიყიდა პაბლო პიკასოს ფერწერული ტილო "ბიჭი ჩიბუხით".

1990 წელს რეკორდულ თანხად - 82,5 მილიონ აშშ დოლარად გაიყიდა ვინსენტ ვან გოგის "ექიმი გაშეს პორტრეტი". სიცოცხლის უკანასკნელ თვეებში ექიმი გაშე ვან გოგის მკურნალი ექიმი იყო.

რენესანსის ეპოქის გენიალური ხელოვანის ტიციანის შედევრი "დიანა და აქტეონი" 50 მილიონ ფუნტ სტერლინგად გაიყიდა.

1990 წელს "სოთბის" აუქციონზე 87,1 მილიონ აშშ დოლარად გაიყიდა პიერ-ოგიუსტ რენუარის "ცეკვა მულენ დე ლა გალეტში". ის იაპონელმა მეწარმემ შეიძინა, თუმცა მისი გარდაცვალების შემდეგ უცნობია რენუარის შედევრის ბედი. სავარაუდოდ, ტილო შვედ კოლექციონერთან ინახება.

ყველაზე ძვიღადღირებული ხელოვნების ნიმუშების ათეულში ჰოლანდიელი ფერმწერის ვინსენტ ვან გოგის კიდევ ერთი შედევრი მოხვდა. 1989 წელს ნიუ იორკის თანამედროვე ხელოვნების მუზეუმმა კერძო კოლექციონერისგან 58 მილიონ აშშ დოლარად შეიძინა ვან გოგის "ჯოზეფ როულინის პორტრეტი". ჰოლანდიელმა ფერმწერმა ძვირადღირებული ტილო 1889 წელს შექმნა და ის ერთ-ერთია იმ ექვსიდან, რომელიც ვან გოგმა თავის მეგობარ როულინს მიუძღვნა. ის არლში ფოსტალიონად მუშაობდა.

მომზადებულია telegraph-ის მიხედვით.

იხილეთ ფოტოგალერეა