ბიძინა ივანიშვილი - "ორი გვარი მივეცი კანცელარიას და ვერც ერთი ვერ მოაწყვეს"

ჩემი ინიციატივით, ორი გვარი მივეცი კანცელარიას და ვერც ერთი ვერ მოაწყვეს, - ამის შესახებ საქართველოს პრემიერ-მინსიტრმა, ბიძინა ივანიშვილმა "ინტერპრესნიუსის" კითხვაზე პასუხისას განაცხადა, რომელიც საჯარო სამსახურებში ახალი თანამშრომლების მიღების წესს ეხებოდა.

ივანიშვილმა აღნიშნა, რომ არ აქვს ამის შესახებ ზუსტი ინფორმაცია, თუმცა ამას დააზუსტებს.

"საკადრო ცვლილებები ხდება და ეს ნორმალური პროცესია. მეც მაინტერესებს, რა მეთოდებით ხდება ადამიანების შერჩევა. ჩემი ინიციატივით, ორი გვარი მივეცი კანცელარიას და ვერც ერთი ვერ მოაწყვეს. როგორც ვიცი, ძალიან ბევრი წვალობს და აწყობენ. არ ვიცი, ნაცნობობით ხდება ალბათ ძირითადად და განცხადებებით", - განაცხადა ივანიშვილმა.

მისი თქმით, მას ძალიან უყვარს ტენდერების და კონკურსის სისტემა და არაერთხელ უთქვამს მინისტრებისთვის, რომ საჯარო ტენდერები და კონკურსები ჩაატარონ.

"ირაკლი ღარიბაშვილი ასე აღმოვაჩინე რამდენიმე წლის წინ, როდესაც სპეციალისტი მჭირდებოდა "ქართუში" და ძალიან კმაყოფილი ვარ. არა მარტო ქართველებს, ფრანგებსაც უყვართ ნაცნობობით დანიშვნები, ამას თავისი პლიუსიც აქვს, როდესაც იცნობ ადამიანს და იცი, რომ პროფესიონალია. თუმცა, თუ თქვენ მინიშნებას მიკეთებთ, რომ ეს პროცესები ჯანსაღად არ მიდის, დავინტერესდები, როგორ მიმდინარებს", - დასძინა ივანიშვილმა.

იხილეთ ვიდეო

"ინტერპრესნიუსი"