მიხეილ მაჭავარიანმა არ იცის, ფრაზა ”ჟვანია მოკლეს” მისი, თუ ჟურნალისტის შეცდომაა
"უზუსტობაა გაპარული. ჟურნალისტს სენსაცია არ გამოუვიდა", - ასეთ განმარტებას აკეთებს საპარლამენტო უმცირესობის წევრი მიხეილ მაჭავარიანი გაზეთ ”ვერსიისთვის” მიცემულ ინტერვიუსთან დაკავშირებით, სათაურით: ”მიხეილ მაჭავარიანი პროკურატურაში დაკითხეს”.
მაჭავარიანი ინტერვიუში ამბობს: "მე, ხათუნა გოგორიშვილმა და მაია ნადირაძემ ზურა იმ დღეს ვნახეთ, როცა მოკლეს, შუადღისას, აუზზე წასვლამდე." ფრაზა სტატიის ქვესათაურადაა გამოყენებული.
მიხეილ მაჭავარიანის თქმით, მის ინტერვიუში აბსოლუტურად სხვა რამ წერია, რაც ზემოთ აღნიშნული ფრაზისგან განსხვავებულია და შესაძლოა, ჟურნალისტმა ნათქვამი "არასწორად გაიგო". ამასთან, მაჭავარიანის თქმით, ინტერვიუს დიქტოფონზე იწერდნენ.
"ეს ერთი ფრაზა გაუგებარია. არ ვიცი, ეს ჩემი თუ ჟურნალისტის შეცდომაა. შესაძლოა, ლაპარაკის დროს ესე გამოჩნდა, არ ვიცი. მაგრამ ყოველ შემთხვევაში, რაც გამოძიების ოფიციალური ვერსია იყო, ამ ვერსიაზე დასამატებელი არაფერია. ზურა არის გარდაცვლილი და დამატებით მე ვერაფერს გეტყვით. მე იგი ვნახე გარდაცვალების დღეს. ინტერვიუს ჟურნალისტი იწერდა და არ ვიცი, რა მოხდა. უზუსტობაა გაპარული. სენსაცია არ გამოუვიდა", - აცხადებს მაჭავარიანი.
გაზეთ ”ვერსიის” სტატია ”მიხეილ მაჭავარიანი პროკურატურაში დაკითხეს” პორტალ ”ამბები.გე”-ზე 1 თებერვალს გამოქვეყნდა.
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
