გიორგი თარგამაძე - გამარჯვებულ ალიანსში პროდასავლური ძალები სუსტდება

გამარჯვებულ პოლიტიკურ ალიანსში ორი მკაფიოდ გამოკვეთილი პროდასავლური ძალის დასუსტება მიმდინარეობს, - ამის შესეხაბ დღეს ჟურნალისტებთან შეხვედრაზე "ქრისტიან-დემოკრატიული მოძრაობის" ლიდერმა გიორგი თარგამაძემ განაცხადა.

მისი თქმით, საქართველოში პროდასავლური პარტიების კრიზისი ნამდვილად შეინიშნება და ეს პროცესი შეიძლება კიდევ უფრო გაღრმავდეს.

"გამარჯვებულ პოლიტიკურ ალიანსში არის ორი მკაფიოდ გამოკვეთილი პროდასავლური ძალა, რომელთა ლიდერებისა და თავად ამ პარტიების მიზანმიმართული დასუსტება მიმდინარეობს, კვალდაკვალ თავად პარტია "ქართული ოცნების" გაძლიერებისა და მის სათავეში ქვეყნის პრემიერ-მინისტრის ჩადგომისა. ის, რომ ბიძინა ივანიშვილი ერთი რომელიმე კონკრეტული პარტიის ხელმძღვანელი იქნება, კოალიციის შიგნით თანაბარ კონკურენციას გამორიცხავს. ეს ავტომატურად ნიშნავს იმას, რომ ამ გამოკვეთილად პროდასავლური პარტიების მომავალი სერიოზული კითხვის ნიშნის ქვეშ დადგება, მათ შორის კოალიციის შიგნითაც", - აღნიშნა გიორგი თარგამაძემ.

მისივე თქმით, საქართველოში, პოლიტიკურ პარტიებში ნელ-ნელა მძლავრობს რუსეთის მიმართ რბილად რომ ითქვას, ლოიალური დამოკიდებულებები.

როგორც თარგამაძემ აღნიშნა, თბილისის აეროპორტში რიგი დგას იმ პოლიტიკური მოღვაწეებისა თუ ლიდერების, რომლებიც საქართველოში ჩამოდიან, ან ბრუნდებიან იმ განაცხადით, რომ საქართველოში პრორუსულ პარტიებს დააარსებენ.

"ასე რომ, ჩვენ მიგვაჩნია, დღეს უკვე დუმილის დრო აღარ არის, დღეს არის აქტიური მოქმედების დრო, მით უმეტეს პროდასავლურ ფლანგზე", - აღნიშნა გიორგი თარგამაძემ.

ამასთან, მისივე შეფასებით "ნაციონალურმა მოძრაობამ" მთელი ამ წლების განმავლობაში მოახდინა დასავლური ღირებულებების დისკრედიტაცია.

"ინტერპრესნიუსი"