1
ივნისიდღის ზოგადი ასტროლოგიური პროგნოზი
"ფსიქოს" სტუმარია პაროდისტი მერაბ გეგეჭკორი, რომელსაც ხელისუფლების შეცვლამ და პოლიტიკაში ახალი სახეების გამოჩენამ უამრავი საქმე გაუჩინა...
- 2012 წელი ახალი ტიპაჟის ძიებისა და, ასე ვთქვათ, მათი პაროდიის "დამხეცების" წელი გახლდათ. რამდენიმე მათგანი "იუმორინას" ბოლო კონცერტებზე გავაშარჟეთ, მომდევნო კონცერტებისთვისაც ახალ სახეებს "ვამხეცებთ". აქვე გეტყვით, რომ კარგი მასალა გვაქვს როგორც ხელისუფლების, ასევე ოპოზიციის შესახებ. ასეა, ხელისუფლების შეცვლამ საქმე გაგვიჩინა.
- ყველაზე უკეთესი გასაშარჟებელი მაინც რომელი ახალი პოლიტიკოსია?
- პრემიერი, ბატონი ბიძინა ივანიშვილი, ასევე - კახი კალაძე, ირაკლი ღარიბაშვილი. ისე, ირაკლი ღარიბაშვილს რაღა გაშარჟება უნდა - მისი გინების ფონოგრამა უკვე პაროდიაა. მართალია, ახლოს არ ვიცნობ, მაგრამ მგონია, რომ გინება და მისთანები არ უყვარს.
საინტერესო იქნება განათლების მინისტრ გიორგი მარგველაშვილის პაროდიაც - მას საუბრის თავისებური მანერა აქვს. ოპოზიციიდან ჩიორა თაქთაქიშვილი გავაშარჟეთ, აგრეთვე, გოგა ხაჩიძის ბლანჟე და ველოსიპედი.
- პროფესიით ვინ ბრძანდებით?
- თეატრალური ინსტიტუტის თოჯინების სამსახიობო ფაკულტეტი დავამთავრე. ჩემი საქმეა თოჯინების გახმოვანება, ტექსტის შესაბამისად მათი ამოძრავება... მოკლედ, ჩემი პროფესიით ვმუშაობ - თოჯინებს არა, მაგრამ ადამიანებს ვაცოცხლებ სცენაზე.
- ეს რომ არა, ვინ იქნებოდით პროფესიით?
- ცხოვრებას ახლა რომ ვიწყებდე, აუცილებლად ვისწავლიდი ცეკვას და ყველაფერს გავაკეთებდი, რომ კარგი მოცეკვავე ვყოფილიყავი, ამ ასაკში კი ქორეოგრაფი ვიქნებოდი. არავითარ შემთხვევაში არ გავხდებოდი გამომძიებელი, მოსამართლე ან პროკურორი. ცხოვრება ისედაც რთულია და სხვისი ცხოვრების სირთულეებს ნამდვილად ვერ შევეჭიდებოდი. სხვათა შორის, არასდროს მნდომებია კოსმონავტობა, არც ბავშვობაში და არც ახლა (იღიმის).
- წარმოიდგინეთ, რომ გიბარებთ თბილისის მერი და თავის სავარძელს გითმობთ. რას უპასუხებდით?
- დავთანხმდებოდი და მაშინვე გადავდგებოდი, ვაჩვენებდი, როგორ უნდა გადადგეს კაცი თანამდებობიდან.
- სერენადა თუ გიმღერიათ ოდესმე?
- არასოდეს და ვერც ვერასოდეს გავაკეთებ ამას, არ ვარ ასეთი რომანტიკული.
- წარმოიდგინეთ, რომ თქვენს მეუღლეს სერენადას უმღერის გოგა ხაჩიძე. როგორი რეაქცია გექნებათ?
- ოოო, ეს პროვოკაციაა! ჩემს ცოლს ვერავინ უმღერებს სერენადას, და თუ მაინც მოხდა ასე, რაც დაემართება გოგა ხაჩიძეს, ამაზე ცალკე ვილაპარაკოთ.
- წარმოიდგინეთ, რომ მარტო ისვენებთ ზღვისპირა კურორტზე, ნებივრობთ შეზლონგზე და ხედავთ მონიკა ბელუჩის, რომელიც ღიმილით თქვენკენ მოემართება...
- ქუთაისურად ვეტყოდი, შე ქალო, დავანგრიე ოჯახი და დაანგრიე შენც-მეთქი. მერე რა მოხდება, ამას ვეღარ გეტყვით (იცინის).
- ჩიორა თაქთაქიშვილმა სასიყვარულო წერილი რომ მოგწეროთ, როგორი რეაქცია გექნებათ?
- გამიხარდება, ვიფიქრებ, გამოსწორებულა ჩიორა, მასაც ეშველა და საქართველოსაც-მეთქი. ქალია და ხომ შეიძლება, ზოგჯერ სხვანაირად, ქალურად მოიქცეს?! როდესაც პოლიტიკოსის მანტიას მოისხამ, გაურკვეველი ტიპი ხდები და ჩიორასაც სწორედ ეს დაემართა. ბოლოს და ბოლოს, ხომ უნდა მიხვდეს ეს გოგო, რომ პირადი ცხოვრება უნდა დააყენოს პირველ ადგილზე? ადამიანი ერთი აფეთქებაა, შეიძლება აფეთქდე სიყვარულში, ტრაგედიაში... თუ იმ ადამიანებში, რომლებიც დღეს თავიანთი გამოსვლებით საზოგადოებას აღიზიანებენ, მოხდა აფეთქება, ისინი აღარ იქნებიან გამაღიზიანებელნი, რადგან მათში რაღაც ადამიანურს დავინახავთ.
- წარმოიდგინეთ, რომ გირეკავთ დიმიტრი შაშკინი და გეუბნებათ, საქართველოში მინდა ჩამოსვლა და შენთან დამმალეო...
- ეჰ, ჩემო კარგო, ისეთ პატარა ბინაში ვცხოვრობ, შაშკინი კი არა, ოჯახის წევრები ვერ ვემალებით ერთმანეთს. თანაც დღეს, 21-ე საუკუნეში, დამალვა ადვილი არ არის. დამალვაზე გამახსენდა: ერთ დღეს აღელვებული ახლობელი მოვარდა ჩემთან - დამმალე, სიდედრი მომდევსო. ვუთხარი, შენი სიდედრი მეც მიცნობს და აქაც მოვა, იმასთან წადი, ვისაც არ იცნობს-მეთქი. ასე რომ, თუ შაშკინსაც სიდედრი მოსდევს, ჩემთან ვერ დავმალავ და ისე სადმე რამე სამალავს მოვუნახავ.
- რას აჩუქებდით საქართველოს პრეზიდენტს?
- პრეზიდენტი ისევ ედუარდ შევარდნაძე რომ ყოფილიყო - ყველაზე სქელტანიან წიგნს მოთმინების შესახებ. სიმართლე გითხრათ, არც კი ვიცი, არსებობს თუ არა ასეთი წიგნი. თუ არ არსებობს, მოთმინებისთვის მედალს ჩამოვკიდებდი. მიხეილ სააკაშვილს დამაწყნარებელ საშუალებებს ვაჩუქებდი, ხოლო ბიძინა ივანიშვილი რომ ყოფილიყო მის ადგილას - იმედის გამცემ ბევრ საშუალებას, რადგან ამდენი ხალხი იმედით უყურებს და ელის.
ფსიქოლოგის დასკვნა
მარიამ ღონღაძე, ფსიქოლოგი: საკმაოდ შემწყნარებელი პიროვნებაა, არ იცის გულში წყენის ჩადება. პირდაპირი და მხიარულია.
ესაუბრა ნინო მაისურაძე
ყოველკვირეული გაზეთი "ყველა სიახლე"
(გამოდის ოთხშაბათობით)
