13
ივნისიდღის ზოგადი ასტროლოგიური პროგნოზი
ბოლო წლებში განვითარებული პოლიტიკური მოვლენების ერთ-ერთი აქტიური მონაწილე, კინორეჟისორი გოგა ხაინდრავა ქვეყანაში მიმდინარე პროცესებს აფასებს:
- 5 წლის წინ სააკაშვილი საპრეზიდენტო არჩევნებში დამარცხდა, მაგრამ სწორედ დასავლეთი დაეხმარა მას უზურპირებული ძალაუფლების ლეგიტიმაციაში. ჩვენ ნებისმიერ სამართლიან შენიშვნას გავიზიარებთ, დასავლეთიდან იქნება თუ აღმოსავლეთიდან, მაგრამ უსამართლობას და ტყუილს, ვისგანაც უნდა მოდიოდეს, ვერ შევეგუებით. საქართველოში დადგა დრო, როცა ხალხს გაუჩნდა შანსი, თვითონ მიიღოს გადაწყვეტილებები და განსაზღვროს სახელმწიფოს ბედი, ღირებულებათა სისტემა. ჩვენი ღირებულებები გაცილებით ძველია, ვიდრე დასავლური, რომელზეც დღეს ასე ხშირად საუბრობენ ე.წ. ლიბერტარიანელები. რაც ჩვენთვის მიუღებელია, არ და ვერ გავიზიარებთ. სამხრეთ კორეის სამ პრეზიდენტს აქვს მისჯილი უვადო პატიმრობა, მაგრამ არავის ეპარება ეჭვი ამ ქვეყნის დემოკრატიულობაში. საქართველოს პრეზიდენტი კი, რომელსაც უამრავი დანაშაული აქვს ჩადენილი, "ნაცისტური ლაგერების" შემოქმედია, სადაც ადამიანებს აწამებდნენ, პატივს ყრიდნენ, რატომ არ უნდა დაისაჯოს?! ვფიქრობ, ქართველი საზოგადოებისთვის მეორეხარისხოვანი უნდა იყოს, რას ფიქრობს მასზე ევროპული პოლიტიკური ელიტა, მიუხედავად იმისა, რომ გავლენათა სფეროებიც ვიცით და პოლიტიკური კონიუნქტურაც. მაგრამ თუ არ ვივარგეთ, თუ საკუთარ სინდისთან შეთანხმებულები არ ვიქნებით, ევროპული ღირებულებები ვერ გვიშველის. ჩვენს თავს მივხედოთ, ყველაფერს თავისი სახელი დავარქვათ, და ქვეყნის შენება დავიწყოთ.
- ახლახან მიხეილ სააკაშვილმა სამი საკანონმდებლო ინიციატივით მიმართა პარლამენტს, მათ შორის ერთ-ერთი პირადი ცხოვრების ხელშეუხებლობაზეა. ის მიიჩნევს, რომ ახალი ხელისუფლების პირობებში ადამიანის უფლებები ირღვევა.
- სააკაშვილი შიზოფრენიით შეპყრობილი ადამიანია, რომელიც, როგორც დავით მაღრაძემ შესანიშნავად თქვა, სისხლიან არლეკინად გადაიქცა. მისი წინადადებები მედიის ნაწილის მეშვეობით ტირაჟირდება, ეს არის ჟანგბადი, რითაც სააკაშვილი და "ნაციონალური მოძრაობა" დღემდე ცოცხლობს. სამარცხვინოა, როცა ცდილობენ "ნაცმოძრაობა" ადამიანის უფლებებისთვის მებრძოლ პოლიტიკურ ოპოზიციად წარმოაჩინონ. როგორ ლაპარაკობს სააკაშვილი პირად ცხოვრებაში ჩაურევლობაზე, ადამიანი, რომელმაც ყველა ჩვენგანის ოჯახში აფათურა სისხლიანი ხელები? როგორ შეიძლება "კონცლაგერების" იდეოლოგების ჩიორა თაქთაქიშვილისა და გიგა ბოკერიას ნააზრევი სერიოზულად აღიქვა? ახლა ბევრს ლაპარაკობენ კოჰაბიტაციაზე, მაგრამ ბოროტებასთან თანაარსებობა იგივე ბოროტებაა. ამიტომ ამ ლიბერტარიანულ თამაშებში, რომელსაც ბოკერიას იდეოლოგიის გამტარებელი ჩერგოლეიშვილი ეწევა, საზოგადოება არ უნდა ჩაერთოს.
- პროკურატურის მიერ ახლახან გავრცელებულ კადრებზე ითქვა, რომ ცნობილ ადამიანებს ხელისუფლების პოპულარიზაციისთვის, პიარმიზნებისთვის იყენებდნენ...
- ამგვარი მეთოდები არსებობს მას შემდეგ, რაც კაცობრიობა არსებობს; სოდომ-გომორის ცოდვა არახალია, ადამიანის უფლებები დაცული უნდა იყოს კანონის ფარგლებში, მაგრამ ზოგიერთის მოთქმა და კონვულსიები მამათმავალთა უფლებების დაცვაზე, სულ მცირე, არაკორექტული და უხერხულია, რადგან სექსუალური უმცირესობის წარმომადგენლებს საფრთხეს არავინ უქმნის. დღეს რეალურად საქართველოში სულ სხვა პრობლემებია: დასაძლევია სიღარიბე, ფეხზე დასაყენებელია სოფლის მეურნეობა, განათლების სისტემა, რომლის თავკაცებმა იაკობ გოგებაშვილის "დედაენაც" კი უარყვეს, პროგრამიდან ამოიღეს.. სინამდვილეში, ჩვენ ხომ წლებია ვიცით, რას აკეთებდნენ ციხეში სააკაშვილები, მერაბიშვილები, კალმახელიძეები.
- რა აზრის ხართ პარლამენტის კვლავ თბილისში გადმოტანაზე?
- ისტორიულად ქუთაისი სატახტო ქალაქი იყო, კოლხეთის, მისი კულტურის გული, მაგრამ საქმისთვის, ქართული სახელმწიფოს უკეთ ფუნქციობისთვის პარლამენტი თბილისში უნდა იყოს. ან რა შესძინა პარლამენტის გადატანამ ქუთაისს? ეს შენობა არის აკვარიუმი, ქუთაისის ვირტუალური კეთილდღეობის სიმბოლო. დღეს საქართველოსნაირ ღარიბ ქვეყანას ამგვარი ფუფუნების უფლება არა აქვს, თორემ თელავშიც რომ იყოს მინისტრთა კაბინეტი, არც ამის წინააღმდეგი ვარ.
- ვრცელდება ხმები, რომ შესაძლოა, "საზოგადოებრივ მაუწყებელში" ერთ-ერთ ხელმძღვანელ თანამდებობაზე დაინიშნოთ...
- დღეს ეს დაწესებულება, შეიძლება ითქვას, თავის მთავარ ფუნქციას - მაუწყებლობას არ ახორციელებს, არავითარი კავშირი მას სახალხო მაუწყებლობასთან არა აქვს. საზოგადოებრივი მაუწყებელი, ძირითადად არის ფლიდების, გამფლანგველების, პოლიტიკური კონიუნქტურის რუპორების თაიგული, რიგითი თანამშრომლების დიდ ნაწილს კი არაფერს ვერჩი. თუ ადრე "მაუწყებელი" აღვირახსნილი ფარისევლობის ბუდე იყო, ახლა შენიღბული ფარისევლობის ბუდედ იქცა. 7-10 პატიოსანი, ნიჭიერი და ფართო შემოქმედებითი პოტენციალის მქონე ადამიანის მისვლას შეუძლია იქ სიტუაციის ძირეულად გარდატეხა... რაც შეეხება იქ ჩემს დანიშვნას, ნამდვილად არ ვაპირებ "საზოგადოებრივ მაუწყებელში" ხელმძღვანელ თანამდებობაზე მუშაობას, ისევ ჩემს საქმეს გავაგრძელებ... ერთ თვეში დავასრულებ ფილმს მერაბ კოსტავაზე: "კართაგენი უნდა დაინგრეს". ჩაფიქრებული მაქვს ციკლი: "მითების ნგრევა", რომელშიც საქართველოს თანამედროვე ისტორიის გამორჩეულ გმირებზე ვაპირებ ფილმების შექმნას.
- სრულიად საქართველოს კათოლიკოს-პატრიარქთან ერთად მიემგზავრებით რუსეთში, სადაც ილია მეორე არა მარტო რელიგიური, პოლიტიკური წრეების წარმომადგენლებს შეხვდება, მათ შორის, პრეზიდენტ პუტინს... რას ელით ამ შეხვედრებისგან?
- პატრიარქის იუბილე, მისი შეხვედრები რუსეთში ძალზე მნიშვნელოვანი მოვლენაა საქართველოს ისტორიაში. თუ ჩვენი ქვეყანა გადარჩა, ეს პატრიარქის დამსახურებაა. რუსეთის მართლმადიდებელი ეკლესია მსოფლიო ეკლესიათა ერთ-ერთი ბურჯია გავლენით, მრევლის სიდიდით, ამიტომ მასთან სიახლოვე ძალზე მნიშვნელოვანია. ჩემთვის დიდი პატივია, რომ პატრიარქის ვიზიტი ფირზე უნდა აღვბეჭდო. რაც შეეხება პოლიტიკას, ბათუ ქუთელიასა და ნიკა რურუასგან განსხვავებით, რომლებიც დარწმუნებულები იყვნენ, რომ "ჟანგიან რუსულ ტანკებს როსტოვამდე ჩაყვებოდნენ", მოვლენებს უფრო რეალისტურად ვაფასებ. ფაქტია, სამარცხვინო დღენახევრიანი ომის შემდეგ რუსულ-ქართული ურთიერთობები ძალზე გამწვავებულია. ვითარება რთულია, მაგრამ უნდა ვიმოქმედოთ, ველაპარაოთ, ვარწმუნოთ, რეგიონში საუკეთესო ქვეყანა უნდა ავაშენოთ. პრობლემები ორ ხალხს შორის ნელ-ნელა მოგვარდება, რა თქმა უნდა, არა პრინციპული საკითხების დათმობის ხარჯზე. პრემიერ-მინისტრი ბიძინა ივანიშვილი ღირსეული ადამიანია, ქვეყნის სიყვარულს საქმით გამოხატავს, ასევე, ეჭვი არ მეპარება დავით უსუფაშვილის, თეა წულუკიანის, არჩილ კბილაშვილის, ირაკლი ღარიბაშვილის პატიოსნებაში, რომელთაც ხალხმა ქვეყნის მმართველობის გასაღები ჩააბარა. მაგრამ საზოგადოება ყოველთვის ფხიზლად, მოდარაჯე თვალით უნდა დააკვირდეს მათ ნაბიჯებს, სწორედ ეს არის საზოგადოების ძალაც და სახელმწიფოს ძლიერებაც.
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
