23
მაისიდღის ზოგადი ასტროლოგიური პროგნოზი
"ნაციონალური მოძრაობის" გენერალურმა მდივანმა ვანო მერაბიშვილმა ეკონომიკური მაჩვენებლების პრეზენტაცია გამართა.
როგორც დღეს გამართულ ბრიფინგზე მერაბიშვილმა განაცხადა, ეკონომიკური მაჩვენებლების შესახებ ინფორმაცია "ნაციონალების" ექსპერტებმა სხვადასხვა წყაროებიდან მოიპოვეს და საქართველო დგას სერიოზული საბიუჯეტო კრიზისის წინაშე. კერძოდ, მისი თქმით, რეალური მთლიანი შიდა პროდუქტის ზრდა 2011 წლის ოთხივე კვარტალში შეინიშნებოდა, 2012 წელს კი, პირველ კვარტალში შეინიშნებოდა მშპ-ს 6,7%-იანი, მეორე კვარტალში 8,2%-იანი ზრდა, ხოლო მესამე კვარტალში 7,5%-იანი, მეოთხე კვარტალში კი, 2,3%-იანი კლება დაფიქსირდა, რაც ცუდი მაჩვენებელია.
გარდა ამისა, მან წარმოადგინა ეკონომიკური ზრდის დეკემბრის შეფასება. მისი თქმით, 2010 წელს ეს მაჩვენებელი იყო 6,1%, 2011 წელს 8,5%. მერაბიშვილის თქმით, 2012 წელს დაფიქსირდა პირველი ვარდნა და მინუს 1,5% შეადგინა, რაც საგანგაშო ვითარებაა.
რაც შეეხება დღგ-ს ბრუნვებს, მერაბიშვილის თქმით, წინა წლის შესაბამის თვესთან შედარებით, 2012 წლის ოქტომბერში ეს მაჩვენებელი 6%-ს, ნოემბერში 3,6%-ს, ხოლო დეკემბერში კატასტროფული მაჩვენებელია და შეადგენს მინუს 5,2%-ს.
მერაბიშვილმა ასევე წარმოადგინა ექსპორტის წლიური მაჩვენებელი მეოთხე კვარტალში. კერძოდ, მისი ინფორმაციით, 2012 წელს ექსპორტის მაჩვენებელი ოქტომბერში იყო 16,3%, ნოემბერში მინუს 3,1%, დეკემბერში კი, მინუს 22,4%.. მან მეოთხე კვარტალში იმპორტის ზრდის მაჩვენებელზეც ისაუბრა და აღნიშნა, რომ იმპორტი ოქტომბერში იყო 6,8%, ნოემბერში მინუს 4,7%, დეკემბერში კი - მინუს 9,1%.
რაც შეეხება სესხებსა და დეპოზიტებს, მერაბიშვილმა აღნიშნა, რომ 2011 წლის განმავლობაში შეინიშნებოდა ზრდა. კერძოდ, სესხები 2011 წელს იყო 4,2%, დეპოზიტები კი - 10,3%, 2012 წელს სესხები - 1,7%, დეპოზიტები - 2,1%.
ეკონომიკური ზრდის მაჩვენებლების კლებასთან დაკავშირებით, მერაბიშვილმა დღეს რამდენიმე მაგალითიც დაასახელა. კერძოდ, მისი თქმით, ყველაზე მთავარი ისაა, რომ ხორციელდება ყოველდღიური და სისტემატიური ზეწოლა ბიზნესზე. ასევე, მისი თქმით, პოლიციამ ეკონომიკური დანაშაულის გამოძიება დაიწყო, რაც მისი მინისტრობის დროს პოლიციას აკრძალული ჰქონდა.
მეორე მიზეზად კი, ყოფილმა პრემიერმა დღევანდელი მთავრობის ერთიანი მკაფიო გეგმის არარსებობა დაასახელა. კერძოდ, მისი თქმით ფერმერმა და გლეხმა არ იცი, რა არის მთავრობის ეკონომიკური პრიორიტეტები.
"არავინ იცის, თუ რა პრიორიტეტები აქვს საქართველოს მთავრობას და ცრუ დაპირებები ამცირებს ინვესტორების მზაობას ინვესტიციების განხორციელებასთან დაკავშირებით", - აღნიშნა მერაბიშვილმა. მისივე თქმით, მშენებლობები შეჩერებულია და ეს დასაქმებაზეც აისახება.
მისივე თქმით, ამ თვეებში "ნაციონალური მოძრაობა" დაადასტურებს, რომ ადგილი აქვს წინასწარ გადახდებს. მერაბიშვილის შეფასებით, ასეთი კრიზისული ვითარება ბოლო სამი წლის განმავლობაში არ ყოფილა და ეს რომ ძველი ხელისუფლების დროს მომხდარიყო, საგანგებო მდგომარეობა იქნებოდა გამოცხადებული.
მერაბიშვილმა ისიც აღნიშნა, რომ იმის გათვალისწინებით რომ ძველმა ხელისუფლებამ "ფორმაში დატოვა" ბიუჯეტი, არსებობს რეზერვები, რომლის გათვალისწინებითაც დაგეგმილ პროექტებს საფრთხე არ ემუქრება. თუმცა, მისი თქმით, თუ ახალმა მთავრობამ დროულად არ მიიღო გადაწყვეტილებები და ზომები, საფრთხე არა მხოლოდ ამჟამინდელი მთავრობის გეგმებს, არამედ წინა ხელისუფლების დროს დაგეგმილ პროექტებსაც დაემუქრება.
