25
მაისიდღის ზოგადი ასტროლოგიური პროგნოზი
მე იმედგაცრუებული დავრჩი ამ არჩევნების შედეგებით, მაგრამ ამაყი ვარ, რომ სწორედ ამ გზით მოხდა ხელისუფლების შეცვლა ქვეყანაში , - ამის შესახებ საქართველოს პრეზიდენტმა მიხეილ სააკაშვილმა ევროსაბჭოს საპარლამენტო ასამბლეაში, სიტყვით გამოსვლისას განაცხადა.
პრეზიდენტის თქმით, ის ამაყია საკუთარი პარტიით, რომელმაც ბევრი გააკეთა, რათა ქვეყანაში აეშენებინა ისეთი სისტემა, სადაც უმრავლესობა და უმცირესობა იცვლება არჩევნების გზით.
"90-იანი წლების დასაწყისში, როდესაც საქართველო დანაწევრებული და გაყოფილი იყო, ჩემი პოლიტიკაში ჩართვა განსაზღვრა იმ იდეამ, რომ ოდესმე შევუერთდებოდით ევროპულ დემოკრატიულ ოჯახს, სადაც ცვლილება ხდება ხმებით და არა ტყვიებით. რა თქმა უნდა, მე იმედგაცრუებული დავრჩი ამ არჩევნების შედეგებით, მაგრამ ამაყი ვარ, რომ სწორედ ამ გზით მოხდა ხელისუფლების შეცვლა ქვეყანაში. მე ამაყი ვარ ჩემი პარტიით, რომელმაც ძალიან ბევრი გააკეთა იმისთვის, რომ ქვეყანაში აეშენებისა ისეთი სისტემა, სადაც უმრავლესობა და უმცირესობა იცვლება არა გადატრიალებით, არამედ არჩევნების შესაბამისად. მე ვხელმძღვანელობდი გუნდს, რომელიც ქვეყანაში 8 წლის განმავლობაში რადიკალურ ტრანსფორმაციას ახდენდა საზოგადოებაში, ათავისუფლებდა საზოგადოებას იმ მემკვიდრეობისგან, რომელიც საბჭოთა კავშირიდან მოდიოდა. ძალიან ბევრი დამკვირვებელი ამ ცვლილებას მენტალურ რევოლუციას უწოდებდა. ის, რაც მოხდა საქართველოში ბოლო 8 წლის განმავლობაში და მათ შორის 1-ელ ოქტომბერსაც, არის ჩვენი დემოკრატიული გამოცდილების ძალიან დიდი წილი. ამან, მე იმედი მაქვს, რომ არა მხოლოდ ჩვენი ერი, არამედი მთელი რეგიონი შეცვალა", - განაცხადა მიხეილ სააკაშვილმა.
მისივე თქმით, საქართველომ დაამტკიცა, რომ მას აქვს ერთი რადიკალური მიმართულება და ეს არის ევროპული არჩევანი. "3 თვის წინ მოხდა ხელისუფლების გადაცემა საქართველოში არჩევნების გზით. ეს მოხდა პირველად საქართველოს ისტორიაში. ნებისმიერ დემოკრატიაში უმრავლესობა შეიძლება შეიცვალოს მხოლოდ ამომრჩეველთა ხმების მიხედვით, მაგრამ ჩვენი ერის მისწრაფება ევროპისა და ევროინტეგრაციის მიმართ ნებისმიერი პოლიტიკური დანაწევრების მიღმა გადის. ეს არის მთავარი გზავნილი, რომელიც მინდა ასამბლეის წინაშე გავაჟღერო", - განაცხადა პრეზიდენტმა.
