9
ივლისიდღის ზოგადი ასტროლოგიური პროგნოზი
საპარლამენტო უმრავლესობის წევრმა, დეპუტატმა ნანა ყეინიშვილმა არ იცის, აპირებენ თუ არა საქართველოში ჩამოსვლას მისი პოლიტდევნილის სტატუსის მქონე მაზლები.
როგორც "ინტერპრესნიუსს" ყეინიშვილმა განუცხადა, მაზლების გეგმების შესახებ არაფერი იცის.
"სამწუხაროდ, ამომწურავ პასუხს ვერ გაგცემთ. მათთვის ნამდვილად არ დაგვისვამს ეს შეკითხვა. უხერხულიც კია ასეთი შეკითხვის დასმა. რატომ არ უნდა დაბრუნდნენ, როცა ბრალდება უკვე მოეხსნებათ? ისინი საქართველოს მოქალაქეები არიან და თავისუფლად შეუძლიათ გადაადგილება, ამდენად მე არც მიფიქრია, რომ ასეთი შეკითხვა მათთვის დამესვა. რასაკვირველია, კონტაქტი მქონია, თუმცა არ მიკითხავს", - აღნიშნა ყეინიშვილმა.
მისივე ინფორმაციით, ჯემალ და იანიკ ქარქუსოვები ამჟამად ვლადიკავკაზში იმყოფებიან.
ნანა ყეინიშვილის ოჯახიდან პოლიტპატიმართა და პოლიტდევნილთა სიაში სულ სამი პირი იყო. პოლიტპატიმრის სტატუსით მისი ძმა, ზაზა ყეინიშვილი გუშინ ამნისტიით გათავისუფლდა.
ამასთან, რაც შეეხებათ ქარქუსოვებს, 2005 წლის ნოემბერში საქართველოს შსს-მ გაავრცელა ინფორმაცია, რომ საქართველოს სპეცსამსახურები დაეხმარნენ ე.წ. სამხრეთ ოსეთის თვითგამოცხადებული რესპუბლიკის ეროვნული უშიშროების საბჭოს ყოფილ მდივან ჯემალ ქარქუსოვს ცხინვალის ციხიდან გაქცევაში და საქართველოს კონტროლირებად ტერიტორიაზე თავშესაფრის პოვნაში. ქარქუსოვი თავის ძმასთან, იანიკ ქარქუსოვთან ერთად გაიქცა.
ამასთან, ჯემალ ქარქუსოვი სამხრეთ ოსეთის დროებითი ადმინისტრაციის შს მინისტრად, იანიკ ქარქუსოვი კი ამავე ადმინისტრაციის ხელმძღვანელის დიმიტრი სანაკოევის მრჩევლად დაინიშნა.
2008 წლის საქართველო-რუსეთის ომის შემდეგ ჯემალ და იანიკ ქარქუსოვები რუსეთში გაიქცნენ და საქართველოს ხელისუფლებას სხვადასხვა სახის ბრალდებები წაუყენეს. მათ შორის, ქარქუსოვები ომის დაწყებაში ქართულ მხარეს ადანაშაულებდნენ.
კიდევ ერთი ძმა, ურუზმაგ ქარქუსოვი, რომელიც ნანა ყეინიშვილის მეუღლეა, დროებითი ადმინისტრაციის პრემიერ-მინისტრი იყო.
ურუზმაგ ქარქუსოვი 2007 წლიდან საქართველოს ეკონომიკისა და მგრადი განვითარების მინისტრის მოადგილის პოსტზეც მუშაობდა. ის თანამდებობიდან 2010 წელს გაათავისუფლეს. ურუზმაგ ქარქუსოვი მაშინ აცხადებდა, რომ მისი გადაწყვეტილება პოლიტიკურ მოტივს უკავშირდებოდა.
