26
აპრილიდღის ზოგადი ასტროლოგიური პროგნოზი
"მთავარია, წიგნი საინტერესოდ იკითხებოდეს, ჩემთვის ჟანრს მნიშვნელობა არა აქვს. მხოლოდ დეტექტივები არ მომწონს", - ამბობს მომღერალი ანრი ჯოხაძე. "ერუდიტისთვის" ჩაწერაზე სიამოვნებით დამთანხმდა. ამჟამად ახალ კლიპზე - "ღიმილი მინდა" მუშაობს. პრეზენტაციას ამ თვის ბოლოსთვის გეგმავს. კითხვაზე - ლიტერატურული პერსონაჟებიდან რომელთან იმეგობრებდი? - ხანგრძლივი პაუზის შემდეგ მპასუხობს:
პრეამბულის მაგიერ
- ღადაობ? იმდენი გმირი გამახსენდა, ყველა დაგისახელო?
- როგორი გმირები გიზიდავს? კეთილი, თავხედი, უარყოფითი თუ...
- უარყოფით გმირებთან ურთიერთობის ინტერესი მხოლოდ მათი ფსიქოტიპის გაშიფვრის მიზნით მაქვს. დიდი სიამოვნებით გავესაუბრებოდი იაგოს, ვკითხავდი, დეზდემონას და ოტელოს რას ერჩოდა?
- ახალი წელი შენში რასთან ასოცირდება?
- ფსიქოზურ სამზადისთან.
- სამზადისში თავად არ მონაწილეობ?
- არასდროს. ნაძვის ხის მორთვაშიც კი არ ვმონაწილეობ, არც - კერძების მომზადებაში. გოზინაყზეც არ ვგიჟდები.
- ალბათ დიდი ხანია, ახალ წელს ოჯახში აღარ შეხვედრიხარ.
- მართალია. ყოველი ახალი წლის ღამეს, როცა ჩემს საქმეს მოვილევ, მერე მეგობრებს ვუერთდები და რელაქსაციისთვის ცოტა ალკოჰოლს მივირთმევ.
- ნასვამი ანრი ჯოხაძე როგორია?
- ძალიან კარგი. მოსიყვარულე ვხდები.
- მითხარი, ახალ კლიპზე ვმუშაობო...
- კლიპი სიყვარულზეა. ეს არის ინოლა გურგულიას ერთ-ერთი საუკეთესო სიმღერის - "ღიმილი მინდა" ტანგოს სტილში გაკეთებული ახალი ვერსია. კლიპში "ცეკვავენ ვარსკვლავების" რამდენიმე მონაწილე ცეკვავს. მგონი, ძალიან კარგი და სასიამოვნო საყურებელი იქნება.
- კლიპს როდის ვიხილავთ?
- სავარაუდოდ, იანვრის ბოლოს.
- ახალ წელს იაპონელებს სახლში შეაქვთ ფიჭვის ტოტები, როგორც დღეგრძელობისა და სიძლიერის სიმბოლო, ქლიავის ტოტები, როგორც მარადიულობის სიმბოლო. დაასახელე მესამე მცენარე, რომელიც სათნოების სიმბოლოდ ითვლება.
- ეგ არ გამიგია, ვერ დავასახელებ. გამოცნობაში რომ დამეხმარო, ხომ შეიძლება?
- მინიშნებას გეტყვი: ეს მცენარე მაღალი იზრდება და უყვარს წყალი.
- მისი ღერო მსუბუქია?
- მგონი, სწორი პასუხი იცი.
- ამ წუთში მხოლოდ ბამბუკი გამახსენდა.
- გამოიცანი. დაასახელე ერთადერთი ძუძუმწოვარი, რომელიც დაფრინავს.
- ღამურა.
- "ლიტერატურა ჩემი კანონიერი ცოლია, ხოლო მედიცინა - საყვარელი. როცა ვიღლები, ერთ-ერთი მათგანისგან მივდივარ და მთელ ღამეს ვატარებ მეორესთან"; რომელი ცნობილი რუსი მწერალია ამ სიტყვების ავტორი?
- ე.ი. ის პროფესიით ექიმი იყო და თან წერდა (ფიქრობს). არ ვიცი.
- ის ცნობილი დრამატურგია.
- ვერ გიპასუხებ.
- ანტონ ჩეხოვი.
- ჩემს შემთხვევაშიც ასეა. კანონიერი ცოლიც მყავს და საყვარელიც. ჩემი კანონიერი ცოლი სიმღერაა, საყვარელი - რეჟისორობა.
- 1877 წელს საახალწლოდ დააპატენტეს ნივთი, რომელიც გამომგონებელთა აზრით, წარმატებით დაეხმარებოდა ადამიანებს დეპრესიის მოხსნაში, გადაღლილობის დროს და ა.შ. ჩამოთვლილთაგან რომელი იყო ეს ნივთი: ვარდისფერი სათვალე, ციგურები თუ ყურებიანი ქუდი?
- პირველ რიგში, გამოვრიცხავ ვარდისფერ სათვალეს, მაგრამ სწორი პასუხი არ ვიცი.
- გეტყობა, რომ არ იცი.
- ციგურებით სრიალი კარგია, ყურებიან ქუდზე რა მოგახსენო?!
- სწორი პასუხია - ვარდისფერი სათვალე. ამის მიზეზი შეიძლება იყოს: ახალი წელი, დაბადების დღე ან სხვა დღესასწაული; ნადირობა, ყინვა და ა.შ. შეიძლება, ეს რაღაც სრულიად უმიზეზოდაც მოხდეს. რაზეა ლაპარაკი?
- ვერ ვხვდები.
- არადა, ვფიქრობდი, ადვილად გამოიცნობს-მეთქი. საახალწლო სუფრაზე ეს ყოველთვის ხდება.
- ა!!! მივხვდი, მივხვდი!!! დალევაა სწორი პასუხი.
- პოეზია გიყვარს?
- რა თქმა უნდა.
- "ერთისთვის ერთი არსებობს მხოლოდ,/ იმ ერთის პოვის თუ გახდი ღირსი,/ არაერთს ისე მოეღო ბოლო, -/ თვალიც ვერ მოჰკრა გაჩენილს მისთვის". ვინ არის ამ სტროფის ავტორი?
- მუხრან მაჭავარიანი, არა?
- გამოიცანი.
- მუხრანის და ნიშნიანიძის პოეზია ძალიან მიყვარს.
- "ის ერთი" ხომ არ გიპოვია?
- ნაპოვნი მყავს, მაგრამ უარს მეუბნება.
- ჩვენ ვიცნობთ?
- არა.
- რას ეტყვი ჩვენი ჟურნალის ფურცლებიდან?
- თბილისი საცხოვრებლად არცთუ ისე ცუდი ქალაქია.
- რომელი უცხოური სიტყვა წარმოიშვა ფრანგული სიტყვისგან "არგო", რაც "მოპარულ ენას" ნიშნავს?
- არ ვიცი.
- ჟარგონი. ძველ ბერძნულ მითოლოგიაში არის ქალღმერთი თემიდა. რომელი ქალღმერთი შეესაბამება მას რომაულ მითოლოგიაში?
- რატომ გამჭედე?
- მიგანიშნებ: საქართველოში იმ ქალღმერთის სახელობის სამინისტროც არის.
- იუსტიციის სამინისტროზე მეუბნები?
- დიახ.
- ანუ იმ ქალღმერთს იუსტიცია ერქვა.
- სტატისტიკამ დაამტკიცა, რომ ისინი დღეში 920 კითხვას სვამენ. ვინ არიან ისინი?
- ბავშვები.
- რას ნიშნავს სიტყვა "კოჰაბიტაცია"?
- "კოჰაბიტაცია" ძალიან მოდური სიტყვაა და ქართულად, თანაცხოვრებას, თანაარსებობას, ერთობლივ მოღვაწეობას ნიშნავს.
- არსებობს თუ არა ისეთი ციფრი, რომლის დასახელება იმდენივე ასოსგან შედგება, რამდენსაც თავად გამოხატავს?
- ალბათ არსებობს, ისე კითხვას არ დასვამდი.
- თუ არსებობს, დამისახელე.
- 1 არ არის, 2-იც - არა, სამი... გამოვიცანი, ასეთი ციფრია 4.
- რაზე უფრო ადვილად იტყოდით უარს - ქალზე თუ ღვინოზე? - ამ კითხვას ფრანგები, როგორც წესი, პასუხობენ: გააჩნია...
- აბა, რა ვიცი, ფრანგები როგორ პასუხობენ.
- თავად როგორ უპასუხებ?
- უარს ღვინოზე უფრო ადვილად ვიტყვი.
- ფრანგების პასუხი კი ასეთია: ...გააჩნია ასაკს.
- (იცინის) ხედავ, ფრანგები რა ეშმაკები არინ?!
- რა უფრო მძიმეა - ერთი კილოგრამი ბამბა თუ ერთი კილოგრამი რკინა?
- თანაბარია; გგონია, დამაბნევ?
- რა ერქვა ოლღა ბებიას, ილიკოსა და ილარიონის საზიარო ძროხას?
- ფაქიზო.
- სპარსული ანდაზა ამტკიცებს: თუ ადამიანი სიბრძნეს ეძებს, ის ჭკვიანია. ამ ანდაზის მიხედვით, როდის არის ადამიანი სულელი?
- არ ვიცი. შეიძლება, მაშინ, როცა გაიფიქრებს, სიბრძნე ვიპოვეო.
- გამოიცანი. რამდენი ორნიშნა რიცხვი არსებობს?
- (ფიქრობს) 90.
- კოლექციონერები მათ ხელში ჩასაგდებად საათობით დგანან რიგებში, წერენ წერილებს და ზოგჯერ ქურდობასაც არ ერიდებიან, რაზეა ლაპარაკი?
- ავტოგრაფებზე.
- შეიძლება თუ არა, მამაკაცი, რომელიც ბერლინში ცხოვრობს, დაქორწინდეს სხვა ქვეყანაში მცხოვრებ, თავისი ქვრივის დაზე?
- როგორ? (კითხვას ვუმეორებ) არ შეიძლება.
- რატომ?
- ქვრივის დაზე ქორწინება როგორ შეიძლება?
- რატომ არ შეიძლება?
- დაა, რას მეკითხები?
- მგონი, კითხვა ვერ გაიგე. ქალს რა შემთხვევაში ჰქვია ქვრივი?
- როცა ქმარი გარდაცვლილი ჰყავს. გავიგე, რატომაც ჩამეძიე. არ შეიძლება.
- წარმოიდგინე, სირბილში გაუსწარი მორბენალს, რომელიც მეორე პოზიციაზე იმყოფებოდა. რომელ პოზიციას დაიკავებ ამის შემდეგ?
- მეორეს.
- რა არის ის, რაც ყველასა და ყველაფერს აქვს?
- უნდა დავფიქრდე და გიპასუხებ. (პაუზის შემდეგ) წონა, ზომა, კიდევ რა ვიცი, რა გითხრა?
- შენს პასუხში არის ლოგიკა. სწორი პასუხია - სახელი. ყველა თვე 30 ან 31 რიცხვით მთავრდება. რომელ თვეშია 28 რიცხვი?
- მეკაიფები თუ მართლა მეკითხები?
- კითხვა დავსვი, გაგიმეორო?
- რომელ თვეშია და ყველაში.
- რატომ გაიკვირვე? ზოგი მიმტკიცებს, 28 რიცხვი მხოლოდ თებერვალშიაო.
- ვიცი, ამ რუბრიკას სულ ვკითხულობ. ისიც ვიცი, ჩაწერაზე რესპონდენტების დათანხმება რომ გიჭირს.
- გმადლობ, რომ კითხულობ. დაბოლოს, დაასრულე სპინოზას ცნობილი გამონათქვამი: "თუ გინდათ, ცხოვრებამ გაგიღიმოთ, აჩუქეთ მანამდე მას თქვენი კარგი..."
- ხასიათი.
- "...თქვენი კარგი განწყობა".
თამუნა კვინიკაძე
(გამოდის ხუთშაბათობით)
