30
მაისიდღის ზოგადი ასტროლოგიური პროგნოზი
ჭავჭავაძის გამზირზე გუშინ დაკავებულ პირებს "საქართველოს ბანკის" დაყაჩაღებასთან კავშირი არ აქვთ, - ამის შესახებ "ინტერპრესნიუსს" ერთ-ერთი დაკავებულის ადვოკატმა, ლალი აფციაურმა განუცხადა.
მისივე თქმით, ეს გუშინ აყვანილი პირების დაკითხვისას კიდევ ერთხელ დადასტურდა.
როგორც აფციაურმა განმარტა, ნუცუბიძის ქუჩაზე მდებარე "საქართველოს ბანკის" ფილიალის დაყაჩაღებისას დაკავებული პირები მეგობრის დედის დაკრძალვაზე იმყოფებოდნენ.
"დაკითხვის შემდეგ აღარ დარჩა ეჭვი, რომ ამ ადამიანებმა ყაჩაღობა არ ჩაიდინეს. დღეს იანქოშვილს ალბათ გაათავისუფლებენ. რაც შეეხება იარაღის ტარებას, არსებობს ეჭვი, რომ ის ერისთავს ეკუთვნის, თუმცა ამას გამოძიება დაადგენს. დაკავებულების კავშირს ყაჩაღობასთან კატეგორიულად გამოვრიცხავ. ნუცუბიძის ქუჩაზე მდებარე "საქართველოს ბანკის" ფილიალის დაყაჩაღებისას დაკავებული პირები მეგობრის დედის დაკრძალვაზე იმყოფებოდნენ და ამას დაადასტურებს ამ დაკრძალვაზე მყოფი ათობით ადამიანი", - აღნიშნა ლალი აფციაურმა.
რაც შეეხება დაკავების მიზეზებს, ლალი აფციაურის ინფორმაციით, მისი დაცვის ქვეშ მყოფი პირები პატრულის თანამშრომლებმა ყაჩაღობაში ეჭვმიტანილებს მიამსგავსეს, რის გამოც ისინი გააჩერეს და აიყვანეს.
თბილისში გუშინ ნუცუბიძის ქუჩაზე მდებარე "საქართველოს ბანკის" ფილიალი დააყაჩაღეს. ყაჩაღობიდან მალევე შინაგან საქმეთა სამინისტრომ ჭავჭავაძის გამზირზე რამდენიმე პირი დააკავა, თუმცა მომხდარზე ოფიციალური განცხადება შსს-ს ამ დრომდე არ გაუკეთებია.
