როგორ შევიმსუბუქოთ მოსაწყენი სამუშაო დღე?

სამსახურში ხშირად გადატვირთულ სამუშაო გრაფიკს თან სტრესული მდგომარეობაც ერთვის. გთავაზობთ რამდენიმე მარტივ რჩევას, რომელიც ერთ ჩვეულებრივ სამუშაო დღეს გაგილამაზებთ:

1. სამუშაო დღის ორგანიზება: სამსახურში ყოველთვის 5 წუთით ადრე მიდით. სამუშაო გრაფიკის დაწყებამდე 5 წუთით ადრე მისვლა დღის განრიგის დაგეგვმასა და დასვენებაში დაგეხმარებათ. ამ შემთხვევაში, დღე სტრესით არ დაიწყება. მოაწესრიგეთ სამუშაო მაგიდა. უჯრაში მიმალული ზედმეტი ფურცელიც კი გაღიზიანებას იწვევს. ახალი დღე ახალი განწყობით - წაშალეთ ელექტრონულ მისამართზე მიღებული ძველი მესიჯები, გადაყარეთ ზედმეტი ფურცლები, "გაწმინდეთ" ძველი მასალებისგან კომპიუტერის ეკრანი. სამუშაო მაგიდაზე მხოლოდ ისეთი ნივთები განათავსეთ, რომელიც აუცილებლად დაგჭირდებათ.

2. გაალამაზეთ სამუშაო კუთხე: გამოკვლევა აჩვენებს, რომ ადამიანები, რომლებიც სამუშაო კუთხეს ალამაზებენ, უფრო მეტი შრომისუნარიანობით გამოირჩევიან, ვიდრე სხვა დასაქმებულები. დადებითი განწყობის შესაქმნელად კომპიუტერის ეკრანისთვის შესაბამისი ფოტო მოძებნეთ. პატარა ზომის ჩარჩოში საყვარელი ადამიანის, ცხოველის, ან ისეთი ფოტო განათავსეთ, რომელიც სასიამოვნო წუთებს გაგახსენებთ. სამუშაო დღეს ყვავილებიც გაგილამაზებთ. როგორც მეცნიერები ამბობენ, სტიმულისთვის ლამაზი დიზაინის კალამიც კი საკმარისია.

3. ლამაზი სამოსი ჩაიცვით: მაკიაჟის გაკეთება, მაღალ ქუსლებზე სიარული, ლამაზი ვარცხნილობა, ან შარვალ-კოსტუმით ყოველ დღე თავის მოწონება რთულია. თუმცა, ლამაზ სამოსს სასწაულის მოხდენა შეუძლია - ადამიანი სამსახურში მთელი დღე პოზიტიურ განწყობაზეა და სამუშაოსაც გაცილებით მეტი ენთუზიაზმით ასრულებს. საქმე ის არის, რომ სახლიდან მოწესრიგებულად გასული ადამიანი ქუჩაში საპირისპირო სქესის მზერას გრძნობს. სამსახურში მისულს კი კომპლიმენტებით ავსებენ.

4. მრავალფეროვნება შესძინეთ სამუშაო დღეს: მრავალფეროვნება ყველაზე მნიშვნელოვანია. რასაკვირველია, თქვენი სურვილით ვერც გრაფიკს შეცვლით და ვერც მოვალეობებს შეიმსუბუქებთ, მაგრამ არსებობს საკითხები, რომელიც თქვენს ხელშია. შეცვალეთ სამსახურში წასასვლელი მარშრუტი. სამარშრუტო ტაქსის ნაცვლად, მეტროთი იმგზავრეთ, სასადილოში ახალი კერძი გასინჯეთ, სამსახურიდან რამდენიმე გაჩერება ფეხით გაისეირნეთ, დაგეგმეთ საღამო მეგობრებთან ერთად, ან სულაც მარტომ ახლომდებარე კაფეში ისადილეთ.

5. კოლეგებთან პოზიტიური და მეგობრული ურთიერთობა შეინარჩუნეთ: კოლეგებთან მტრობა კარგს არაფერს მოგიტანთ. შეინარჩუნეთ მეგობრული ურთიერთობა და ისინიც თქვენდამი პოზიტიურად განეწყობიან. შეეცადეთ, მოკლე დროში გადაწყვიტოთ კონფლიქტები, უარი თქვით ჭორაობაზე. ყველაზე მნიშვნელოვანი ღიმილია. მაშინაც კი, როდესაც ყვირილი გინდათ, გაბრაზებული ხართ და არ გეცინებათ, გაიღიმეთ - პოზიტიური ენერგია აუცილებლად დაგიბრუნდებათ.

6. დააფასეთ, რომ დასაქმებული ხართ: მსოფლიოში მილიონობით ადამიანია უმუშევარი, თქვენ კი დასაქმებული ხართ და სტაბილურ შემოსავალს იღებთ. მიუხედავად პრობლემებისა და სირთულეებისა, უმჯობესია, დააფასოთ, რომ სამსახური გაქვთ.

მომზადებულია Oddstuffmagazine-ს მიხედვით.