29
მაისიდღის ზოგადი ასტროლოგიური პროგნოზი
დღეს მიხეილ სააკაშვილის პრეზიდენტის პოსტზე მეორე ვადით არჩევიდან 5 წელი შესრულდა. 2008 წლის 5 იანვარს საქართველოში რიგგარეშე საპრეზიდენტო არჩევნები ჩატარდა, რომელსაც საკმაოდ დაძაბული პოლიტიკური პროცესები უძღოდა წინ. 2007 წლის ოქტომბერ-ნოემბრის მასშტაბური საპროტესტო აქციებისა და 7 ნოემბრის მოვლენების შემდეგ, პრეზიდენტმა სააკაშვილმა განაცხადა, რომ მას ხალხის ახალი მანდატი სჭირდებოდა და თანამდებობიდან ვადაზე ადრე გადადგა. არჩევნები 2008 წლის 5 იანვრისთვის დანიშნა.
მაშინ პრეზიდენტის თანამდებობაზე მიხეილ სააკაშვილთან ერთად კენჭი იყარა ექვსმა კანდიდატმა: ლევან გაჩეჩილაძემ, ბადრი პატარკაციშვილმა, დავით გამყრელიძემ, გია მაისაშვილმა, შალვა ნათელაშვილმა და ირინა სარიშვილმა.
ოფიციალური მონაცემებით, 5 იანვრის არჩევნებში მიხეილ სააკაშვილმა ხმების 53,47%-ით გაიმარჯვა.
საპრეზიდენტო არჩევნების პარალელურად, 2008 წლის 5 იანვარს საქართველოში პლებისციტიც ჩატარდა. საპლებისციტო კითხვა ქვეყნის ნატო-ში გაწევრიანებასა და საპარლამენტო არჩევნების 2008 წლის გაზაფხულზე ჩატარებას ეხებოდა. პლებისციტზე მოსახლეობამ მხარი საქართველოს ნატო-ში გაწევრიანებას და საპარლამენტო არჩევნების გაზაფხულზე ჩატარებას დაუჭირა.
მიხეილ სააკაშვილის ინაუგურაცია 20 იანვარს გაიმართა.
საქართველოს კონსტიტუციის 70-ე მუხლის I პუნქტის თანახმად, საქართველოს პრეზიდენტი აირჩევა საყოველთაო, თანასწორი და პირდაპირი საარჩევნო უფლების საფუძველზე ფარული კენჭისყრით, 5 წლის ვადით. ამავე მუხლში 2006 წელს ცვლილებები გახორციელდა და IX პუნქტად ჩაიწერა, რომ პრეზიდენტის მორიგი არჩევნები პრეზიდენტის უფლებამოსილების ვადის ამოწურვის კალენდარული წლის ოქტომბერში ტარდება.
მოქმედი კონსტიტუციის მიხედვით, საქართველოში მომდევნო საპრეზიდენტო არჩევნები 2013 წლის ოქტომბერში გაიმართება.
