24
მარტიდღის ზოგადი ასტროლოგიური პროგნოზი
ჩვენ გადავწყვიტეთ, რომ ხელი არ ვახლოთ პრეზიდენტის არც ერთ უფლებამოსილებას მისი ვადის ამოწურვამდე, ყველა კომპეტენცია დავუტოვოთ ხელუხლებლად, გარდა ერთისა - ერთპიროვნულად ვერ შეცვალოს საქართველოს მთავრობა ქართველი ხალხის ნების გარეშე, - ამის შესახებ საქართველოს პარლამენტის თავმჯდომარე დავით უსუფაშვილმა პრესკონფერენციაზე განაცხადა.
პარლამენტის თავმჯდომარე გამოეხმაურა პრემიერის ინიციატივას პარლამენტის დათხოვნის ვადების შემცირებასთან დაკავშირებით. უსუფაშვილის თქმით, ამის თაობაზე საკონსტიტუციო ცვლილებების პროექტი პარლამენტში შევა, რომელიც უმრავლესობის მხრიდან იქნება ინიცირებული.
როგორც პარლამენტის თავმჯდომარემ აღნიშნა, პრემიერ-მინისტრმა საკმაოდ დეტალურად განმარტა ამ ცვლილებების მიზეზი.
"მან ბრძანა, რომ არასდროს ყოფილა დაინტერესებული პოლიტიკური რევანშით, მაგრამ ჩვენ ვერც იმას დავუშვებდით, დაგვეხუჭა თვალი იმაზე, თუ რა ხდებოდა ამ ქვეყანაში ბოლო წლების განმავლობაში და რა სისტემა, რა რეჟიმი შეიქმნა "ნაციონალური მოძრაობის" და მისი ლიდერების მხრიდან. ამიტომ, ჩვენ არ და ვერ გავიზიარებდით იმ რჩევებს, რომ არჩევნების შემდგომ, 2-3 ოქტომბერსვე გვეთქვა, რომ მორჩა ყველაფერი, დავივიწყეთ ყველაფერი, აგერ არის დემოკრატიული უმცირესობა, რომელმაც ქვეყანა ააყვავა და ახლა ჩვენ აყვავებულ ქვეყანას უნდა გავუძღვეთ წინ. ამიტომ, გარკვეული დრო დასჭირდა, რომ ბევრი რამ გამხდარიყო აშკარა, მტკიცებულებებით გამყარებული, როგორც ქართველი ხალხის, ასევე საერთაშორისო თანამეგობრობისთვის. ჩვენ მივიჩნევთ, რომ ეს ეტაპიც დასრულდა, ანუ რეჟიმი, სისტემა სრულად არის გამომზეურებული და ასე ვთქვათ, გაშიშვლებული. ამ ყველაფერმა კი თავი მოიყარა 2004 წლის იმ საბედისწერო საკონსტიტუციო ცვლილებთან დაკავშირებულ საკითხებში. საბედისწერო იმიტომ, რომ იმ ცვლილებებმა ააცდინა გზას "ნაციონალური მოძრაობა" და მისი ლიდერი, რომელიც დიდი ენთუზიაზმით და დიადი გეგმებით მოვიდა სათავეში", - განაცხადა უსუფაშვილმა.
პარლამენტის თავმჯდომარის თქმით, ერთ კაცს, პრეზიდენტს, კონსტიტუციურად ეძლევა უფლება იგნორირება გაუკეთოს მოსახლეობის ნებას, "რომელიც ორიოდე თვის წინ იყო გამოხატული".
"თუ ამ ცდუნებას ვერ გაუძლებდა პრეზიდენტი და ჩათვლიდა, რომ ეს იყო საჭირო და ერთადერთი გამოსავალი სრული პოლიტიკური გაკოტრებისგან თავის დასაცავად, თუ ამ ნაბიჯს გადადგამდა, ამას მოჰყვებოდა პროცესები, პირველ რიგში ქართველი ხალხის მხრიდან",-განაცხადა უსუფაშვილმა.
მისი თქმით, კოალიციამ გადაწყვიტა "ნაციონალური მოძრაობის" ლიდერები შეაჩეროს "არასწორ გზაზე და არ დაუშვას პოლიტიკური კრიზისი".
"აქედან გამომდინარე, პარლამენტი მზადაა მოიხსნას იმუნიტეტი პარლამენტის 6 თვიანი დათხოვნის შეზღუდვის შესახებ. თუ პრეზიდენტი გადაწყვეტს, რომ მაინც რაიმე ხდება ქვეყანაში, მან საქართველო უნდა იხსნას და მთავრობა შესაცვლელია, ჩვენ ვეთანხმებით, ოღონდ, ეს უნდა მოხდეს პარლამენტის დათხოვნით და ახალი არჩევნების ჩატარების გზით - მოქმედი მთავრობისა და არა პრეზიდენტის მიერ შეთავაზებული მთავრობის პირობებში. ჩვენ "ნაციონალურ მოძრაობას" და პრეზიდენტს ვეუბნებით- თუ ამაზე წამსვლელები ხართ, კი ბატონო. ვნახოთ ვინ დარჩება მოგებული და ვინ წაგებული პოლიტიკურად",-განაცხადა უსუფაშვილმა.
