4
ივნისიდღის ზოგადი ასტროლოგიური პროგნოზი
საქართველოს განვითარების კვლევითი ინსტიტუტის საბჭოს თავმჯდომარის, გია ხუხაშვილის თქმით, მიხეილ სააკაშვილის ხელისუფლებისა და ბიზნესის ურთიერთობაში კრიმინალური სქემები მოქმედებდა.
როგორც ხუხაშვილმა დღეს გამართულ პრესკონფერენციაზე განაცხადა, ბოლო ორი თვის განმავლობაში კვლევითმა ინსტიტუტმა სააკაშვილის ხელისუფლებისა და ბიზნესის ურთიერთობის ანატომია შეისწავლა და ამ ურთიერთობაში სამი კრიმინალური სქემა გამოავლინა.
"ბიზნესებს აიძულებდნენ არაპროფილური ხარჯების გაწევას, სხვადასხვა პროექტებში ფულის ჩადებას. ბიზნესიდან თანხები ქეშით სხვადასხვა სალაროებში პირდაპირ მიედინებოდა. ხდებოდა პირდაპირი ინტეგრაცია ბიზნესში წილების გადანაწილების კუთხით. სქემები ეწყობოდა პროკურატურის მეშვეობით. "ხორცის მანქანაში" ბიზნესის გატარების მექანიზმი იყო პროკურატურა. ეს იყო მთლიანად დანაშაულებრივი სისტემა. ამას მე დავარქმევდი კოლექტიურ სააკაშვილს. ეს იყო გარყვნილი და გაფუჭებული რეჟიმი", - აღნიშნა ხუხაშვილმა.
მისივე თქმით, ბიზნესში პოლიტიკური კომპონენტი ზეგავლენას ახდენდა ფასწარმოქმნაზე და ახლა ბაზარზე პროდუქტების გაიაფება სწორედ პოლიტიკური კომპონენტის "ამოგდებით" არის გამოწვეული.
გია ხუხაშვილის განცხადებით, კვლევის შედეგად ბევრი ფაქტობრივი მასალა დაგროვდა, თუმცა კვლევითი ინსტიტუტი მასალების გამოქვეყნებას არ აპირებს.
"თუ "ნაციონალური მოძრაობა" კონტრარგუმენტებს მოიყვანს, არ მიიღონ ქართული "ვიკილიქსი", ასეთ შემთხვევაში შესაძლოა, მასალების ნაწილი გასაჯაროვდეს", - აღნიშნა ხუხაშვილმა.
მისივე თქმით, კვლევის შემაჯამებელი დოკუმენტი ხელისუფლებას, საერთაშორისო ორგანიზაციებსა და საელჩოებს გაეგზავნებათ.
