28
მაისიდღის ზოგადი ასტროლოგიური პროგნოზი
"ნაციონალური მოძრაობის" გენერალური მდივანი ვანო მერაბიშვილი საქართველოს მთავრობას ტარიფებთან დაკავშირებით ხალხის მოტყუებაში ადანაშაულებს.
როგორც მერაბიშვილმა დღეს გამართულ ბრიფინგზე განაცხადა, ქართველ ხალხს ტარიფებთან დაკავშირებით უკეთესი მოლოდინი ჰქონდა, ვიდრე მთავრობა სთავაზობს.
"ორთვიანი გათვლების შემდეგ საქართველოს მთავრობამ განაცხადა, რომ ის აპირებს დენის ტარიფის შემცირებას პირველი და მეორე კატეგორიის მომხმარებლებისთვის 3,54 თეთრით. მე ელემენტარული გათვლები გავაკეთე. საქართველოს მოსახლეობის თითქმის 40% ანუ 500 000 ოჯახი დღეს არის პირველ კატეგორიაში, ანუ 100 კილოვატამდე ელექტროენერგიას ხარჯავს და იხდის შესაბამის ანაზღაურებას. თვეში ასეთი ოჯახისთვის ახალი მთავრობის რეფორმით გაკეთდება ეკონომია 3 ლარი და 54 თეთრით. ეს არის მოტყუება ქართველი ამომრჩევლის. დარწმუნებული ვარ, ქართველ ხალხს არ ჰქონდა ასეთი მოლოდინი მთავრობის გეგმებთან დაკავშირებით. ცნობისთვის, ჯერ კიდევ არჩევნებამდე ჩვენმა მთავრობამ შეიტანა პარლამენტში კანონპროექტი, რომელიც ითვალისწინებდა სხვა შეღავათებთან ერთად სოფლის პროგრამას, საყოველთაო დაზღვევის პროგრამას, თითოეული ოჯახისთვის 1000-ლარიანი ვაუჩერების გადაცემას.
პრაქტიკულად დეკემბერში 1000 ლარიანი ვაუჩერი ყველა ოჯახს ექნებოდა. თუ ამ ვაუჩერს გადავთვლიდით თითო თვეზე, თითო ოჯახი მიიღებდა 23 ლარ შეღავათს. მე მინდა ყველამ შეადაროს 23 ლარი 3,54 თეთრთან", - განაცხადა ვანო მერაბიშვილმა.
მისივე თქმით, შემცირებული თანხა არ არის გათვალისწინებული ბიუჯეტში და არც ბიძინა ივანიშვილი აპირებს ამ თანხის საკუთარი ჯიბიდან გადახდას. "ეს მოჩვენებითი შეღავათი ხორციელდება საქართველოს ენერგეტიკის და ჩვენი მომავლის ხარჯზე", - განაცხადა მერაბიშვილმა.
ამასთან, "ნაციონალური მოძრაობა" გამოდის ინიციატივით, რომ იანვრის ბოლოს ჩატარდეს დიდი კონფერენცია ენერგეტიკულ საკითხებზე, რომელზეც მთავრობის წევრებსაც იწვევს.
"ჩვენ მოვიწვევთ საქართველოში არსებულ ენერგეტიკის ყველა სპეციალისტს. მოვიწვევთ მთავრობის წევრებსაც, რათა დაესწრონ ამ კონფერენციას და ყველა მხარემ, არასამთავრობო ორგანიზაციებმა და ყველა დაინტერესებულმა პირმა ერთად ვიმსჯელოთ ენერგეტიკის მომავალზე. საქართველოს ენერგეტიკა და ეკონომიკა არ არის მხოლოდ ერთი და ორი პარტიის გადასაწყვეტი, ეს სრულიად საქართველოს გადასაწყვეტია. ამიტომ, ჩვენ აუცილებლად ვიმსჯელებთ ამ საკითხებზე ქართველ და უცხოელ ენერგეტიკოსებთან ერთად. ჩვენ გავაკეთებთ ყველაფერს, რომ საქართველოს ენერგეტიკას ჰქონდეს მომავალი და რეალური სარგებელი მიიღოს ამისგან მოსახლეობამ", - განაცხადა მერაბიშვილმა.
