რობერტ პატინსონი: "მეჩვენებოდა, რომ ყველა მითვალთვალებდა, და ასეც ყოფილა"

"ბინდის" ახალი ნაწილის გამოსვლის შემდეგ რობერტ პატინსონის პოპულარობა კიდევ უფრო გაიზარდა. განსაკუთრებით მას მერე ალაპარაკდნენ მასზე, რაც კრისტენ სტიუარტთან მომხდარ კონფლიქტს მთელი მსოფლიო ადევნებდა თვალს. საბოლოოდ შეყვარებულს ღალატი აპატია, შეურიგდა და როგორც ამბობენ, უკვე დაქორწინებასაც აპირებენ.

- ამ ფილმმა თქვენი ცხოვრება შეცვალა, ასე არ არ­ის?

- სამსახიობო გუნდიდან ბევრს შეუძლია ამის თქმა. მეც ვაცნობიერებ, რომ ეს ჩემი ვარსკვლავური როლია. ალბათ მომენატრება კიდეც ჩემი პერსონაჟი. მაგრამ, მეორე მხრივ, რუტინა არ მიყვარს და დიდი ხანია, სიახლეებს ველი. იმედი მაქვს, ცხოვრება სხვა, არანაკლებ საინტერესო პროექტებსაც მიმზადებს. იღბალს ჯერ არ უმტყუნებია ჩემთვის.

- მოგიხდათ რაიმეს გაწირვა ამ სურათის გამო?

- კი, კბილები გამოვიცვალე. ყველა არა, მაგრამ მაინც. საერთოდ, უწინდელები უფრო მომწონდა, მაგრამ წარმატებული კარიერისთვის რას არ გააკეთებ. კიდევ, მომიხდა სხეულზე ზედმეტი ბეწვეულის მოსპობა - ასეთი გამოცდილება ადრე არ მქონია! საკმაოდ უცნაური შთაბეჭდილებაა. რასაკვირველია, ეს ერთი და იგივე არ არის, მაგრამ ახლა უკვე წარმომიდგენია, როგორი მამაცები არიან ის გოგონები, რომლებიც იძულებული არიან გამუდმებით იარონ ეპილაციაზე.

- რომ შეგძლებოდათ, სცენარში რას დაამატებდით?

- მაგარი იქნებოდა, მე და ბელა (კრისტენ სტიუარტის გმირი) რომ გავყრილიყავით, როგორც მისტერ და მისის სმიტები - ანჯელინა ჯოლისა და ბრედ პიტივით. მაყურებელს ეს მოეწონებოდა.

- სხვა პროექტშიც რომ შემოგთავაზონ ვამპირის როლი?

- ეს უკვე არ მაინტერესებს. ისედაც დიდხანს ვგრძნობდი თავს უკვდავად, ახლა გაცილებით ნაკლებად დაცული პერსონაჟების განსახიერება მინდა, რომლებიც თავიანთი სიცოცხლის გადასარჩენად იბრძვიან.

- ამჟამად ლოს-ანჯელესში ცხოვრობთ და გახმაურებულ ფილმებში თამაშობთ. შეგიძლიათ თქვათ, რომ ეს არის ის, რისკენაც მიისწრაფოდით?

- ყველაფერი თავისთავად მოხდა ასე, ჩემი მხრიდან რაიმე ძალისხმევის გამოჩენის გარეშე. თუმცა, რასაკვირველია, ჰოლივუდურ კინოზე გავიზარდე და ის ევროპულზე მეტად მომწონდა. მახსოვს, 14 წლისას მინდოდა რემბო გავმხდარიყავი - სტალონეს გმირი ჩემი კერპი იყო.

- მშობლიური ინგლისი თუ გენატრებათ?

- ყველაზე მეტად ინგლისის არომატი მენატრება. ასეთი სურნელი არც ერთ სხვა ქვეყანას არ აქვს. ეს ძნელი ასახსნელია, მაგრამ ნებისმიერ ქალაქს სწორედ სუნით აღვიქვამ. თვალდახუჭული შემიძლია მივხვდე, სად ვარ - საკმარისია ჰაერი ჩავისუნთქო.

- მშობლებს ხშირად ხედავთ? რას ფიქრობენ თქვენს პოპულარობაზე?

- სამწუხაროდ, იშვიათად ვხედავ და მინდა გამოვსწორდე. ოჯახი ამაყობს ჩემი მიღწევებით. თუმცა ვაღიარებ, ჩემი დამსახურება აქ ნაკლებია - უბრალოდ, მაგრად გამიმართლა.

- პლანეტის ერთ-ერთ ყველაზე გავლენიან ადამიანად დაგასახელეს. რა განცდაა?

- სასაცილოც კია ამის მოსმენა. ვერ წარმომიდგენია, როგორ უნდა ვისარგებლო ამ ხმაურიანი ტიტულით. თუ ასეთი მნიშვნელოვანი პერსონა ვარ, გამოდის, აშშ-ის პრეზიდენტს შემიძლია დავურეკო და მასზე გავლენა მოვახდინო? ჩემს ძაღლთანაც კი არ მაქვს ავტორიტეტი! 22 წლის ვიყავი, როცა გადასაღებ მოედანზე მკითხეს აზრი რაღაცასთან დაკავშირებით და გავოგნდი, ნუთუ ადამიანებს მართლა აინტერესებთ, რას ვფიქრობ?

- თქვენი მენეჯერი ყოველთვის აფრთხილებს ჟურნალისტებს, რომ პირად ცხოვრებაზე არ უნდა გკითხონ. რა საჭიროა ეს? ისედაც ყველამ იცის, რა ხდება თქვენს პირად ცხოვრებაში?

- მართლაც, უარს ეუბნება გამოცემებს, თუ წინასწარ იცის, რომ ისინი მეტისმეტად აქტიურად დაინტერესდებიან ისეთი ამბებით, რაც არავის ეხება. რა საჭიროა ამის განხილვა. ჩემი მონაწილეობით ფილმები ისედაც პოპულარულია, საკმარისად მაქვს ახალი წინადადებებიც - რა საჭიროა საკუთარი თავისადმი მეტი ყურადღების მიპყრობა. თაყვანისმცემლებიც საკმაოდ ხმამაღლა ყვირიან ჩემს დანახვაზე.

- რა გაკლიათ?

- საგის გადაღების პირველ პერიოდში ვფიქრობდი, რომ გავგიჟდი: მეგონა, რომ გამუდმებით მითვალთვალებდნენ. მერე კი გაირკვა, რომ მართლაც ასე იყო. როცა მინდა სადმე კარგ რესტორანში წასვლა ან სეირნობა, რამდენჯერმე ვეკითხები თავს, მზად ვარ თუ არა, უამრავი ადამიანის სამიზნე გავხდე და როგორც წესი, სურვილი მიქრება. ხანდახან ვოცნებობ, უჩინარი გავხდე - ანუ სრულიად ჩვეულებრივი ადამიანი. არაპოპულარობა ხშირად მენატრება. ალბათ ამიტომაც მიყვარს მოტოციკლით სეირნობა - მუზარადში ვერ მცნობენ.

GRAZIA

ჟურნალი "რეიტინგი"

(გამოდის ორშაბათობით)