თავდაცვის მინისტრი ირაკლი ალასანია მთავრობისთვის ახალი თვითმფრინავის შეძენის შესახებ გავრცელებულ ინფორმაციას უარყოფს.
ჟურნალისტების კითხვაზე, შეესაბამება თუ არა სიმართლეს "ნაციონალური მოძრაობის" წარმომადგენლების მიერ გავრცელებული ინფორმაცია, ირაკლი ალასანიამ განაცხადა, რომ ეს ტყუილია. მინისტრს დამატებითი განმარტებები არ გაუკეთებია. მან ასევე თავი შეიკავა პრეზიდენტის ფრენების შესახებ ინფორმაციაზე "საიდუმლო" გრიფის მოხსნის კომენტირებისგან.
როგორც უმცირესობის წევრმა, დეპუტატმა ირმა ნადირაშვილმა დღეს გამართულ პრესკონფერენციაზე განაცხადა, არსებობს დადასტურებული ინფორმაცია, რომ 16-21 დეკემბერს თავდაცვის მინისტრი ირაკლი ალასანია საფრანგეთში აგზავნის ვინმე ედუარდ გოგიაშვილს, მთავრობისთვის ახალი თვითმფრინავის შესაძენად. მისივე თქმით სამწუხაროა, რომ საქართველოს თავდაცვის სამინისტრომ მოხსნა გრიფი "საიდუმლო" პრეზიდენტის ფრენებს და გამოაქვეყნა სქემა, როგორც "რაღაც დანაშაულებრივი დოკუმენტი".