30
მაისიდღის ზოგადი ასტროლოგიური პროგნოზი
საპატრიარქოს რეკომენდაციით, ყოფილი სამხედრო სოსო ღუზარაული პრეზიდენტმა შეიწყალა. პატიმრობიდან გათავისუფლებული ყოფილი სამხედრო "ინტერპრესნიუსთან" საუბრისას აცდებს, რომ პირადად ბაჩო ახალაიამ, გიგი კალანდაძემ და დავით ჭაკუამ 2010 წელს ქუთაისში დააკავეს, შინაგან საქმეთა სამინისტრომ კი გაავრცელა ინფორმაცია, თითქოს პანკისის ხეობაში აიყვანეს.
სოსო ღუზარაულს ბრალი იარაღის უკანონო შეძენა-შენახვისთვის წაუყენეს, თუმცა ყოფილი სამხედრო ამბობს, რომ მისი დაკავება სხვა მიზნით მოხდა.
"ვმუშაობდი ეროვნულ სასწავლო ცენტრ კრწანისში, ინსტრუქტორების ჯგუფის უფროსად. ამიყვანეს ქუთაისში, სადაც ჩემს დაკავებას უშუალოდ ბაჩო ახალაია, გიგი კალანდაძე და დავით ჭაკუა ხელმძღვანელობდნენ. იარაღის უკანონო შეძენა-შენახვას რაც შეეხება, ეს ბოლო ეტაპი იყო, მანამდე სხვადასხვა ბრალდებები განიხილებოდა ჩემს მიმართ. ვერც ერთი ბრალდება ვერ დამიდასტურეს და იარაღის შენახვისთვის წამიყენეს ბრალი. არ უარვყოფ, იარაღი მქონდა, რომელიც დროის უქონლობის გამო ვერ გადავიფორმე, თუმცა ამის შესახებ მანამდეც ყველამ იცოდა. დაკავების შემდეგ შსს-მ გაავრცელა ინფორმაცია, თითქოს პანკისში ამიყვანეს და იარაღით ვაჭრობასთან ვიყავი დაკავშირებული. ეს მაფიქრებინებს, რომ სერიოზული რაღაც ჰქონდათ ჩაფიქრებული, რაც ვერ დაადასტურეს და ბოლოს იარაღის შენახვის თემით გადაწყდა ჩემი გასამართლება", - განაცხადა ღუზარაულმა.
მისი თქმით, ბაჩო ახალაია ქვედანაყოფების საქმიანობაში უშუალოდ ერეოდა და დანიშვნების საკითხებს გაერთიანებული შტაბის ნაცვლად, თვითონ წყვეტდა.
"თანამდებობრივ ჩარჩოებს აბსოლუტურად ყველა ხელმძღვანელი პირი სცდებოდა. ის, რა ხმებიც სამხედროების მოპყრობასთან დაკავშირებით ვრცელდება, სიმართლეა, თუმცა დოკუმენტურად დადასტურება ძნელია, რადგან სამხედროებს ვიდეოგადაღება და ტელეფონის გამოყენება აკრძალული ჰქონდათ", - აცხადებს ღუზარაული.
სოსო ღუზარაულმა ბაჩო ახალაიას თავდაცვის მინისტრობისას უმწიკვლობის ორდენი მიიღო. მისი თქმით, საქმის ხელახალი გამოძიებისთვის, პროკურატურას უკვე მიმართა და სამართლიანობის აღდგენის შემთხვევაში, თავდაცვის სამინისტროში დაბრუნება სურს.
