გივი თარგამაძე - ნანა კაკაბაძის მიერ პოლიტპატიმრების სიის შედგენა პაპუასობაა!

უმცირესობის წევრი გივი თარგამაძე ადამიანის უფლებათა დამცველ ნანა კაკაბაძეს პოლიტპატიმართა და პოლიტდევნილთა სიის შედგენისას შერჩევით მიდგომებსა და ქრთამის აღებაში ადანაშაულებს.

"მე თუ მკითხავთ, ეგ სიები უნდა დახიო და გადაყარო! ვინ დააწესა, რომ ეკა ბესელია და ნანა კაკაბაძე, რომელსაც რაღაც "ენჯეო" აქვს, რაღაც სტატუსებს ადგენენ?! ამათ ვინ ეკითხება, ან რომელი კანონის მიხედვით მოხდა ეს ყველაფერი? უბრალოდ, მოვიდა ახალი ხელისუფლება და ასე გადაწყვიტა - ეს რა, რევოლუციაა, თუ რა ხდება?!... ჩემი თვალთახედვით, პოლიტიკა აქ საერთოდ არაფერ შუაშია. თავშია ფული, რომელსაც, დარწმუნებული ვარ, იღებდა ნანა კაკაბაძე და ვერ ვამტკიცებ, მაგრამ ალბათ, იღებდა ეკა ბესელიაც. მაგათ ახლა ხომ ისე აქვთ საქმე აწყობილი პროკურატურაში, რომ ერთი კაცი იტყვის ერთ სიტყვას და მორჩა", - ამბობს თარგამაძე გაზეთ "ვერსიასთან" ინტერვიუში.

როგორც უმცირესობის წევრი აცხადებს, სიაში ერთ-ერთი ადამიანი, ზვიად ბერაძე კაკაბაძის ძმასთან მეგობრობის წყალობით მოხვდა.

"რა შუაშია ერთი ცალი "ენჯეოს" აზრი, არ მესმის! ჩახედეთ სიაში მეშვიდე ნომერს - ზვიად ბერაძე არის ადამიანი, რომელიც კაცისკვლაზე წავიდა, უბრალოდ ის კაცი, შემთხვევით, ცოცხალი გადარჩა. როგორც ნანა კაკაბაძემ განაცხადა, მისი ამ სიაში შეყვანის ერთადერთი საფუძველი ისაა, რომ ჩემი ძმის მეგობარია და ეს საკმარისიაო! ზუსტად ასეა და ჰკითხეთ კაკაბაძეს, რატომაა ეს ადამიანი სიაშიო. სხვას უბრალოდ ვერაფერს გიპასუხებთ. ამ სიაში ისეთი გვარები წერია, რომლებიც მე, უბრალოდ, არ ვიცი, ვინ არიან! ახლა ავდგები, ასეთივე სიას გავაკეთებ, ყველას მივაწერ, რომ მათ ნანა კაკაბაძე ფულს სძალავდა და შევიტან ამ სიას პარლამენტში. მერე ამით რა, შეიცვლება რამე?", - ამბობს პარლამენტარი.

მისი თქმით, ეს პროცესი საზოგადოების მოთხოვნით არ დაწყებულა.

"ეს საზოგადოების მოთხოვნა არ არის - არ არსებობს! მაშინ რატომ არ იყვნენ ამ პროცესში "კონსტიტუციის 42-ე მუხლი" და "ახალგაზრდა იურისტთა ასოციაცია" - რა, მათ ნაკლები ინტერესი აქვთ საზოგადოების მოთხოვნისადმი? ნანა კაკაბაძეს არც არავინ იცნობს და ფეხზე ჰკიდია მთელ საზოგადოებას! მარტო იმის გამო, რომ ამათ ხელისუფლებაში მოსასვლელად ემსახურა, ახლა გახდა რაღაცის გადამწყვეტი? მართლა პაპუასები ვართ? ნანა კაკაბაძის მიერ გადაწყვეტილების მიღება საქართველოში მართლა პაპუასობაა!"

5 დეკემბერს საქართველოს პარლამენტმა "პოლიტიკური ნიშნით დაპატიმრებულ და პოლიტიკური ნიშნით დევნილ პირთა თაობაზე" დადგენილების პროექტი დაამტკიცა. დადგენილებით, ადამიანის უფლებათა დაცვისა და სამოქალაქო ინტეგრაციის კომიტეტის მიერ დამტკიცებული სიების შესაბამისად იმ პირთა სია დგინდება, რომლებიც პოლიტიკური ნიშნით დაპატიმრებულ და პოლიტიკური ნიშნით დევნილ პირებად მიიჩნევიან. "პოლიტიკური ნიშნით დაპატიმრებულ და დევნილ პირთა თაობაზე" დადგენილების პროექტი დეპუტატებს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელიამ გააცნო.

პოლიტპატიმრის სტატუსი - 190-ს, პოლიტდევნილის სტატუსი კი 25 პირს მიენიჭა.