შსს-მ გია ლორთქიფანიძის ფოტოსურათით ყალბი პასპორტი აღმოაჩინა

შინაგან საქმეთა სამინისტრომ ყალბი დოკუმენტის დამზადება-გამოყენებისა და საზღვრის უკანონო გადაკვეთის მცდელობის ფაქტზე დაწყებული სისხლის სამართლის საქმის ფარგლებში კიდევ ერთი საეჭვო წარმომავლობის პასპორტი და პირადობის მოწმობა მოიპოვა, - ამის შესახებ შსს-ს განცხადებაშია ნათქვამი.

სამინისტროს ინფორმაციით, საბუთები გაცემულია გოჩა წერეთლის სახელზე, თუმცა, მათში განთავსებულია შინაგან საქმეთა მინისტრის ყოფილი მოადგილის, თბილისის მერიის დაცვის სამსახურის უფროსის მოადგილე გიორგი ლორთქიფანიძის ფოტოსურათი.

"გამოძიებამ მოწმის სახით დაკითხა გიორგი ლორთქიფანიძე, რომელმაც დაადასტურა, რომ დასახელებული პასპორტი და პირადობის მოწმობა, მართლაც იყო მის განკარგულებაში გარკვეული დროის განმავლობაში. მანვე გამოძიებას განუმარტა, რომ ანალოგიური პასპორტები, სხვისი დემოგრაფიული მონაცემებით, შესაძლოა, ჰქონდეთ შინაგან საქმეთა სამინისტროს სხვა თანამშრომლებსაც. საქმეზე მოწმის სახით დაიკითხა ივანე მერაბიშვილის დაცვის წევრი ვანო ტუღუში, რომელმაც აღნიშნა, რომ 2012 წლის 30 ნოემბერს, თბილისის საერთაშორისო აეროპორტში ივანე მერაბიშვილს ორი პასპორტი გადასცა. გამოძიება გრძელდება", - ნათქვამია შსს-ს განცხადებაში.

"ინტერპრესნიუსი"