4
ივნისიდღის ზოგადი ასტროლოგიური პროგნოზი
იუსტიციის მინისტრი და მთავარი პროკურორი პოლიტიკური შინაარსის განცხადებებს არ უნდა აკეთებდნენ, - ამის შესახებ "ქართული ოცნების" წევრმა, დეპუტატმა, ზვიად ძიძიგურმა რადიო "პალიტრის" გადაცემა "რეზიუმეს" ეთერში განაცხადა.
მისი თქმით, იუსტიციის მინისტრმა თეა წულუკიანმა და მთავარმა პროკურორმა არჩილ კბილაშვილმა უნდა დაივიწყონ, რომ არიან პოლიტიკოსები, განსაკუთრებით იმ მიმართულებაზე, რა მიმართულებასაც ისინი ახლა სათავეში უდგანან.
"მათ მხოლოდ კანონის, მშრალი კანონის მიხედვით უნდა გასცენ პასუხი საზოგადოებას და თავიანთ ემოციურ დამოკიდებულებას არ უნდა ამჟღავნებდნენ არავის მიმართ. ეს არ არის სწორი და ეს მითქვამს შიდა წრეშიც. არ არის იუსტიციის მინისტრის და მთავარი პროკურორის საქმე პოლიტიკური განცხადებების და შეფასებების კეთება", - აღნიშნა ძიძიგურმა.
მისი თქმით, როდესაც საუბარია იმაზე, რომ არ უნდა ირღვეოდეს ადამიანის უფლებები, ეს მართლა არ უნდა ხდებოდეს. ძიძიგურის განცხადებით, მან ტელევიზიით ნახა, როგორ მიჰყავთ დაპატიმრებული კახა გეწაძე.
"მიმაჩნია, რომ ეს არის ადამიანის უფლებების დარღვევა. ჩემთვის არ აქვს მნიშვნელობა იმას, კახა გეწაძე "ნაციონალური მოძრაობის" წევრი იყო, თუ რას აკეთებდა, არავითარი მნიშვნელობა არ აქვს. რომ გამართლდეს ის კაცი, მისი ღირსება ხომ არის შელახული. დავუშვათ არ გამართლდა და დამნაშავეა, მას თავისუფლების აღკვეთას მიუსჯიან და არა ღირსების შელახვას. არ გვინდა ღირსებაზე შეხება", - განაცხადა ძიძიგურმა.
უმრავლესობის წევრმა გაიხსენა წინა ხელისუფლების პერიოდში ბონდო შალიკიანისა და აკაკი ჩხაიძის დაპატიმრების კადრები. "ასეთი დაპატიმრებების კადრების გავრცელება წინა ხელისუფლებას სჭირდებოდა იმისთვის, რომ საზოგადოების ერთგვარი ფსიქოლოგიური დათრგუნვა მოეხდინა. ეს არაფერში სჭირდება დღეს ბიძინა ივანიშვილის ხელისუფლებას. რა, ჩვენი მხრიდან რაღაც პროპაგანდისტული ნაბიჯია დაპატიმრებები?! ეს არაფერში გვჭირდება", - განაცხადა ძიძიგურმა.
როგორც მან აღნიშნა, ახალ ხელისუფლებაში ძალიან ბევრია ისეთი, რომლებმაც ოპოზიციაში ყოფნის პერიოდში ბევრი დამცირება და შეურაცხყოფა გადაიტანეს. აქედან გამომდინარე, ძიძიგური აუცილებლად მიიჩნევს, რეკომენდაციები შემუშავდეს, რომ არ არის საჭირო არავითარი დაპატიმრებების კადრები.
