18
ივნისიდღის ზოგადი ასტროლოგიური პროგნოზი
მოსკოვში მცხოვრებმა ქართველმა მომღერალმა და წამყვანმა აჩი ფურცელაძემ ლამის მთელი რუსეთი და საქართველო აალაპარაკა - რუსულ ტელეპროექტ "ვოისის" პირველ ტურში მის შთამბეჭდავ იმპროვიზებულ ნამღერ "სამართაიმს" - ჟიურისა და მაყურებლის აღფრთოვანება, სიმღერისას ექსპრომტად ჩართულ ქართულ "ჩიტო-გვრიტოს" და ხატულას (აჩის დედის სახელი) ხსენებას, სიმღერის შემდეგ კი სიამაყით ნათქვამს: "მე აჩი, ჩელავეკ უდაჩი მქვია და ქართველი ვარ, თბილისიდან", - ქართველი გულშემატკივრის სიხარულისა და სიამაყის ცრემლი მოჰყვა.
აჩის საკონცერტო დარბაზშიც დიდხანს უკრავდნენ ტაშს, ჟიურის ერთ-ერთ წევრს, ცნობილ კომპოზიტორსა და როკშემსრულებელს, ალექსანდრე გრადსკის კი უნებლიეთ აღმოხდა კიდეც, - ძლივს არ გავიგონე მონატრებული... - შეყოყმანდა, თითქოს ქართველობასთან დაკავშირებული რაღაც თბილი სიტყვები უნდოდა ეთქვა, და დააყოლა, - მელოდიაო. აჩიმ ექსპრომტად ჟიურის წევრების ამღერებაც კი მოახერხა ეთერში. დიმა ბილანს დღემდე ადარდებს, რატომ დროულად არ დავაჭირე ღილაკს თითი და არ შემოვბრუნდიო, ლეონიდ აგუტინს კი ძალიან სწყდება გული, მისი და პელაგიას რჩეული აჩი მომღერალ პელაგიას რომ დარჩა - აჩიმ აქაც იქართველა: მამაკაცი ვარ და ასეთ დროს აუცილებლად მანდილოსანს მივანიჭებ უპირატესობასო, რასაც მოჰყვა აგუტინის შეძახილი: ჭეშმარიტად ქართული ნათქვამიაო! პირველ წარმატებას მეორე ტურის რინგზე გამარჯვება და კვლავ საქებარი სიტყვები დაერთო და ჩვენც დავინტერესდით, რა ხდებოდა აჩის თავს ტელეეთერის მიღმა მას შემდეგ, რაც ჟიურის წევრებმა და საზოგადოებამ გაიცნეს და პელაგიას "აღსაზრდელი" გახდა.
აჩი ფურცელაძე:
- მეორე ტურში, რინგზე, სადაც თითო გუნდის ორ-ორი მომღერალი მღერის დუეტს, "ვოისის" პრინციპის მიხედვით, საშემსრულებლო სტილი შეგვიცვალეს. მე და ჩემს პარტნიორს როკი უნდა გვემღერა, არადა, როკი არასდროს მიმღერია. ეს არ არის ჩემი მუსიკა.
- თუმცა კარგად მოიხდინე.
- გეთანხმები, მოვირგე და ამაში ჟიურის წევრთა და ტელეპროექტის ორგანიზატორთა კეთილგანწყობაც დამეხმარა. ამდენ შემსრულებელში მე აღმოვჩნდი ყველაზე "ნაგლი", რომელიც შემოქმედებითი კოლექტივის ელიტას საკუთარ ინიციატივებს სთავაზობს. თვით პირველი არხის მუსიკალური რედაქტორი იური აქსიუტა, რომელიც კონსტანტინ ერნსტის (პირველი არხის გენერალური დირექტორი - ი.ხ.) შემდეგ უმთავრესი პერსონაა ტელევიზიაში და "რუხ კარდინალსაც" კი უწოდებენ, რატომღაც ძალიან კარგი თვალით მიყურებს. აქსიუტამ ისიც თქვა, - აჩის რომელ იდეასაც მიზანშეწონილად მივიჩნევ, აუცილებლად განვახორციელებინებო. სწორედ იმპროვიზაციების წყალობით, ოქსანა პეტროვასთან ერთად მეორე ტურშიც ძალიან ორიგინალური ნომერი გამოვიდა. თვითონაც ვისიამოვნეთ, მაყურებელმაც და ჟიურიც კმაყოფილი დაგვრჩა. ბილანის და აგუტინის მხარდაჭერა არ გამკვირვებია, მაგრამ გამაოცა და გამახარა გრადსკის მხარდაჭერამ. აგუტინმა სოსო პავლიაშვილს შემადარა: მასავით ენერგიულია, აჩი ერთია, მაგრამ ბევრი გეგონება, მთელ სივრცეს ავსებსო. საბოლოო სიტყვა მაინც პელაგიას ეკუთვნოდა და მანაც მე ამირჩია. ასე რომ, ჯგუფში უკვე სამნი დავრჩით და დეკემბრის დასაწყისისთვის, ანუ მესამე ტურისთვის ვემზადებით.
- თიკა კანდელაკის რესტორან "თინათინში" როგორღა მოხვდი?
- ახლობლებს, რომელთა შორის ერთი ქართველია, კლუბები და ქართული დასახელების რამდენიმე რესტორანი აქვთ და მიწვევენ ხოლმე საღამოების წამყვანად. საღამოები "თინათინშიც" წამიყვანია და რამდენიმე დღის წინ ამ რესტორნის ორი წლის იუბილეზეც მათ დამპატიჟეს, თუმცა არა წამყვანად. მათმა წარმომადგენელმა ნასტიამ მთხოვა, მივსულიყავი, - აგუტინმა უნდა იმღეროს "თინათინში" და შენი დანახვა გაუხარდება, თან მასთან ინტერვიუს ჩაწერაშიც დაგვეხმარები, "ვოისიდან" გამომდინარე დავწერთ: აგუტინი თავის ფავორიტ შემსრულებელთან ერთადო. მეც დავთანხმდი. ერთი თვეა, მოსკოვის "კომედი რადიოში" დავიწყე მუშაობა და ეთერის დამთავრებისთანავე წავედი იუბილეზე. ცოტათი მაგვიანდებოდა და ისე გავთავხედდი, ნასტიას ვთხოვე, ჩემს მოსვლამდე არ დაიწყოთ, და თუ პრობლემა შეგექმნათ, აგუტინს უთხარით, რომ მე მოვდივარ-მეთქი (იცინის). მართლაც გვიან დაიწყეს და მეც შევუერთდი. აგუტინმა სცენიდანვე შემნიშნა და შემომღიმა. ცოტა ხნით სუფრასთან დავჯექი, მერე კი სცენასთან ახლოს დავდექი და იქიდან ვგულშემატკივრობდი ლიონიას.
- საიუბილეო საღამოს, ალბათ, თინა კანდელაკიც ესწრებოდა. იცნობ?
- თინას ჯერ კიდევ იმ პერიოდში ვიცნობდი, "მეორე არხის" წამყვანი რომ იყო, მე კი რადიოს პირველ არხზე - შენი გადაცემის წამყვანი. ბევრი საერთო ახლობელიც გვყავს, ჟურნალისტ შალვა რამიშვილის ჩათვლით. თუმცა ერთი ამბავი დღემდე უხერხულად მახსენდება და კარგა ხანს მეგონა, ამის გამო თინა ვერ მიტანდა: კლიპის პრეზენტაცია მიმყავდა, თინა კი, უკვე რუსეთში პოპულარული, მოსკოვიდან ახალი ჩამოსული იყო თბილისში და შალვასთან ერთად იჯდა დარბაზში. ისე ხმამაღლა ლაპარაკობდნენ, სცენიდან მწარე რეპლიკა ვესროლე: მესმის, რომ მოსკოვის და თბილისის ჰავა განსხვავდება, მაგრამ მოსმენის კულტურა ყველგან ერთია-მეთქი! თინას აშკარად "გაუტყდა".
მას შემდეგ წლები გავიდა და ერთმანეთს ახლა, "თინათინის" დაბადების დღეზე შევხვდით. გვერდით მაგიდასთან იჯდა. მივედი, მივესალმე და, - აჩიკო არ ხარო? - მიცნო, თანაც აშკარად საქართველოდან ვახსოვდი, რაკი ასე მომმართა. გავისაუბრეთ და მივხვდი, ის ამბავი არც ახსოვდა, რადგან არ შეუხსენებია, სამაგიეროდ, "ვოისში" ჩემს გამოსვლებს ადევნებს, თურმე, თვალ-ყურს და თვითონაც და დედამისიც ჩემი დიდი გულშემატკივრები არიან. ცოტა ხანს ვისაუბრეთ, ბოლოს ერთმანეთს წარმატება ვუსურვეთ, ფოტოც გადავიღეთ და გულთბილად დავცილდით. კომედია ის იყო, რომ მთელი საღამოს განმავლობაში "აჩიკოს" მეძახდა, ბლოგზე კი ჩემთან ერთად ფოტოს რუსულად წააწერა: "დღეს არჩის შევხვდი. დედა ძალიან გულშემატკივრობს მასო". კინაღამ გავგიჟდი: რუსებს რომ ეშლებათ, კიდევ არაფერი, მაგრამ ქართველმა ხომ მაინც იცის, რომ აჩიკოა სახელი და არა - არჩიკო (იცინის).
- მესამე ტურში რას იმღერებ?
- ჩემი შეთავაზებული ვარიანტებიდან სტივ უანდერის "აი ჯასთ ქოლდ, თუ სეი, აი ლოვ იუ" დამიტოვეს. ძალიან მოვინდომებ, რომ რაღაც ორიგინალური მოვიფიქრო და ეს გამოსვლაც განსაკუთრებულად დაამახსოვრდეს მაყურებელსა და ჟიურის, ასე რომ, კვლავ ძალიან მაგარ ნომერს გპირდებით!
ირმა ხარშილაძე
ყოველკვირეული გაზეთი "ყველა სიახლე"
(გამოდის ოთხშაბათობით)
ასევე იხილეთ: აჩი ფურცელაძის არაჩვეულებრივი "ბლუზი" და საგზური Voice-ის მომდევნო ტურში
