ბიზნესმენი ჰესების წართმევაში გიგი უგულავას, ეკა შარაშენიძესა და ზურაბ ნოღაიდელს ადანაშაულებს

ბიზნესმენი თემურ ჭიჭინაძე ჩამორ­თმეული "ჟინვალჰესისა" და "ორთაჭალჰესის" დაბრუნებას ითხოვს:

- "ჟინვალჰესი" იჯარით 1994 წელს ავიღე. გავარემონტეთ, ჩაიდო ინვესტიციები, თბილისს ვამარაგებდით უფასო წყლითა და ელექტროენერგიით. სიამაყით აღვნიშნავ, რომ ამ პერიოდში ჩვენ გადავარჩინეთ ანანურის უნიკალური ციხესიმაგრე, რომელსაც საძირკველში წყალი ედგა და დანგრევის პირას იყო. მხოლოდ ამაში გადავიხადეთ 2 მილიონზე მეტი. როდესაც ხელისუფლებაში "ნაციონალური მოძრაობა" მოვიდა, "ახალგაზრდა რეფორმატორებმა" აიკვიატეს, რომ გაეყიდათ წყალი და გაეძვირებინათ ელექტროენერგია. 2005 წელს კი უკანონოდ ჩამოგვართვეს ქონება, რადგან იმ შემთხვევაში, თუ ჩვენ "ჟინვალჰესს" არ დავთმობდით, მათ ენერგეტიკაზე სრული კონტროლის საშუალება არ ექნებოდათ.

- "ჟინვალჰესის" ჩამორთმევაში თქვ­ენ ქალაქის მერ გიგი უგულავას ადანაშაულებთ, რა ფორმით იყო ჩართული ის ამ პროცესებში?

- ეს ყველაფერი გიგი უგულავას კაბინეტში დაიგეგმა. დამაპატიმრეს მე და კომპანიის დირექტორი, აღიძრა სისხლის სამართლის საქმე, ბრალი კი ბიუჯეტში ზედმეტი თანხის ჩარიცხვისთვის წაგვიყენეს. პოლიციაში პირდაპირ განგვიცხადეს, რომ უნდა დაგვეთმო "ჟინვალჰესი". გათავისუფლებიდან მეორე დღეს მოვიდა ფინანსური პოლიცია, ნოტარიუსთან და ქონების მართვის დეპარტმანეტის წარმომადგენელ ვინმე გვარამიასთან ერთად და ძალით გადაგვაფორმებინეს გვარამიას სახელზე აქციების 51 პროცენტი. შემდეგ გაიმართა ტენდერი, რომელიც მოიგო სრულიად გამოუცდელმა შვეიცარიულმა კომპანიამ და სამართავად გადაეცა სხვას. ამის შემდეგ მმართველობაში შემოვიდა თბილისის მერია, მე ჩამანაცვლა ადვოკატმა გიორგი ყავლაშვილმა. თუმცა იყო ერთი ხარვეზი - ჩვენ დამქირავებელთან იჯარა არ გვქონდა გაწყვეტილი. პირადად გიგი უგულავამ დაიბარა კომპანიის გენერალური დირექტორი კაბინეტში და იძულებით მოაწერინა ხელი იჯარის შეწყვეტის გამზადებულ ტექსტზე. ეს ადრეც გავასაჩივრე, მაგრამ 2005 წლის აგვისტოში უგულავას ბრძანებით, გააუქმეს სასამართლო პროცესები. ამის შემდეგ ის გახდა მონოპოლისტი ბაზარზე და ტარიფებიც გააძვირა, გააორმაგა.

- ამ შემთხვევიდან სამი წლის შემდეგ თქვენ "ორთაჭალჰესიც" წაგართვეს...

- "ორთაჭალჰესის" წართმევის მცდ­ელობა ეკა შარაშენიძის ეკონომიკის მინისტრობისას დაიწყო და 2008 წელს უკანონოდ ჩამომართვეს. გაფორმებული მქონდა გრძელვადიანი იჯარა და სახელმწიფომ, სრულიად უკანონოდ, ჩვენი აზრით, კორუფციული გარიგებით, 25 მილიონ დოლარად მიჰყიდა "ენერგო პრო-ჯორჯიას". აღსანიშნავია, რომ სასამართლო პროცესის მიმდინარეობისას ობიექტის გაყიდვა არ შეიძლება, მაგრამ მაინც გაყიდეს. იმ კომპანიის უკან კი, რომელსაც მიჰყიდეს "ორთაჭალჰესი", განიხილებოდა ზურაბ ნოღაიდელი. "ორთაჭალჰესის" თვითღირებულება 12-14 მილიონი იყო, საინტერესოა, რატომ გადაიხადეს მასში 25 მილიონი - ორმაგი ფასი? ნოღაიდელმა განაცხადა, იაფად იმიტომ ვყიდით, ტარიფი რომ არ გაიზარდოსო. ზუსტად ორ თვეში სამჯერ გაიზარდა ტარიფი. ეს "ენერგო პრო ჯორჯიასთვის" მოგებიანი იყო. "ორთაჭალჰესი" შეგნებულად გაყიდეს ორმაგ ფასად, სხვას რომ არ ეყიდა. როცა ჩვენ იჯარით ავიღეთ ეს ჰესი, მისი ღირებულება 600 ათასი იყო, მათ კი 25 მილიონად გაყიდეს და ერთი თეთრიც არ მოუციათ. ფაქტია, რომ ვიღაცას ჰქონდა "ორთაჭალჰესის" ჩამორთმევის ინტერესი, სავარაუდოდ, ზურაბ ადეიშვილს და იმჟამინდელ სხვა მაღალჩინოსნებს. ახალი ხელისუფლების სასამართლოს ობიექტური განაჩენის იმედი მაქვს და უკვე ამ საქმეზეც მივმართე პროკურატურას.

P.S. ამ საკითხზე კომენტარისთვის ზურაბ ნოღაიდელთან დაკავშირება ვცადეთ, მაგრამ მისმა მეუღლემ განგვიცხადა, რომ ყოფილი პრემიერ-მინისტრი ამჯერად ჟე­ნევაში იმყოფება და სამშობლოში რამდენიმე დღეში დაბრუნდება.

თამარ ბოჭორიშვილი

ყოველკვირეული გაზეთი "ყველა სიახლე"

(გამოდის ოთხშაბათობით)