ადელი ყველაზე ძილის მომგვრელი სიმღერების ავტორად დაასახელეს

ადელი ყველაზე ძილის მომგვრელი სიმღერების ავტორად დაასახელეს. ექსპერიმენტში მონაწილეობა 2000 ზრდასრულმა ბრიტანელმა მიიღო. კვლევის შედეგები Travelodge-ის ოფიციალურ საიტზე გამოქვეყნდა. მომღერალთა რეიტინგში, რომელთა მუსიკა ძილს იწვევს, მეორე ადგილი Coldplay-მ დაიკავა.

ჯგუფს, რომელსაც სათავეში კრის მარტინი უდგას, ანალოგიურ რეიტინგში პირველი ადგილი უკვე ორჯერ - 2008 და 2010 წლებში ეკავა. მესამე ადგილზე ამჯერად Snow Patrol-ი, მეოთხეზე კი ბარი უაიტი გავიდნენ. პირველ ხუთეულს ბიჭების ჯგუფი One Direction-ს ასრულებს.

აღსანიშნავია, რომ One Direction-ის სადებიუტო ალბომს "Up All Night" ("ნუ იძინებ მთელი ღამე") ჰქვია.

ძილის მომგვრელი მუსიკოსების რეიტინგში ადგილები მაიკლ ბუბლე, კლიფ რიჩარდი, ფრენკ სინატრა, Take That და Guns N' Roses უკავიათ. კლასიკოსებს შორის, რომელთა მოსმენა ბრიტანელებს ძილის წინ უყვართ, მოცარტი, ბეთჰოვენი და ბახია.

მომზადებულია travelodge.co.uk-ის მიხედვით.