7
ივნისიდღის ზოგადი ასტროლოგიური პროგნოზი
ტარიფებთან დაკავშირებით ახალმა ხელისუფლებამ ბევრი მოულოდნელი პარამეტრი აღმოაჩინა, - ამის შესახებ, "პალიტრა.ტვ"-ის ეთერში, გადაცემა " რეზიუმეში" საუბრისას ეკონომიკის ექსპერტმა გია ხუხაშვილმა განაცხადა.
"იმ ადამიანებს, რომლებიც კოალიციასთან იყვნენ დაახლოებულნი, რეალურად ჰქონდათ ტარიფების შემცირების სურვილი და გააჩნდათ რაღაც გათვლებიც, თუმცა, ეს გათვლები ხშირ შემთხვევაში არ ემყარებოდა კონკრეტულ მონაცემებს და ამას ობიექტური მიზეზები ჰქონდა. ერთია, როცა ითვლი თეორიულად იმ პარამეტრებით, რაც გაქვს ხელთ, მაგრამ მეორეა, რომ ამ ხელისუფლების პირობებში ტარიფებთან დაკავშირებით ძალიან ბევრი პარამეტრი იყო დახურული - მოულოდნელი პარამეტრები აღმოჩნდა, მათ შორის არამიზნობრივად აღებული ვალდებულებების სახით, ეს იქნება ნავთობისა და გაზის კორპორაციაში თუ სხვა სახელმწიფო დაწესებულებებში", - აღნიშნა ხუხაშვილმა.
უშუალოდ ნავთობისა და გაზის კორპორაციასთან მიმართებაში ეკონომიკურმა ექსპერტმა განმარტა, რომ მას აღებული ჰქონდა ისეთი ვალდებულებები, როგორიცაა პარლამენტის მშენებლობა, ტრაქტორების შეძენა და ევროობლიგაციების მომსახურების ყოველწლიური თანხის გადახდა. "კორპორაცია აშენებდა პარლამენტს, ტრაქტორებს ყიდულობდა და ბევრ სხვა რამეს აკეთებდა. ევრობონდებთან დაკავშირებით, რითაც ძალიან ამაყობდა ჩვენი ხელისუფლება, ამ ვალის მომსახურების თანხა ყოველწლიურად რამდენიმე ათეული მილიონი დოლარი აქვს გადასახდელი. ეს ყველაფერი აისახება ტარიფში და ბუნებრივია, კორპორაცია წაგებაზე ვერ იმუშავებდა", - განაცხადა გია ხუხაშვილმა.
აღნიშნულ კონტექსტში მან არ გამორიცხა, რომ საქმით სამართალდამცველები დაინტერესდნენ. "არ მინდა დეტალებში შევიდე, მაგრამ არ გამოვრიცხავ, რომ სამართალდამცველები დაინტერესდნენ, რადგან ერთი შეხედვით რაც ჩანს, ისაა, რომ აბსურდამდეა მისული ეს ყველაფერი. ახალ ხელისუფლებას კონკრეტულ დოკუმენტებზე ჯერ კიდევ არ მიუწვდება ხელი, მით უმეტეს არ მიმიწვდება მე, მაგრამ უახლოეს დღეებში, როგორც ვიცი, იქ იგეგმება ახალი მენეჯმენტის შესვლა აუდიტთან ერთად და მას შემდეგ, რაც ყველაფერი გაირკვევა, უფრო დეტალურად შეგვეძლება საუბარი", - დასძინა ეკონომიკის ექსპერტმა.
რაც შეეხება ელექტროენერგიის ტარიფს, ხუხაშვილის ინფორმაციით, "საკონტრაქტო წინააღმდეგობები აქაცაა". "ძირითადი რესურსი აქ არის ის საინვესტიციო კომპონენტი ტარიფში, რომელსაც კომპანიები არასათანადოდ ასრულებენ. ვფიქრობ, აუცილებელი გახდება მშვიდ ვითარებაში კომპანიებთან მოლაპარაკება", - აღნიშნა ხუხაშვილმა, რომლის ვარაუდითაც, ტარიფების კლება ორ ეტაპად მოხდება - დღევანდელი ვალდებულების გათვალისწინებით და ვალდებულებიდან გათავისუფლების შემდგომ.
