28
მაისიდღის ზოგადი ასტროლოგიური პროგნოზი
ტელეკომპანია "მე-9 არხის" ჟურნალისტი, გადაცემა "ახალკაცის მატრიცას" წამყვანი გოგი ახალკაცი ქართულ ტელესივრცეში ბოლო ხანს განვითარებულ პროცესებზე გვესაუბრება:
- საპარლამენტო არჩევნების შემდეგ ქართულ ტელემედიაში ზოგი რამ თავისთავად შეიცვალა, თუმცა იმის თქმა, რომ ყველაფერი დალაგდა, ზედმეტია. ისიც სათუოა, ოდესმე დალაგდება თუ არა ქართულ მედიაში სიტუაცია. კარგია, რომ ტელეკომპანია "იმედი" ნამდვილ პატრონს დაუბრუნდა, არსებობს "მე-9 არხი", მოძლიერდა "მაესტრო" და რაც მთავარია, ამ არხებზე იმატა ისეთი კომპანიების რეკლამებმა, რომლებიც თვე-ნახევრის წინ სათოფეზეც კი არ გვეკარებოდნენ... ამ ფონზე ბუნდოვანია ტელეკომპანია "რუსთავი 2"-სა და საზოგადოებრივ მაუწყებელში განვითარებული პროცესები. ვერ გავიგე, რა ხდება "რუსთავი 2"-ში, ვიღაცამ გაყიდა, ვიღაცამ იყიდა, ვინ არის ეს ხალხი, რა კავშირი აქვთ ერთმანეთთან, რას გადასცემენ და გადმოსცემენ ერთმანეთს... გარდა ამისა, ამ ტელეკომპანიას უამრავი მომჩივანი ჰყავს, ზოგი კუთვნილი წილის დაბრუნებას ითხოვს, ზოგიც - მესაკუთრეობის აღდგენას. ამის გარკვევა, ალბათ, სასამართლოს საქმეა. ისე, ტრიბუნა რომ ყველას სჭირდება, განსაკუთრებით წინა ხელისუფლების პირობებში გაცხადდა. "რუსთავი 2" საამისოდ კარგი ბრენდია და ამიტომაც არის მის ხელში ჩასაგდებად გაწევ-გამოწევა. მოკლედ, "რუსთავი 2"-ის გარშემო უშველებელი ხლართია და ამ ხლართს იმიტომაც ზრდიან, რომ ვიდრე სასამართლო კვანძს მიადგება, დრო მოიგონ.
- არჩევნების შემდეგ წინა ხელისუფლებისადმი დაქვემდებარებულ ყველა ტელეკომპანიას პრობლემები შეექმნა, ნაწილი დაიხურა კიდეც...
- საზოგადოებრივი მაუწყებლის არსებობა იმ ფორმით, როგორც მაუწყებლობს, გაუმართლებელია და სისტემური კრახი უფროა, ვიდრე ის, რომ ლევან გახელაძე, გიორგი ჭანტურია ან დავით პაიჭაძე ცუდი ადამიანები არიან. თუმცა, კარგი იქნებოდა, ამა თუ იმ თანამდებობაზე კეთილსინდისიერი ადამიანები მუშაობდნენ. ჩემი აზრით, სამეურვეო საბჭოს დაკომპლექტების წესიც შესაცვლელია. წინააღმდეგ შემთხვევაში საკითხი შეიძლება ასე დაისვას - საჭიროა კი საზოგადოებრივი მაუწყებლის არსებობა იმ ფორმით, რა ფორმითაც ახლა მაუწყებლობს? რაც შეეხება ტელეკომპანია "პიკს", ეს თავიდანვე არარეალურ პროექტად მიმაჩნდა და მასში ფულის ჩაყრა დიდი სიბრიყვე იყო. ვითომ "პიკი" ქართული ინტერესების გამტარებელი უნდა გამხდარიყო, მაგრამ ჯერ ის გავარკვიოთ, რა ინტერესები გვაქვს (იღიმის). უნახავს ვინმეს "პიკის" გადაცემები? გამოდის, რომ ფულს ვიხდით იმაში, რაც არფერში გვჭირდება და არ გვაინტერესებს. თუ დაასაბუთებენ, რომ "პიკი" მართლაც საჭირო საქმეს აკეთებს, კი ბატონო, გადავიხდით. როდესაც საქმე საზოგადოებრივი სახსრების ხარჯვას ეხება, ამ პროცესს ბევრად მაღალი ლეგიტიმაცია უნდა ჰქონდეს. მაგალითად, კახა ბენდუქიძეს შეუძლია შეიძინოს "იმედი", "საქართველო", რკინიგზა, იყიდოს თევზი, შეწვას და შეჭამოს, ეს ჩემი საქმე არ არის, მაგრამ ხალხის ფულის უაზროდ ხარჯვა არავის ეპატიება.
- ბენდუქიძემ მართლა შეიძინა ტელეკომპანია "საქართველო"?
- ეს ჯერჯერობით გაურკვეველია. როგორც შევიტყვე, "საქართველო" აღარ არის ტელეკომპანია, რიგით კომპანიად გადაკეთდა და "რუსთავი 2"-ის აქციების 51 პროცენტი შეიძინა. თუ ქიბარ ხალვაშის, აფაქიძისა და დვალის პრეტენზიები "რუსთავი 2"-ის მიმართ უსაფუძვლოა და მის გარშემო არ არსებობს ხლართი, სხვათა შორის, ამას ნიკა გვარამიაც ირწმუნება, ტრაგედია არ არის, ბენდუქიძე იყიდის ტელევიზიას, ჩერგოლეიშვილი თუ კალაძე. რაც უფრო მრავალპოლუსიანი მედია გვექნება, უკეთესად გამოჩნდება ყველაფერი.
- სხვათა შორის, საზოგადოების ნაწილი მიიჩნევს, რომ ივანიშვილმა ტელეკომპანია "მე-9 არხი" უნდა გაყიდოს...
- გაყიდვა შეიძლება მოისურვოს, მაგრამ ვინ იქნება მყიდველი, სხვა საკითხია. თუმცა ლაპარაკი იყო იმაზე, რომ ივანიშვილს ეს ტელეარხი, მენეჯმენტის თვალსაზრისით, კონკრეტული დამოუკიდებელი ჯგუფისთვის გადაეცა. შეიქმნა კიდეც სპეციალური სამეთვალყურეო საბჭო, რომელშიც პატივცემული ადამიანები შედიან და გამორიცხულია, ლარი კინგმა ივანიშვილის ან სააკაშვილის პოლიტიკა გაატაროს. მიმაჩნია, რომ მას საერთოდ არ ადარდებს ეს ყველაფერი, რადგან ლამის 100 წლისაა და თავის რეპუტაციას უფრთხილდება.
- ხელისუფლების შეცვლამ ბევრი ჟურნალისტი უმუშევარი დატოვა...
- მიმაჩნია, რომ "იმედის" და "რეალ-ტივის" ჟურნალიტებმა, რომლებიც უმუშევრები დარჩნენ, თავი შეირცხვინეს საზოგადოების წინაშე. ეს ჟურნალისტები ძალიან დიდი ხნის განმავლობაში უწესოდ იქცეოდნენ. თუმცა ყველას ერთ ქვებში ვერ მოვხარშავ... ამ ჟურნალისტების დაბრუნება არხის ხელმძღვანელობის გადასაწყვეტია, მაგრამ მთავარია, ენდობა კი მათ საზოგადოება? შეიძლება, ეს ადამიანებიც სისტემის მსხვერპლნი არიან, თუმცა ზოგიერთი სისხლის სამართლის დამნაშავეა. გაიხსენეთ ალისტრახო და მისი მეგობრები, რომელთა საქციელსაც გამართლება არა აქვს...
- ახლახან გავრცელდა ინფორმაცია, რომ თბილისის მერი სახელმწიფო ბიუჯეტის სახსრებით გაურკვეველი მისიით ლას-ვეგასში სამჯერ იმყოფებოდა...
- უგულავას ამ საქციელმა ერთი კარგი ქართული გამონათქვამი გამახსენა - "უნახავმა რა ნახაო"...
ნინო მაისურაძე
ყოველკვირეული გაზეთი "ყველა სიახლე"
(გამოდის ოთხშაბათობით)
