30
მაისიდღის ზოგადი ასტროლოგიური პროგნოზი
საქართველოში ბრიტანული წარმოშობის ცნობილი ფრანგი მსახიობი და მომღერალი შარლოტა გეინსბურგი იმყოფება. სოციალურ ქსელებში მისი თბილისში გადაღებული ფოტოებიც გავრცელდა.
არსებული ინფორმაციით, შარლოტა გეინსბურგი ერთ-ერთ მთავარ როლს შეასრულებს ქართულ-ფრანგულ ფილმში, რომლის პროდიუსერიც ქართული მხრიდან პაპუნა დავითაიაა. ფილმში "ჯეკი ქალების სამეფოში" მთავარ როლს რეჟისორი მიშელ აზანავიჩუსი შეასრულებს.
ფილმის გადაღება პარიზსა და საქართველოს სხვადასხვა კუთხეებში არის დაგეგმილი. ამავე ფილმისთვის გადასაღები პავილიონები მომზადებულია საქართველოს პარლამენტის ყოფილ შენობაშიც. პარლამენტის შენობაში ფილმის გადაღებების შესახებ ინფორმაცია ორი თვის წინ გავრცელდა.
შარლოტა გეინსბურგი საქართველოში მცირეწლოვან შვილთან ერთად იმყოფება.
შარლოტა 1971 წლის 21 ივლისს ლონდონში მომღერალ და რეჟისორ სერჟ გეინსბურგის ოჯახში დაიბადა. დედამისი - ცნობილი მომღერალი და მსახიობი ჯეინ ბირკინი ორი წლის წინ მუსიკალურ ფესტივალ "ალტერ ვიზიის" ფარგლებში საქართველოში იმყოფებოდა. ზუგდიდში გამართულ კონცერტზე, რომელიც დევნილებს მიეძღვნა, ბირკინმა გარდაცვლილი მეუღლის ცნობილი ჰიტი - La Javanaise შეასრულა.
შარლოტა გეინსბურგმა განათლება შვეიცარიაში მიიღო, სამსახიობო კარიერა კი საფრანგეთში აიწყო.
მსახიობს ორჯერ აქვს მიღებული ფრანგული კინემატოგრაფიის მთავარი ჯილდო "ცეზარი", ფილმებისთვის "თავხედი" და "ტუჩები", ასევე გადაღებულია ჰოლივუდის არაერთ ფილმში და ჩაწერილი აქვს რამდენიმე მუსიკალური ალბომი.
გეინსბურგი 1990 წლიდან სამოქალაქო ქორწინებაში იმყოფება მსახიობ და რეჟისორ ივან ატალთან. წყვილს სამი შვილი ჰყავს. ამჟამად მსახიობი ოჯახთან ერთად პარიზში ცხოვრობს.
