5
ივლისიდღის ზოგადი ასტროლოგიური პროგნოზი
ყვითელი ავტობუსების მძღოლებმა მუშაობა დღეს დილიდან განაახლეს. 5-დღიანი გაფიცვის შეწყვეტის გადაწყვეტილება მათ გლდანის მაჟორიტარ დეპუტატ სოსო ჯაჭვლიანთან გუშინ გამართული მოლაპარაკებების შემდეგ მიიღეს.
ჯაჭვლიანი მძღოლებს დაჰპირდა, რომ მათთან დაკავშირებულ საკითხებს დეტალურად შეისწავლის სახელმწიფო კომისია, რომელსაც უშუალოდ პრემიერ-მინისტრი ბიძინა ივანიშვილი ხელმძღვანელობს. მისი თქმით, ყველა კანონიერი მოთხოვნა, პრეტენზია შესაბამისად განხილული და გადაწყვეტილი იქნება.
გაფიცვის შეწყვეტის გადაწყვეტილება მიღებულია შეხვედრაზე, რომელსაც სამი სამგზავრო ავტოპარკის წარმომადგენელი მძღოლები ესწრებოდნენ. ასევე, შეხვედრაში მონაწილეობდნენ პროფკავშირების წარმომადგენლები და მაჟორიტარი დეპუტატი სოსო ჯაჭვლიანი.
როგორც შეხვედრის შემდეგ მძღოლები აღნიშნავდნენ, გამოვიდნენ მოქალაქეების ინტერესებიდან და ამ ეტაპზე მათი საკითხის შესწავლის იმედით მუშაობას განაახლებენ. ამასთან, ძალაში რჩება მძღოლების მოთხოვნა სატრანსპორტო კომპანიის გენერალური დირექტორის, ლევან კოპლატაძისა და თბილისის მერიის სატრანსპორტო სამსახურის ხელმძღვანელის, აკაკი ჯოხაძის თანამდებობიდან გათავისუფლების შესახებ.
ყვითელი ავტობუსების მძღოლები 5 დღის განმავლობაში იყვნენ გაფიცული და მათი გაფიცვის მთავარი მიზეზი ანაზღაურებით უკმაყოფილება და ხელმძღვანელობის მხრიდან არასათანადო დამოკიდებულება იყო.
