ეკონომიკის სამინისტრო "თბილისის სატრანსპორტო კომპანიის" მართვის აღებას არ აპირებს

საქართველოს ეკონომიკისა და მდგრადი განვითარების სამინისტრო დედაქალაქის მერს, გიგი უგულავას პასუხისმგებლობის თავიდან არიდებაში ადანაშაულებს. როგორც სამინისტროს მიერ გავრცელებულ განცხადებაშია ნათქვამი, "თბილისის სატრანსპორტო კომპანია" და თბილისის მეტროპოლიტენი მუნიციპალური დაქვემდებარების ობიექტებია.

"შესაბამისად, დედაქალაქის მერია ვალდებულია, უზრუნველყოს აღნიშნული სტრუქტურების გამართული ფუნქციონირება და მათ გარშემო არსებული ნებისმიერი საკითხის თუ პრობლემის მოგვარება. ამდენად, თბილისის მერის მიერ სამაუწყებლო კომპანია "რუსთავი 2"-ის პირდაპირი ეთერით 11 ნოემბერს გაკეთებული გაცხადება არის პასუხისმგებლობის თავიდან არიდება. ეკონომიკისა და მდგრადი განვითარების სამინისტრო კიდევ ერთხელ ცალსახად აფიქსირებს, რომ თბილისის საქალაქო ტრანსპორტის გამართულად ფუნქციონირების საკითხი არის თბილისის მერიის კომპეტენცია და შესაბამისად, სწორედ მერია არის ვალდებული, აღნიშნული პრობლემა თავადვე მოაგვაროს", - ნათქვამია ეკონომიკის სამინისტროს განცხადებაში.

შპს "სატრანსპორტო კომპანიის" მართვა საქართველოს მთავრობას გუშინ, "რუსთავი 2"-ის გადაცემა "P.შ." –ში ჩართვისას დედაქალაქის მერმა, გიგი უგულავამ შესთავაზა.

ამის შესახებ განცხადება მერიის ვებ-გვერდზეც გავრცელდა, სადაც ამის მიზეზად სახელდება ის, რომ შეწყდეს ყვითელი ავტობუსების მძღოლების გაფიცვა, ქალაქში აღდგეს მოძრაობა და თბილისელებმა შეუფერხებლად შეძლონ გადაადგილება.

"ინტერპრესნიუსი"