სალომე ბაკურაძე: "ჩემი შეყვარებული ნამდვილად ბედნიერია"

ალბათ ყველას გახსოვთ რუბრიკაში - "თინეიჯერული პონტები" დაბეჭდილი სალომე ბაკურაძის ინტერვიუ, სადაც მომღერალი იხსენებდა თავის ბავშვობას, ლაპარაკობდა იმ ადამიანებზე, რომლებიც პატარაობიდანვე უყვარს და იმაზეც, რომ ერთი ოცნება უკვე აუხდა - ბატონი კახი კავსაძე პირადად გაიცნო და მასთან ერთად სცენაზეც კი მოუხდა დგომა. სალომეს მეორე ოცნების ახდენის - სტივ უანდერის "რეალში" მოსმენის შანსიც ჰქონდა - ის სტამბოლში, უანდერის კონცერტზე აპირებდა წასვლას და როგორც თქვა, ბილეთებიც კი "გააძრო"...

სალომეს სახელზე უამრავი მესიჯი მოვიდა. მათგან რამდენიმეს თავად მომღერალმა გასცა პასუხი და ზოგიერთ თინეიჯერს რჩევაც კი მისცა.

სალომეს სოფელი...

ლებე გიორგაძე:

"გამარჯობა. მართალია, თინეიჯერი აღარ მეთქმის, რადგან ხანში შესული კაცი ვარ, მაგრამ თქვენს რუბრიკას მაინც ყოველთვის ვკითხულობ. მაინტერესებს, მოზარდები რას ფიქრობენ, როგორი სულიერი საზრდო აქვთ და ა.შ. მაინტერესებს ცნობილების ბავშვობაც, მათი მისწრაფებები... თქვენი ერთ-ერთი რესპონდენტი, სალომე ბაკურაძე განსაკუთრებით მომწონს. ის რაღაცნაირი ხალისიანი გოგონაა, დადებითი ემოციები მოაქვს და თანაც, რაც მთავარია, იმერელია - ჩემი კუთხის შვილი; მეც იმერელი ვარ და იქაურები ძალიან მიყვარს. სალომესთან ჩაწერილი ინტერვიუ კარგი იყო, მაგრამ ცუდი ის არის, რომ არ ჩაეძიეთ და არ ჰკითხეთ, კერძოდ, სად აქვს სოფელი ანუ სად ისვენებდა? რატომ არაფერი მოაყოლეთ მამაზე, დედაზე. ვინ არის ის ქალბატონი, რომელზეც ასეთი სითბოთი ლაპარაკობს? ვინ იყო მამამისი და რას საქმიანობდა? მოკლედ, თუ ამ კითხვებზე პასუხის გაცემის საშუალებას მისცემთ, დამავალებთ. მინდა, თქვენც და სალომესაც წარმატებები ვუსურვო! P.S. არ იფიქროთ, რომ უსაქმური ვარ და გულს ჟურნალების კითხვით ვიოხებ. მართალია, პენსიონერი გახლავართ, მაგრამ ერთი ცნობილი რესტორნის მეპატრონე ვარ და საქმე ნამდვილად ბევრი მაქვს, მაგრამ ჟურნალ-გაზეთების კითხვაც მიყვარს და რა ვქნა?!"

სალომე:

- პირველ რიგში მინდა, დიდი მადლობა გადავუხადო ყველა იმ ადამიანს, ვინც ჩემ მიმართ ამხელა სითბოს გამოხატავს... რაც შეეხება ბატონი ლებეს კითხვას, - თუ სად მაქვს სოფელი? ზაფხულობით ვისვენებდი ტყიბულის რაიონში, კერძოდ კი სოფელ ორპირში, სადაც ბებო ცხოვრობს. ულამაზესი სოფელია! იქ ჩემ გარდა, დასასვენებლად უამარავი ადამიანი მიდიოდა - ჩემი მამიდაშვილები, სხვა ნათესავებიც და მეგობრები. იქ გატარებული დღეები ძალიან ტკბილად მახსენდება. სამწუხაროდ, დღესდღეობით იქ დასასვენებლად ჩასვლას ვერ ვახერხებ, მაგრამ როცა დრო მაქვს, ბებოს მოსანახულებლად ჩავდივარ ხოლმე...

დედა მუსიკოსია, ვოკალისტი, ფორტეპიანოს პედაგოგი... მამა პროფესიით მშენებელი იყო, თუმცა, რაც მე მახსოვს, პროფესიით არ უმუშავია...

"საზღვარგარეთ შეყვარებულთან ერთადაც ვიყავი..."

იკო, 16 წლის:

"სალო, არაჩვეულებრივი გოგო და მომღერალი ხარ. მინდა, ცხოვრებაში წარმატებები გისურვო!.. ვიცი, რომ ბევრს მოგზაურობ. მაინტერესებს, ყველაზე დიდი შთაბეჭდილება შენზე რომელმა ქვეყანამ მოახდინა და იქნებ მოგზაურობისას თავს გადახდენილი კურიოზი გაიხსენო? კიდევ, მაინტერესებს, ვისთან ერთად გიყვარს მოგზაურობა? შეყვარებულთან ერთად საქართველოს ფარგლებს გარეთ თუ ყოფილხარ? პასუხებისთვის წინასწარ გიხდი მადლობას :))".

სალომე:

- მოგზაურობა ნამდვილად მიყვარს. იმ ქვეყნებიდან, რომელშიც ნამყოფი ვარ, ჩემზე განსაკუთრებული შთაბეჭდილება მაინც საფრანგეთმა, კერძოდ კი პარიზმა მოახდინა. თუმცა, ყველა ქვეყანას თავისებური ხიბლი აქვს. საერთოდ, ადამიანი უცხო ადგილის თვალიერებისას ყოველთვის უდიდეს სიამოვნებას იღებს და ამ მხრივ გამონაკლისი არც მე ვარ.

მეგობრებთან ერთად მოგზაურობა ალბათ, ყველას განსაკუთრებულად უყვარს და მე არც ამ მხრივ ვარ გამონაკლისი. ერთადერთი პრობლემა, რაც მოგზაურობისას მე და ჩემს მეგობრებს გვაქვს, ის არის, რომ უცხო ქვეყანაში ყოფნისას ძილი არ მიყვარს, ამაზე დროს არ ვხარჯავ და ყველა იძულებულია, ჩემი დღის რეჟიმზე "გადმოეწყოს", ჩემთან ერთად ლამის მთელი დღეები, ფეხით იბოდიალოს :))...

საზღვარგარეთ შეყვარებულთან ერთადაც ვიყავი, ოღონდ - არა სამოგზაუროდ; უკრაინაში, მოლდოვაში გამართულ კონკურსებში ვმონაწილეობდი და შეყვარებული საგულშემატკივროდ წამომყვა...

"დაიკოს ძლივს დავუსხლტი ხელიდან"

ნია, 14 წლის:

"მიყვარხართ, მიყვარხართ და კიდევ ერთხელ, მიყვარხართ... სალომე, მეც მყავს ჩემზე რამდენიმე წლით უფროსი დაიკო და ჩვენ გამუდმებით ვჩხუბობთ, საერთო ენას ვერ ვპოულობთ. მეუბნება, რომ ენაჭარტალა ვარ და როცა მისი მეგობრები გვსტუმრობენ, მე ოთახში შესვლასაც კი მიკრძალავს. საინტერესოა, ოდესმე შენს დაიკოსთან მსგავსი პრობლემა თუ შეგქმნია? დედმამიშვილთან დამეგობრება როგორ მოახერხე? P.შ. ისე, ცნობისათვის, ენაჭარტალა სულაც არ ვარ. უბრალოდ, ერთხელ ის და მისი "დაქალოჩკები" ტრაბახობდნენ, რომ ვიღაც ბიჭს რაღაც მაგარი გაუჩალიჩეს და თანაც, ისეთი მაგარი რაღაც, რომ ბიჭს სკოლაში აღარ მიესვლება. მერე გავიგე, რომ ის საწყალი შეყვარებულის წინ მაგრად შეურცხვენიათ და ამის გამო ვუსაყვედურე არა მარტო მას, არამედ მის მეგობრებსაც. დამტუქსეს, არამკითხე მეძახეს, დაიკომ კი ლამის მცემა, ძლივს დავუსხლტი ხელიდან. ჰოდა, როცა შინ მოვიდა, ისევ ჩხუბი დამიწყო. ჰოდა, დედიკომ ყველაფერი გაიგო და ჩემი დაიკო უსაქციელობის გამო დატუქსა. მე მისი "ჩაშვება" არც მიფიქრია, დაუფიქრებლად მოიქცა და თავადვე გაამხილა საკუთარი საიდუმლო... სალომე, მომწონხარ. იმედია, ჩემთვის რჩევას არ დაიშურებ..."

სალომე:

- ნია, საყვარელო, მესმის შენი და ვფიქრობ, ძალიან კარგი გოგო ხარ, ასე რომ განიცდი დასთან გაფუჭებულ ურთიერთობას. დროთა განმავლობაში ყველაფერი აუცილებლად დალაგდება, უბრალოდ, ვიდრე ეს მოხდება, შეეცადე, ხშირ-ხშირად უთხრა, - რომ დები ხართ და საუკეთესო მეგობრები უნდა იყოთ. მესმის, რომ დედმამიშვილი ძალიან გიყვარს და მასთან ჩხუბი კი არა, მეგობრობა გინდა, მაგრამ რას იზამ... იმედია, მალე ამ ყველაფერს შენი დაიკო მიხვდება და დაგაფასებს...

"სიგიჟე - ეს ჩემი ყოველდღიური საქციელია"

ნიკა, 18 წლის:

"მაგარ "ვიდზე" ხარ, ბოლო დროს, ხომ იცი. მაინტერესებს, ბიჭის გამო რაიმე სიგიჟე თუ ჩაგიდენია? შეყვარებულს სიურპრიზებით თუ ანებივრებ? გოგონებს საყვარელი ადამიანისთვის დაბადების დღეზე საჩუქრის შერჩევა უჭირთ. მაინტერესებს, შენ ამ საქმის მოგვარებას როგორ ახერხებ?"

სალომე:

- არ ვიცი, შეყვარებულს რამდენად ვანებივრებ, მაგრამ მიყვარს, როცა ადამიანს იმას ვჩუქნი, რაც ვიცი, რომ გაახარებს, რასაც გამოიყენებს. ვინაიდან ჩემს შეყვარებულს კარგად ვიცნობ, მისთვის საჩუქრის შერჩევა არ მიჭირს... სიგიჟეს რაც შეეხება, ეს ჩემი ყოველდღიური საქციელია. ჰოდა, აღარ ვიცი, ახლა რომელი ერთი გავიხსენო და მოგწერო...

"დაგვიანებული" საჩუქარი...

მიკა, 15 წლის:

"მართალია, სალომეს სიმღერების დიდი მოყვარული არ ვარ, მაგრამ მისი ინტერვიუ მაინც სიამოვნებით წავიკითხე. მინდა ვკითხო, აჩუქა თუ არა ფანმა ის ნახატი? მოეწონა?"

სალომე:

- ჩემო კარგო, ის საჩუქარი, რომელზეც ინტერვიუში ვლაპარაკობდი, ჯერჯერობით ჩემთვის არ მოუტანიათ. ასე რომ, შენს კითხვას სრულყოფილ პასუხს ვერ გავცემ.

"გამაზული" სტივ უანდერის კონცერტი

გიო, 19 წლის:

"მეც ძალიან მიყვარს მაიკლ ჯექსონის სიმღერები, მაგრამ სტივ უანდერზეც ვაფანატებ. ჰოდა, ნამდვილად შემშურდა შენი, თანაც - არა თეთრი შურით :). აბა, რა ქენი, იყავი სტივის კონცერტზე? იქნებ მოგვიყვე, რა როგორ მოხდა? რა იგრძენი მაშინ, როცა ამხელა მომღერალს "ლაივში" უსმენდი? მოკლედ, რისი გადმოცემაც შეგიძლია, გვითხარი, რა, ძალიან გთხოვ. პასუხისთვის წინასწარ გიხდი მადლობას".

სალომე:

- ეს კითხვა ჩემთვის ტრაგედია გახდა, რადგანაც ქვეყანაში ბოლო დროს განვითარებული მოვლენების გამო, კონცერტზე წასვლა ვერ შევძელი... ჰოდა, ამ ფაქტის გამო, ნახევარი თბილისი მაწყნარებდა... მაგრამ მე ოდესმე აუცილებლად მოვხვდები სტივ უანდერის კოცერტზე და მერე, აღარ გავჩუმდები; ამ თემასთან დაკავშირებით იმდენს დავწერ და ვილაპარაკებ, რომ შეიძლება, თავიც მოგაბეზროთ :))...

დიეტა და ტანისამოსი

მაკა, 17 წლის:

"სალომე, მეც შენნაირი "გაბარიტების" ვარ. თუმცა, ჩემგან განსხვავებით, შენ ყოველთვის ირგებ ტანისამოსს, მე კი ტანსაცმლის შერჩევა და მორგება მიჭირს. საინტერესოა, დიზაინერი თუ გყავს? სამოსს თავად ყიდულობ? ძირითადად, მაღაზიებში დადიხარ თუ ბაზრობასაც სტუმრობ? P.S. და კიდევ, დიეტაზე ყოფნა ხშირად გიწევს? იქნებ წონაში დაკლების რაიმე კარგი მეთოდი მიკარნახო. მეუბნებიან, ივარჯიშე და მალე გახდებიო, მაგრამ შინ ვარჯიშს ვერ ვახერხებ, იმდენი ფული კი არ მაქვს, რომ ტრენაჟორებზე ან შეიპინგზე ვიარო... დიდი მადლობა რჩევისთვის".

სალომე:

- დიეტაზე ყოფნა ჩემი ცხოვრების განუყოფელ ნაწილად იქცა. რაც შეეხება ვარჯიშს, ეს საუკეთესო საშუალებაა წონაში დასაკლებად და თუ ამას მოახერხებ, კარგი იქნება. ისე, ინტერნეტშიც შეგიძლია, მოიძიო წონაში დასაკლები 15-წუთიანი ვარჯიში, რომელიც სახლის პირობებშიც იოლი შესასრულებელია.

რაც შეეხება მეორე კითხვას - მყავს თუ არა დიზაინერი? ჩემო კარგო, ტანსაცმელს დამოუკიდებლად ვყიდულობ ან საქართველოში, ან მოგზაურობისას, ან კიდევ, დედა მიგზავნის მოსკოვიდან. დიზაინერებს ძირითადად, მაშინ ვსტუმრობ, როცა რაღაც განსაკუთრებული საკონცერტო კოსტიუმი მჭირდება.

"ადამიანები სიზარმაცით ბევრს ვკარგავთ"

ქეთო, 17 წლის:

"ეს მომღერალი მომწონს. ისეთი ენერგიულია, რომ მისი მშურს და როცა ტელეეკრანზე ვხედავ, ყოველთვის აღვნიშნავ: იმის ნახევარი ენერგია რომ მქონდეს, რამდენიც სალომეს აქვს, ცხოვრებაში ბევრს მივაღწევდი-მეთქი. სიმღერის ნიჭი მეც მაქვს, მაგრამ ზარმაცი ვარ და ჩემები ამის გამო გამუდმებით მსაყვედურობენ. სალომე, გულწრფელად მითხარი: არასდროს არაფერი გეზარება? როგორ ფიქრობ, სიზარმაცე ადამიანის ყველაზე დიდი მტერია?!"

სალომე:

- დიდი მადლობა კომპლიმენტებისთვის. ენერგიული ნამდვილად ვარ, მაგრამ სიზარმაცეც არ მაკლია. ჩემი აზრით, ადამიანმა ყველაფერი უნდა გააკეთოს საიმისოდ, რომ ის მავნე ჩვევა მაინც მოიშოროს თავიდან, რომელიც მეტად აწუხებს. მერწმუნე, ადამიანები საკუთარი სიზარმაცით ბევრს ვკარგავთ; გასათვალისწინებელია, რომ დრო სწრაფად გადის და მისი უქმად გაფლანგვა სისულელეა. ასე რომ, სიზარმაცის გამო ბევრ კარგ რამეზე უარის თქმა ნამდვილად არ ღირს...

კომპლიმენტები და ეჭვიანობა...

გოგიტა, 23 წლის:

"თინეიჯერი არ ვარ, მაგრამ იმედია, ჩემი წერილი სალომემდე მაინც მიაღწევს. ეს გოგო ძალიან მომწონს და მისი შეყვარებულის ცოტა არ იყოს, მშურს კიდეც. ასე მგონია, ის ბიჭი ბედნიერ ვარსკვლავზეა დაბადებული. აბა, რა მოაწყენს იმ ქალის გვერდით, რომელიც ყოველთვის კარგ ხასიათზეა და რომელსაც საოცრად გადამდები სიცილი აქვს. აურის და ეგეთი რაღაცების არ მჯერა, მაგრამ როცა სალომეს ვუყურებ ან მის სიმღერებს ვუსმენ, აშკარად კარგ ხასიათზე ვდგები. ალბათ, საქართველოში ბევრი ჩემნაირი თაყვანისმცემელი ჰყავს. ჰოდა, მაინტერესებს, მის საქმროს ღამით როგორ სძინავს? სალომეზე არ ეჭვიანობს?"

სალომე:

- უღრმესი მადლობა. ჩემთვის კომპლიმენტი არ დაგიშურებია. ისე, შენ მიერ დასმული კითხვის ადრესატი მგონი, მე არ ვარ. ასე რომ, ზუსტ პასუხს ვერ გაგცემ, მაგრამ ვფიქრობ, ჩემი შეყვარებული მართალაც, ბედნიერია :))... რაც შეეხება ეჭვიანობას - ის მსგავსი ფიქრებით თავს ნამდვილად არ იტანჯავს და ეს ძალიან კარგია.

დაბოლოს, მინდა, ყველას წარმატება გისურვოთ და კიდევ ერთხელ, მადლობა გადაგიხადოთ იმ თბილი სიტყვებისთვის, რომელიც მომწერეთ...

ლიკა ქაჯაია

ჟურნალი ”გზა”

(გამოდის ხუთშაბათობით)