28
მარტიდღის ზოგადი ასტროლოგიური პროგნოზი
საქართველოს შეიარაღებულ ძალებში მიმდინარე პროცესებზე თვალსაზრისს გენერალთა კლუბის წევრი, გენერალ-მაიორი კობა კობალაძე გამოხატავს.
- ჯარის პულსაცია ქვეყანაში მიმდინარე პროცესების პულსაციას ემთხვევა. რა ჯარისკაცის აღზრდაზე, დისციპლინაზეა ლაპარაკი ჯარში, რომლის მთავარსარდლის (თავდაცვის მინისტრის) დეზერტირობის მოწმეც მთელი ქვეყანა გახდა? წარმოუდგენელია სახელმწიფოს ერთ-ერთი უმაღლესი თანამდებობის პირი ასე იქცეოდეს, ეს მარტო უპასუხისმგებლობა კი არა, დანაშაულია... ერთ თვეზე ცოტა მეტი გავიდა მას შემდეგ, რაც ქვეყნის სათავეში ახალი პოლიტიკური გუნდი მოვიდა, ჩემი აზრით, წარმატებულ ნაბიჯად შეიძლება მივიჩნიოთ ის, რომ თავდაცვის მინისტრად დაინიშნა საკმაოდ გაწონასწორებული, მტკიცე ნებისყოფის ადამიანი, რომელსაც თავის დროზე სიმწარეც აქვს ნანახი და გარკვეული წვლილიც აქვს შეტანილი ქვეყნის უსაფრთხოების განმტკიცებაში.
- როგორ აფასებთ გენერალური შტაბის უფროსის მოადგილედ ვახტანგ კაპანაძის დანიშვნას, მაშინ, როცა გენშტაბის უფროსად კვლავ პრეზიდენტის მიერ დანიშნული გიორგი კალანდაძე რჩება, თუმცა, ვრცელდებოდა ხმა, რომ ის თანამდებობას დატოვებდა.
- გენშტაბის უფროსის ახალდანიშნული პირველი მოადგილე ვახტანგ კაპანაძე ჩემთვის მარტო მუნდირში შემოსილი გენერალი არ არის, ის პროფესიონალია და რეგალიები არა ვინმეს კეთილგანწყობით, არამედ დამსახურებითა და გამოცდილებით აქვს მოპოვებული. ჩვენ ერთად გვიბრძოლია, საერთო ამოცანები გადაგვიწყვეტია და ვიცი, როგორია ის ბრძოლის ველზე. მას განათლება საუკეთესო სამხედრო აკადემიებში აქვს მიღებული, - უკრაინაში, ამერიკის შეერთებულ შტატებში. ასევე მნიშვნელოვანია, რომ არ არის შეზღუდული პარტიული ვალდებულებით. ამის კარგი მაგალითი გვაჩვენეს ძალოვანმა მინისტრებმა, რომლებმაც დანიშვნისთანავე დატოვეს პარტია. ვიმედოვნებ, პრეზიდენტიც უფრო ადეკვატურად შეაფასებს ქვეყანაში შექმნილ ახალ რეალობას. დარწმუნებული ვარ, კაპანაძე და კალანდაძე შეძლებენ თანამშრომლობას, სამხედროები უფრო რეალურად აფასებენ ხოლმე სიტუაციას, თუმცა, პროფესიული თვალსაზრისით, კალანდაძე გასაზრდელია. მან გამოთქვა კიდეც უცხოეთში სწავლის გაგრძელების სურვილი, ამ თხოვნით, როგორც ვიცი, უმაღლეს მთავარსარდალსაც მიმართა, მაგრამ მიხეილ სააკაშვილს იმპულსურობა ახასიათებს, რაც საკუთარ თავზე არაერთხელ ვიწვნიეთ. მან ამ შემთხვევაში "მე ეგრე მინდას" პრინციპით შეარჩია კადრი. ჩემი პროგნოზით, მალე ყველაფერი თავის ადგილზე დადგება და გენშტაბის უფროსის თანამდებობას ვახტანგ კაპანაძე დაიკავებს.
შეიძლება ითქვას, რომ ქართულმა ჯარმა, ისე როგორც მთელმა საზოგადოებამ, მრავალწლიანი სახადი მოიხადა და ახლა ჩვენზეა დამოკიდებული, როგორ ღირსეულად გავივლით რეაბილიტაციის პერიოდს, აღარ უნდა დავუშვათ, რომ ხელისუფლებაში ავადმყოფურად დაკომპლექსებული უსამშობლო და უპასუხისმგებლო ადამიანები მოვიდნენ.
- როცა მუხროვანის ამბოხში მონაწილეობის ბრალდებით დაგაპატიმრეს, პრეზიდენტმა სააკაშვილმა თქვენზე თქვა: გენერალი კობალაძე ადრე იყო მისახედი, ბოროტების გარდა ქვეყნისთვის არაფერი გაუკეთებიათო.
- ბოლო მოვლენებმა დაადასტურა, რომ სახელმწიფოებრივად აზროვნება სააკაშვილისთვის ბოროტებად ითვლებოდა; ასეთი ტერმინები პრეზიდენტის გარემოცვისთვის უცხო არ ყოფილა: ზოგი სისხლის დალევით იმუქრებოდა, განსხვავებულად მოაზროვნე ადამიანებს კეთროვანებს უწოდებდნენ და ა.შ. აღარაფერს ვამბობ იმაზე, რომ უდანაშაულობის პრეზუმფცია მათთვის არაფერს ნიშნავდა. მუხროვანის ამბოხი, რომლის შედეგადაც, ჩემი ჩათვლით, უპრეცედენტო რაოდენობის - 41 სამხედრო და სამოქალაქო პირი აღმოჩნდა საბრალდებო სკამზე, თავიდან ბოლომდე დადგმული სპექტაკლი იყო. ზოგი იმასაც ამბობს, გენერალი კობალაძე საპროცესო შეთანხმების შედეგად გაათავისუფლესო, რაზე უნდა შეთანხმდე, როცა აბსურდულ ბრალდებას გიყენებენ? დღემდე ციხეში ამ ბრალდებით დაპატიმრებული ბევრი პირი ზის, ღირსეული მებრძოლები, ვფიქრობ, ახალი ხელისუფლების პირველი ნაბიჯი მათი გათავისუფლება უნდა იყოს. ან იგივე ნორა კვიციანი, რომელიც აშკარად სინდისის პატიმარია. იმ ქვეყანაში, სადაც სტუმრად მისული მამაკაცი, თუ სახლში მხოლოდ ქალი დახვდებოდა, ზღურბლს არ გადააბიჯებდა, ნორა კვიციანი მხოლოდ იმიტომ დააპატიმრეს, რომ ემზარ კვიციანის დაა. ის ერთი კაცის ახირების მძევალია, ისევე როგორც ლევან გოგიჩაიშვილი ან შოთიკო იამანიძე. თუნდაც მათი გუნდის ერთ-ერთი მედროშის, კერძოდ ირაკლი ოქრუაშვილის სახელთან ასოცირებული გორელი ბიჭები, რომლებიც ასევე შეთხზული ბრალდებებით იხდიან სასჯელს. აღარაფერს ვამბობ მუხროვანის ფსევდოაჯანყების მონაწილეებზე. ხელისუფლების სათავეში იყვნენ უსამშობლო, უფესვებო ადამიანები, რომლებმაც პოლიტიკური მარცხის შემდეგ უარი თქვეს მოვალეობაზე და ქვეყანა დატოვეს... ისინი თავის ქვეყანაში ისე იქცეოდნენ, როგორც ღირსეული ჯარისკაცი მტრის ტერიტორიაზეც კი არ მოიქცევა... ყველაფერს სამართლებრივი შეფასება უნდა მიეცეს, თუ ჩადენილი ბოროტება ვინმეს შერჩა, შესაძლოა, ვინმეს კიდევ გაუჩნდეს მისი ჩადენის სურვილი.
- როგორ ხედავთ თქვენს როლს შეიარაღებული ძალების მშენებლობის პროცესში და თუ მიიღეთ რაიმე კონკრეტული შეთავაზება ირაკლი ალასანიასგან?
- დღეს ბევრი "დაჩაგრული" და "გულში ოპოზიციონერი" ალაპარაკდა. ამ ხნის მანძილზე არც ერთი ნაბიჯი არ გადაგვიდგამს იმისთვის, რომ ოდესმე ვინმე რაღაცას შემოგვთავაზებდა... 2008 წლის აგვისტოს ტერიტორიების გადაბარების ოპერაციის შემდეგ დავინახეთ, რომ სამხედრო სფეროში აუცილებელი იყო კრიტიკული აზრის გაჩენა, ამ მიზნით შეიქმნა საქართველოს შეიარაღებული ძალების გენერალთა კლუბი და მასში გაერთიანებული ოფიცერთა ორდენი, სადაც შერისხულებმა მოვიყარეთ თავი. ახალმა თავდაცვის მინისტრმა დანიშვნისთანავე ბრძანა, რომ მჭიდრო ურთიერთობა ექნება და გაიზიარებს იმ დიდ სამხედრო გამოცდილებასა და პოტენციალს, რომელიც ასე უხვადაა დაგროვილი, მათ შორის საუბარი იყო გენერალთა კლუბთან მჭიდრო თანამშრომლობაზეც. ნუ გავუსწრებთ მოვლენებს, ყოველთვის მზად ვიყავით და ვიქნებით ჩვენი ქვეყნის სამსახურისათვის თუნდაც რიგით ჯარისკაცებად.
- ლეონარდო დევდარიანმა გაზეთ "კვირის პალიტრასთან" ინტერვიუში განაცხადა, რომ ახალგორის დაბრუნებაზე თვითონ ქართველმა პოლიტიკოსებმა თქვეს უარი.
- ზემოთ მოგახსენეთ ჩემი აზრი 2008 წლის ტრაგიკულ მოვლენებზე. არ ვიცი, რომელ დაბრუნებაზეა უარი ნათქვამი, ან რა აზრი ჰქონდა ამ უარს, როცა მოქმედებებით უკვე გადაბარებული იყო ეს ტერიტორიები. რამდენადაც მძიმე უნდა იყოს ეს შეფასება, ფაქტი მაინც რჩება ფაქტად. მე ქედს ვიხრი იმ ღირსეული მამულიშვილების ხსოვნის წინაშე, რომლებმაც კიდევ ერთხელ დაამტკიცეს ქართული მეომრული გენის აღმატებულება. ზუსტად ამიტომაა გამოსაძიებელი 2008 წლის აგვისტოს ავანტიურა და ამ პროცესების სამართლებლივი შეფასებაა საჭირო.
ნინო კვიტაშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
