18
ივნისიდღის ზოგადი ასტროლოგიური პროგნოზი
საპარლამენტო უმცირესობა პრეზიდენტის ფრენას სახელმწიფოებრივ საქმედ მიიჩნევს. როგორც "ინტერპრესნიუსს" დეპუტატმა დავით დარჩიაშვილმა განუცხადა, პრემიერ-მინისტრის მოსაზრებას პრეზიდენტის ხარჯების შემცირებასთან დაკავშირებით მართებულად არ თვლის.
"პრეზიდენტის სასახლე და პრეზიდენტის ხარჯები არის ქვეყნის შემდგარობის ერთ-ერთი მაჩვენებელი. მესმის, რომ ბატონ ივანიშვილს სახელმწიფოს მშენებლობასთან შეხება არ ჰქონია. მას აქვს ბიზნესის გამოცდილება და სახელმწიფო ცოტა სხვა რამ არის. ჩამოაყალიბოს არგუმენტები, რა ხარჯებს მიიჩნევს ის ზედმეტად. არ გამოვრიცხავ, რომ რაღაცაში მის არგუმენტებს ლოგიკა ჰქონდეს, თუმცა სახელმწიფოს რომ სჭირდება საჯარო, საერო თუ საეკლესიო შენობები, რომლებიც იაფი არ ჯდება, ეს ყველას უნდა ესმოდეს. პრეზიდენტის ფრენაც სახელმწიფოებრივ საქმედ მიმაჩნია", - განაცხადა დარჩიაშვილმა.
ბიძინა ივანიშვილი მიხეილ სააკაშვილს მთავრობის კანცელარიაში არსებული საპრეზიდენტო რეზიდენციით სარგებლობისკენ მოუწოდებს.
როგორც ივანიშვილმა მთავრობის სხდომის შემდეგ ჟურნალისტებს განუცხადა, პრეზიდენტის მომსახურებაში ბიუჯეტიდან ძალიან დიდი თანხები იხარჯება, რაც დაუშვებელია.
"ჩვენ მკვეთრად შევამცირებთ პრეზიდენტის ადმინისტრაციის დაფინანსებას, რადგან მის მომსახურებაში ძალიან დიდი ხარჯებია. 800 000 ლარი მხოლოდ პრეზიდენტის სასახლის ელექტროენერგიის გადასახადისთვის გამოიყო. სააკაშვილი, რომელიც ვადას იგრძელებს, ბიუჯეტიდან ამხელა თანხას მოიხმარს. ქვეყანაში, სადაც ამდენი გაჭირვებული ადამიანი ცხოვრობს, პრეზიდენტის მომსახურებაზე ამხელა ხარჯების გაწევა წარმოუდგენელია. ჯერ მხოლოდ თავდაცვის სამინისტროს ბიუჯეტიდან ყოველწლიურად 800 000 ლარი ირიცხება, სააკაშვილის მეორე თვითმფრინავის შენახვაზე, პირველი თვითმფრინავის ხარჯები ჯერ ისევ არ გვაქვს გარკვეული", - განაცხადა ივანიშვილმა. მისივე განმარტებით, ასეთი ტიპის დაფინანსებები აღარ იქნება და შეიკვეცება ბევრი ხარჯი. შესაბამისად, პრემიერ-მინისტრი პრეზიდენტს მოუწოდებს, მთავრობის კანცელარიაში არსებული საპრეზიდენტო რეზიდენციით ისარგებლოს, რომელიც, ივანიშვილის ინფორმაციით, ამ ეტაპზე დალუქულია და მას ისეთივე ფართობი უკავია, როგორც პრემიერ მინისტრის რეზიდენციას.
მისივე განმარტებით, მოწოდების გარდა მთავრობა კანონის ფარგლებში გამოიყენებს ყველა ბერკეტს, რათა პრეზიდენტის სასახლის დაფინანსება მაქსიმალურად შეიზღუდოს.
