დავით ბაქრაძე - ვიცე-სპიკერის პოსტზე გიორგი ბარამიძის კანდიდატურა დასახელდება

საპარლამენტო უმცირესობა პარლამენტში სამ ფრაქციას შექმნის. როგორც დღეს გამართულ ბრიფინგზე "ნაციონალური მოძრაობის" ერთ-ერთმა ლიდერმა დავით ბაქრაძემ განაცხადა, საპარლამენტო უმცირესობის ფარგლებში სამი ფრაქცია შეიქმნება.

ბაქრაძის თქმით, პირველი ფრაქცია იქნება "ერთიანი ნაციონალური მოძრაობა" და მას გოკა გაბაშვილი უხელმძღვანელებს, მეორე - "ნაციონალური მოძრაობა- რეგიონები" და მას აკაკი ბობოხიძე უხელმძღვანელებს, მესამე კი - "ნაციონალური მოძრაობა - მაჟორიტარები" იქნება, რომლის თავმჯდომარე ტარიელ ლონდარიძე იქნება.

"ერთიანი საპარლამენტო უმცირესობის ფარგლებში რამდენიმე ფრაქცია შეიქმნება. ეს კეთდება იმისთვის, რომ ოპოზიციას პარლამენტში ჰყავდეს მეტი გამომსვლელი, მეტი ხმა ბიუროზე, მეტი ფრაქციის აპარატი და აქედან გამომდინარე იქნა მიღებული გადაწყვეტილება, რომ ერთიანი საპარლამენტო უმცირესობის ფარგლებში სამი ფრაქცია შექმნილიყო", - აღნიშნა დავით ბაქრაძემ.

მისივე თქმით, საპარლამენტო უმცირესობის მხრიდან ვიცე-სპიკერის პოსტზე წარდგენილი იქნება გიორგი ბარამიძე.

რაც შეეხება თავად საპარლამენტო უმცირესობას, მას დავით ბაქრაძე უხელმძღვანელებს.

"ინტერპრესნიუსი"