9
ივნისიდღის ზოგადი ასტროლოგიური პროგნოზი
"სამოქალაქო განვითარების ინსტიტუტის" გამგეობის თავმჯდომარე ია ანთაძე პრემიერ-მინისტრობის კანდიდატ ბიძინა ივანიშვილს განათლების მინისტრის დასახელებამდე სპეციალისტებთან კონსულტაციების გავლას სთავაზობს.
როგორც "ინტერპრესნიუსს" ია ანთაძემ განუცხადა, "სამოქალაქო განვითარების ინსტიტუტის" ერთ-ერთი პრიორიტეტი საგანმანათლებლო მიმართულებაა, ამიტომ ორგანიზაცია დაინტერესებულია, რომ სისტემის სათავეში მოვიდეს ადამიანი, "რომელმაც იცის საჯარო სივრცეში ქცევის წესები და წილნაყარია მსოფლიო პროგრესთან".
"ჩვენს ორგანიზაციაში ძალიან ყურადღებით განვიხილეთ "ქართული ოცნების" პროგრამა განათლების შესახებ. შევაფასეთ, რომ მთლიანობაში პროგრამა იყო საქმეში კარგად ჩახედული ადამიანის დაწერილი. გვქონდა ინტერესი თუ ვინ დაწერა ეს პროგრამა და ვფიქრობდით, რომ ის ადამინი იქნებოდა მომავალში განათლების მინისტრი. თუმცა, დღემდე არ ვიცით ვინ არის პროგრამის ავტორი და რატომ არ არის მისი კანდიდატურა დაყენებული მინისტრად. წარმოიდგინეთ, პროგრამა დაწერა სხვამ და ახლა ეძებენ მინისტრად ვიღაცას, რომელსაც შეიძლება ეს პროგრამა საერთოდ წაკითხული არ აქვს, ეს არის ცუდი", - აღნიშნა ანთაძემ.
მისივე თქმით, საზოგადოებამ მინისტრთა კაბინეტის დაკომპლექტების პროცესი დიდწილად მოიწონა, თუმცა ის, რომ განათლების მინისტრობის კანდიდატი ამ დრომდე დასახელებული არ არის, ორ ფაქტორზე მიუთითებს. "განათლების მინისტრობის კანდიდატის დასახელების გაჭიანურების მიზეზი შეიძლება იყოს ორი: ერთი ის, რომ კოალიციისთვის განათლება ძალიან პრიორიტეტულია და კადრს ყურადღებით არჩევენ და, მეორე ის, რომ ეს საკითხი პრიორიტეტულად არ მიაჩნიათ, ყველას თავის კანდიდატურა ჰყავს და სიტუაცია კანდიდატებს შორის გახლართულია", - განაცხადა ია ანთაძემ.
მისივე თქმით, განათლების სპეციალისტებს, რომელთაც ივანიშვილთან შეხვედრა სურთ, მინისტრობის ერთიანი კანდიდატი არ ჰყავთ, თუმცა, ისინი სისტემის ხელმძღვანელის თაობაზე ივანიშვილს საკუთარ მოსაზრებებსა და რჩევებს გააცნობენ.
"პირადად მე ამ პოსტზე მივესალმებოდი გია დვალის, მარინე ჩიტაშვილის, ვასილ მაღლაფერიძის კანდიდატურას, თუმცა ეს დილეტანტის აზრია. ამიტომ საჭიროა, პროფესიონალები შეხვდნენ ივანიშვილს და მასთან განიხილონ ის კრიტერიუმები, რომლებსაც განათლების მინისტრი აუცილებლად უნდა აკმაყოფილებდეს. აშკარად დახმარება სჭირდება ადამიანს, ნუ გადაწყვეტენ ამ საკითხს პარტიული კვოტებით, რაკი გაიჭედა ეს საკითხი, მოდით, გადავწყვიტოთ ისე, როგორც საზოგადოებას მიაჩნია სწორად", - აღნიშნა ანთაძემ.
