5
ივნისიდღის ზოგადი ასტროლოგიური პროგნოზი
ახალი პარლამენტის სპიკერატში "ერთიანი ნაციონალური მოძრაობა", სავარაუდოდ, ორი ვიცე-სპიკერით იქნება წარმოდგენილი. ამის შესაძლებლობას ოპოზიციაში გადასულ პოლიტიკურ გაერთიანებას, რომელიც პარლამენტში უმცირესობის ფორმირებას გეგმავს, რეგლამენტი აძლევს.
ზოგადად, რეგლამენტის თანახმად, ოპოზიციისთვის სპიკერატში სამი ადგილია გათვალისწინებული. კერძოდ, აღნიშნული კანონის გათვალისწინებით, პარლამენტის ვიცე-სპიკერის თითო კანდიდატურის, მაგრამ არა უმეტეს 3-ის წარდგენის უფლება აქვს იმ საარჩევნო სუბიექტების მიერ შექმნილ ფრაქციებს, რომლებმაც საარჩევნო ბარიერი გადალახეს და უმრავლესობაში არ არიან გაერთიანებული.
შესაბამისად, 2012 წლის მოწვევის პარლამენტში უმრავლესობის გარეთ დარჩენილი "ერთიანი ნაციონალური მოძრაობა" სპიკერატში ვიცე-სპიკერს საკუთარი რიგებიდან აუცილებლად წარადგენს. ამასთან, თუკი "ნაცმოძრაობის" მხარდაჭერით პარლამენტში გასული მაჟორიტარები ცალკე ფრაქციად ჩამოყალიბდებიან, ვიცე-სპიკერის დასახელების შესაძლებლობა მათაც ექნებათ.
გარდა ამისა, ოპოზიციას უფლება აქვს ყველა საპარლამენტო კომიტეტში, კომიტეტის თავმჯდომარის თითო-თითო საკუთარი მოადგილე წარადგინოს.
თანამდებობის პირები უმცირესობიდან, რაც თავის მხრივ ვიცე-სპიკერის, ფრაქციის თავმჯდომარის და უმცირესობის ლიდერის პოსტებს შეეხება, წარმოდგენილი იქნება პარლამენტის ბიუროში.
"ნაცმოძრაობაში" ირწმუნებიან, რომ პარლამენტში მათთვის განკუთვნილ კვოტებზე წარსადგენ კონკრეტულ კანდიდატურებთან დაკავშირებით ჯერჯერობით არ ჩამოყალიბებულან. როგორც "ინტერპრესნიუსს" პარლამენტის ერთ-ერთმა ყველაზე სტაჟიანმა ვიცე-სპიკერმა გიგი წერეთელმა განუცხადა, ამ მიმართულებით კონსულტაციები ჯერ არ გამართულა. აქვე წერეთელმა ხაზი გაუსვა, რომ ოპოზიციის გაძლიერებისათვის პარლამენტმა თავის დროზე კონკრეტული ნაბიჯები გადადგა და უმცირესობა ყველა პოზიციაზეა წარმოდგენილი.
პეტრე ცისკარიშვილიც ადასტურებს, რომ გადაწყვეტილება იმის შესახებ, თუ ვინ დასახელდება მათი მხრიდან ვიცე-სპიკერად და ვის წარადგენენ კომიტეტებში, ჯერ გარკვეული არ არის. ცისკარიშვილი ასევე ირწმუნება, რომ ჯერ კიდევ გაურკვეველია, ვინ გახდება უმცირესობის ლიდერი.
