27
მაისიდღის ზოგადი ასტროლოგიური პროგნოზი
როდესაც 5 ოქტომბერს ცნობილი გახდა, რომ მოქმედი ხელისუფლება "ქართულ ოცნებას" ყველა საკვანძო უწყებას, მათ შორის შსს-ს და თავდაცვის სამინისტროს გადააბარებდა, ზოგიერთმა ექსპერტმა გაკვირვება გამოთქვა - როგორ დათმო მიხეილ სააკაშვილმა ეს უწყებები წინააღმდეგობის ან "ვაჭრობის" გარეშეო. თუმცა ამ ექსპერტებს ალბათ, დაავიწყდათ, რომ 2013 წლის ოქტომბრამდე ჯერ კიდევ ძალაშია ის კანონმდებლობა" რომელიც პრეზიდენტს განუზომელ უფლებებს ანიჭებს.
ამ განუზომელი უფლებებით აღჭურვილი "ოპოზიციონერი" პრეზიდენტი უკვე ამოქმედდა. როგორც ჩანს, მიხეილ სააკაშვილი აპირებს, სახელმწიფო დაცვის სპეციალური სამსახურის(სდსს) ბაზაზე შექმნას რაღაც ჰიბრიდული პარალელური სტრუქტურა, რომელიც ერთდროულად სხვადასხვა უწყებების უფლებამოსილებით იქნება აღჭურვილი.
ბოლო ბრძანებით სააკაშვილმა შსს-დან გამოყო სახელმწიფი სპეციალური კავშირებისა და ინფორმაციის სააგენტო და დაუქვემდებარა სდსს-ს, რომელიც თავის მხრივ, უშუალოდ პრეზიდენტს ემორჩილება. ზემოხსენებულ სააგენტოს სტრატეგიული მნიშვნელობა აქვს. მაგალითად, ახალ მთავრობაში სამთავრობო ხაზით პრემიერი ივანიშვილი შს მინისტრ ღარიბაშვილს რომ დაურეკავს, სწორედ ამ სააგენტომ უნდა უზრუნველყოს კავშირის დახურულობა და ის, რომ ივანიშვილ-ღარიბაშვილის საუბარი უცხოურმა სპეცსამსახურებმა არ მოისმინონ. გარდა ამისა, სწორედ ეს სააგენტო ასრულებდა მოქმედი ხელისუფლების "ყურების" როლს და უსმენდა ყველას და ყველაფერს.
სდსს-სთვის ზემოხსენებული სააგენტოს დაქვემდებარებას ვერანაირი ფორმალური მიზეზით ვერ აიხსნება, რადგან ასეთი სტრუქტურა ამ სამსახურში უკვე არსებობდა. ოღონდ, ეს სტრუქტურა შიდამაკონტროლებელის როლს ასრულებდა და ძირითადად, "მიყურადებული" იყო მნიშვნელოვან სამინისტროებზე და სტრუქტურებზე, ვინმეს "კურსისთვის" რომ არ გადაეხვია.
მოკლედ, პრეზიდენტს ზემოხსენებული განკარგულების შემდეგ შეეძლება, აკონტროლოს ახალი მთავრობის შიდა საუბრები დაწყებული პრემიერით და ელჩით დამთავრებული. შსს-მ კი მძიმე დარტყმა მიიღო და წმინდა კრიმინალური პოლიციის უფლებები დარჩა. ფორმალურად, ღარიბაშვილს დაექვემდებარება კონტრდაზვერვის დეპარტამენტი, რომელიც ზემოხსენებული სააგენტოს გარეშე, რბილად რომ ვთქვათ, ნაკლებადეფექტური იქნება.
მიხეილ სააკაშვილმა სდსს ეკონომიკური მიმართულებითაც "გააძლიერა". მან ეკონომიკის სამინისტროს დაქვემდებარებიდან გამოიყვანა სახელმწიფო უზრუნველყოფის სააგენტო და სდსს-ს გადასცა.
სახელმწიფო უზრუნველყოფის სააგენტო ერთ-ერთი ყველაზე დახურული სტრუქტურა იყო "ნაციონალური" ხელისუფლების პირობებში. სწორედ ამ სააგენტოს გადაეცემოდა ხოლმე ამა თუ იმ ბიზნესმენისთვის ჩამორთმეული ქონება; ბიუჯეტის პარალელურად, სწორედ ამ სააგენტოს ეგიდით ფინანსდებოდა ბევრი ისეთი ღონისძიება, რომელიც საზოგადოებაში დიდ კითხვის ნიშნებს აჩენდა. რაც მთავარია - ამ სააგენტო ხარჯების გაშიფვრით, ავტომატურად გაიშიფრება, თუ რა უჯდებოდა სახელმწიფოს ქართული სამთავრობო დელეგაციების ვიზიტი, რამდენს ხარჯავდა ხელისუფლება ფარულ თუ აშკარა ღონისძიებებში, სად წავიდა ის ქონება, პროკურატურის "რჩევით" რომ "ჩუქნიდნენ" ხოლმე ბიზნესმენები სახელმწიფოს და ა.შ.
თუმცა ამ ეტაპზე ვერაფერსაც ვერ გავიგებთ - ეს სტრუქტურა პრეზიდენტმა უშუალოდ დაიქვემდებარა.
საინტერესოა, რა იქნება შემდეგი ნაბიჯი და რა უფლებამოსილებებით აღიჭურვება პარალელული მთავრობა სდსს-ს სახით. ამ ლოგიკით, არ არის გამორიცხული, რომ ამ სამსახურს დაექვემდებაროს მაგალითად, გზების დეპარტამენტი ან თბილისის მერიის ტენდერების სამსახური, რადგან ამ სტრუქტურებთანაც დაკავშირებითაც უამრავი კითხვაა.
ვნახოთ, რას გადაწყვეტს უზარმაზარი უფლებებით აღჭურვილი ოპოზიციონერი პრეზიდენტი.
გიორგი კვიტაშვილი
