29
ივნისიდღის ზოგადი ასტროლოგიური პროგნოზი
შვეიცარიაში იძულებით გადახვეწილმა ბიზნესმენმა დავით ბეგიაშვილმა ცოტა ხნის წინ გამოაქვეყნა სია იმ 145 ბიზნესმენისა, რომლებიც სააკაშვილისთვის ხარკის გადაუხდელობის გამო დააპატიმრეს. მათ შორის არის ბიზნესმენი გია პაიჭაძეც, რომელმაც 2005 წელს კულტურისა და სპორტის სამინისტროს მიერ გამოცხადებულ ტენდერში გაიმარჯვა და მისმა ფირმამ ქართველი ახალგაზრდებისთვის ე.წ. "პატრიოტის" ფორმები დაამზადა.
ენდი დანელია-პაიჭაძე, ბიზნესმენის მეუღლე: - ჩემი მეუღლე, გია პაიჭაძე შპს "მარიამისა" და "მარის" დირექტორი გახლდათ. იგი 2011 წლის 3 აგვისტოს დააკავეს ყალბი ანგარიშფაქტურების გამოყენებისთვის და 210-ე მუხლი წაუყენეს. ერთი ადამიანის ჩვენების საფუძველზე დაიჭირეს 70 კაცი, მაგრამ ამჟამად მხოლოდ გია იხდის სასჯელს. ის უკანონო პატიმარია, რომელსაც 10 წლით აღუკვეთეს თავისუფლება. დღემდე ამაოდ ველოდებით გამამართლებელ განაჩენს. მის საკითხს არც იხილავენ, იბარებენ სასამართლო პროცესზე და მარტო სახელსა და გვარს ეკითხებიან, საქმეზე - არაფერს. გიამ ისე განიცადა ეს ამბავი, რომ ნერვიულობისაგან დიაბეტით დაავადდა. მას აღიარებითი ჩვენება გამოსძალეს - 6 კაცი ადგა თავს და ისე მოაწერინეს ჩვენებაზე ხელი. გამოძიებასთან თანამშრომლობისას გიამ აღიარა, რომ 2005 წელს, "პატრიოტის" ფორმებზე გამოცხადებულ ტენდერში გამარჯვების სანაცვლოდ, მან კულტურისა და სპორტის მინისტრის მოადგილე ლადო ვარძელაშვილს გადასცა 200 ათასი დოლარი. არ ვიცი, რა ხელი ჰქონდა ვარძელაშვილს ამ საქმეში, მაგრამ მის გარეშე ტენდერს ვერავინ მოიგებდა. გია მისმა პარტნიორმა გივი ქურხულმა დააკავშირა ლადო ვარძელაშვილს. ორივემ ერთად თურქეთში, სტამბოლის ერთ-ერთ სასტუმროში გადასცა ვარძელაშვილს 200.000 დოლარი. ეს იცის გამოძიებამ, ამას ყველა პროცესზე ამბობს გია, მაგრამ მას შემდეგ დიდი დრო გავიდა და დადასტურება ჭირს. 70 ბიზნესმენიდან სასჯელს მხოლოდ გია იხდის და ეს იმის გამო, რომ მან ხელი მინისტრს დაადო.
ქრისტინე ჩხიკვაძე, გია პაიჭაძის ადვოკატი: - გახსოვთ, იყო ასეთი პროგრამა - "პრეზიდენტის საჩუქარი ბავშვებს". სპორტის დეპარტამენტმა გამოაცხადა ტენდერი, რომელიც გია პაიჭაძის ფირმა "მარიამმა" მოიგო და შეკერა ფორმები. თუმცა ედავებიან, რომ ყალბი საბუთების საფუძველზე შეასრულა შეკვეთა. გიამ ქსოვილი თურქეთიდან ჩამოიტანა, ფორმების ძირითადი ნაწილი კი შეიკერა ლესელიძის ქუჩაზე მდებარე სამოდელო სახლში. გიას კომპანიონი გივი ქურხული თაღლითი აღმოჩნდა. ის ოფიციალურ დოკუმენტებში თითქმის არსად ფიგურირებს, რადგან გია იყო ფირმების დირექტორი. როდესაც დადგა საკითხი, სად შეკერილიყო პროდუქცია, ქურხულმა პაიჭაძესთან ერთად მიმართა მოდელების სახლის დამფუძნებელ მანაგაძეს, რომელმაც ისინი ბუღალტერ მაია ბოლქვაძესთან დააკავშირა, სწორედ მაია ბოლქვაძის ჩვენების საფუძველზეც დააკისრეს პასუხისმგებლობა 70-მდე ბიზნესმენს. ეს ქალი ბეჭდავდა ყალბ ანგარიშფაქტურებს, რომელსაც ბიზნესმენები ვითომ ყიდულობდნენ. ეს ყველაფერი ხდებოდა იმისთვის, რომ მოგება ყოფილიყო მეტი. ვინაიდან გია პაიჭაძემ მიიღო ყალბი ანგარიშფაქტურა, დღგ ჩაითვალა უკანონოდ. გია ამბობს, მე მივიღე შეკერილი საქონელი და ანგარიშფაქტურა, რაზეც მოვაწერე ხელი, მაგრამ, რა თქმა უნდა, არ ვიცოდი, ყალბი თუ იყოო. ანგარიშფაქტურების გაყალბება და მოგების მიღება მათ სჭირდებოდათ, ვინც პაიჭაძის გარეშე აკეთებდა ამ ყველაფერს. ლაპარაკია 18 ანგარიშფაქტურაზე. ეს ჯგუფური დანაშაულია, მაგრამ მხოლოდ პაიჭაძეს დააკისრეს პასუხისმგებლობა. თავდაპირველად ყველა ადამიანი დააკავეს, ვინც ამ საქმესთან იყო დაკავშირებული, მაგრამ გამოძიებასთან თანამშრომლობის შემდეგ გაუშვეს. ბუღალტერი მაია ბოლქვაძე კი ამჟამად პირობით სასჯელს სულ სხვა დანაშაულისთვის იხდის - ასეთია ხელისუფლების დამოკიდებულება ბიზნესმენებისადმი. როგორც გია ამბობს, იმისათვის, რომ ტენდერში მე-4-მე-5 ადგილზე გასულიყო, 200 000 უნდა გადაეხადა, ქრთამით კი პირველ ადგილზე გადანაცვლებაც შეიძლებოდა. როდესაც პაიჭაძემ ხელი დაადო მინისტრს, მოსამართლემ თქვა, ეს არ არის ჩემი განხილვის საგანი, პროკურატურას მიმართეთო. გენპროკურატურამ კი ჩვენი საჩივარი გადაუგზავნა სასჯელაღსრულების დეპარტამენტს, საიდანაც პასუხი დღემდე არ მიგვიღია. საჩივარი დაიბლოკა, რადგან მასში მინისტრი ფიგურირებს. პაიჭაძეს 10 წელი მიუსაჯეს, დანარჩენი 70 კაცი კი გაათავისუფლეს. გიას საპროცესო გარიგებაც შესთავაზეს და რადგან მან გარიგებაზე უარი თქვა, დაემუქრნენ, საპროცესოს თუ არ გააფორმებ, 5 წელს კიდევ დაგიმატებთო. ეს ადამიანი თავს უდანაშაულოდ მიიჩნევს. არადა, საპროცესო გარიგებაზე რომ წასულიყო, გიას ერთი წელიღა დარჩებოდა მოსახდელი. ამასთანავე, ამ საქმეში მთავარი მონაწილე არის გივი ქურხული, რომელზეც ძებნაა გამოცხადებული. მის საქმეს დაუსწრებლად იხილავენ, ჯერჯერობით პროცესი გადადებულია - ალბათ, არჩევნების ჩავლას ელოდებიან. პაიჭაძის საქმეს მოსამართლეები - ჩემია და თეთრაული იხილავდნენ.
P.S: ვცადეთ სპორტისა და ახალგაზრდულ საქმეთა მინისტრ ლადო ვარძელაშვილთან დაკავშირება, მაგრამ ვინაიდან რესპონდენტი მიუწვდომელი აღმოჩნდა, მისი პრესსამსახურის წარმომადგენელს, ვანო მაისურაძეს დავუკავშირდით. ის საკითხის გარკვევას დაგვპირდა და მოკლე ხანში გვიპასუხა კიდეც:
- ბატონი ლადო აღნიშნულ ბრალდებას არ ადასტურებს. იგი ამბობს, რომ ასეთი გვარ-სახელის პიროვნებებს არ იცნობს. მათ სამინისტროს მიერ გამოცხადებულ ტენდერთან კავშირი არ ჰქონიათ. ახლა დროა ისეთი, რაც შეიძლება ხმამაღალი ბრალდებები უნდა წაუყენო ადამიანებს. მინისტრი ირწმუნება, რომ ასეთ ფირმასთან და ამ ადამიანებთან შეხება არ ჰქონია(?!).
თეა მესხი
ყოველკვირეული გაზეთი "ყველა სიახლე"
(გამოდის ოთხშაბათობით)
