თეთრიწყაროს სასამართლომ N23 საარჩევნო უბანთან დაკავშირებით დავით ბეჟუაშვილის სარჩელი დააკმაყოფილა
თეთრიწყაროს რაიონულმა სასამართლომ დააკმაყოფილა "ერთიანი ნაციონალური მოძრაობის" თეთრიწყაროს მაჟორიტარი დეპუტატობის კანდიდატის, დავით ბეჟუაშვილის სარჩელი. ბეჟუაშვილი ქოსალარის N23 საარჩევნო უბნის შედეგების ბათილად ცნობასთან დაკავშირებით თეთრიწყაროს N26 საოლქო-საარჩევნო კომისიის გადაწყვეტილების გაუქმებას ითხოვდა.
ოფიციალური ინფორმაციით, მოსამართლემ გადაწყვეტილება ადვოკატების დაუსწრებლად გამოაცხადა, რადგან არც ერთი მხარის ადვოკატი პროცესზე არ გამოცხადდა.
როგორც "ინტერპრესნიუსის" კორესპონდენტი იუწყება, მოსამართლის გადაწყვეტილებას ხმაური მოჰყვა თეთრიწყაროს სასამართლოს წინ შეკრებილი "ქართული ოცნების" აქტივისტების მხრიდან.
"ქართული ოცნების" აქტივისტებმა გზა გადაუღობეს სასამართლოსკენ მიმავალ შავი ფერის "ჯიპს" და არ აძლევდნენ გადაადგილების საშუალებას. ასევე, შელაპარაკება მოხდა "ქართული ოცნების" აქტივისტებსა და იურისტებს შორისაც. ისინი ერთმანეთში არკვევდნენ, თუ როგორ მოხდა, რომ პროცესს არ ესწრებოდა ადვოკატი.
დღესვე თეთრიწყაროს რაიონულ სასამართლოში ჩატარდება მორიგი სასამართლო პროცესი. კერძოდ, სარჩელი აქვს შეტანილი "კახა კუკავა - თავისუფალ საქართველოს". "თავისუფალი საქართველო" მოითხოვს კოდის N40 საარჩევნო უბნის შედეგების გაუქმებას. მოპასუხე მხარედ წარმოდგენილია თეთრიწყაროს N26 საოლქო-საარჩევნო კომისია, ხოლო მესამე მხარეს წარმოადგენს ლალი აფციაური და შალვა ხაჭაპურიძე.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
