11
ივნისიდღის ზოგადი ასტროლოგიური პროგნოზი
ერთადერთი, ვისაც როლანდ ახალაიას შეუძლია მადლობა გადაუხადოს, არის კუდ-ი, სოდ-ი, საკუთარი ვაჟიშვილები, გამყალბებლები და მეგის ქარდავა, რომელიც მართავდა იმ ზონდერ ჯგუფებს, რომლებიც დილიდან ღამემდე მოსახლეობას აშინებდნენ, - ამის შესახებ კოალიცია "ქართული ოცნების" ზუგდიდის მაჟორიტარი დეპუტატობის კანდიდატმა ირაკლი ალასანიამ ტელეკომპანია "მაესტროს" ეთერში გადაცემა "პოლიტმეტრში" განაცხადა.
მისი თქმით, სამეგრელოში 10 000-ზე მეტი გაყალბებული ბიულეტენია და 111 უბნიდან 40-ში ოქმში აღრიცხული ბიულეტენების რაოდენობა მოსული ამომრჩევლის რაოდენობას არ ემთხვევა, რაც ალასანიას შეფასებით, ნიშნავს, რომ ე.წ. "ომხური კარუსელი დატრიალდა. მისივე თქმით, არსებობს ვიდეომასალა, სადაც ტოტალური გაყალბება არის დაფიქსირებული.
"დაფიქსირებული გაყალბებები სამართლებრივად გაფორმდება, რაც იქნება საფუძველი იმისა, რომ ზუგდიდში ხელახალი არჩევნები ჩატარდეს. ე.წ. სომხური კარუსელითა და ძალოვანების თავგასულობით შედგა არჩევნები სამეგრელოში . მე დავპირდი ამომრჩეველს, რომ არც ერთ ხმას როლანდ ახალაიასა და მის ბანდას არ მოვაპარინებდი და მე ამ დაპირებას შევასრულებ! ჩვენ დავპირდით "ნაციონალურ მოძრაობას", რომ გადავიყვანდით უმცირესობაში და ახლა "ნაციონალური მოძრაობა" უმცირესობაშია", - განაცხადა ალასანიამ და დასძინა, რომ სამეგრელოს "მწყემსავდნენ" ბაჩო და დათა ახალაიები და მათ მიერ იყო განხორციელებული ყველა ის ძალადობა რაც იქ მოხდა.
მისივე თქმით, მიხეილ სააკაშვილმა გაძარცვა თბილისი პოლიტიკური ფუნქციებისგან, ისევე როგორც ზუგდიდი გაძარცვა სამეგრელოს ცენტრის ფუნქციებისგან, როდესაც სამეგრელოს გვირგვინად ლაზიკა გამოაცხადა. თუმცა ალასანიას განცხადებით, "ქართული ოცნება" მზად არის იმუშაოს მიხეილ სააკაშვილთან, ვიდრე იგი არ დაასრულებს საპრეზიდენტო ვადას.
მისივე თქმით, პოლიტიკური ცვლილებები საჯარო მოხელეებს, გარდა მინისტრებისა და მათი მოადგილეებისა, არ შეეხებათ და ისინი დეპოლიტიზებულები იქნებიან.
ამასთან, ალასანია რუსეთ-საქართველოს ურთიერთობის საკითხსაც შეეხო და განაცხადა, რომ საქართველოს ევროპულ ოჯახში გაწევრიანება არ ნიშნავს იმას, რომ საქართველოს უნდა ჰქონდეს ომის ვითარება რუსეთთან.
"საქართველო არ უნდა იქცეს განხეთქილებისა და პრობლემის კერად დასავლეთსა და რუსეთს შორის, არამედ უნდა იყოს შეთანხმების საგანი", - აღნიშნა ალასანიამ.
