მიხეილ სააკაშვილი - "პროპორციულ კენჭისყრაში უპირატესობა "ქართულმა ოცნებამ" მოიპოვა, როგორ ჩანს, მაჟორიტარულ ოლქებში მნიშვნელოვანი უპირატესობა "ერთიან ნაციონალურ მოძრაობას" აქვს"

პროპორციულ კენჭისყრაში უპირატესობა "ქართულმა ოცნებამ" მოიპოვა, რაც შეეხება მაჟორიტარულ ოლქებს, იქ, როგორ ჩანს მნიშვნელოვანი უპირატესობა "ერთიან ნაციონალურ მოძრაობას" აქვს , - ამის შესახებ საქართველოს პრეზიდენტმა მიხეილ სააკაშვილმა სატელევიზიო მიმართვისას განაცხადა.

მიმართვაში მან მადლობა გადაუხადა ყველას, ვინც საარჩევნო უბნებზე მივიდა და საკუთარი პოზიცია სრული თავისუფლების პირობებში დააფიქსირა, ისე, როგორც ამას ხელისუფლება ჰპირდებოდა.

"ჯერჯერობით საარჩევნო შედეგები ითვლება და ჩვენ მინიმუმ რამდენიმე საათი დაგვჭირდება, სანამ სრული სურათი გამოიკვეთება, მაგრამ უკვე ეგზიტპოლის თანახმად, შეიძლება ითქვას, რომ პროპორციულ კენჭისყრაში უპირატესობა "ქართულმა ოცნებამ" მოიპოვა, რაც შეეხება მაჟორიტარულ ოლქებს, იქ, როგორ ჩანს, მნიშვნელოვანი უპირატესობა "ერთიან ნაციონალურ მოძრაობას" აქვს. საქართველოში საარჩევნო სისტემა იმგვარად არის მოწყობილი, რომ პარლამენტში პროპორციულ და მაჟორიტარულ ნაწილში ხმები დაახლოებით შუაზე იყოფა. ეს იმის გამოა გაკეთებული, რომ ყველა რეგიონი და პატარა რაიონიც კი წარმოდგენილი იყოს და პარლამენტსა და მთავრობაში ყველა მოქალაქის ხმა ისმოდეს", - აღნიშნა პრეზიდენტმა.

მისივე თქმით, საბოლოო ჯამში უნდა დაითვალოს და გაირკვეს, ვის ექნება უმრავლესობა პარლამენტში, მაგრამ დღევანდელი სურათით ნათელია, რომ არჩევნები შედგა, რის შემდეგაც პარლამენტის წევრებმა თავიანთი ადგილები უნდა დაიკავონ და დემოკრატიულ პროცესებში ჩაერთონ. პრეზიდენტის განცხადებით, პროპორციულ ხმებში "ქართული ოცნების" ძირითადი უპირატესობა ეფუძნება საქართველოს დედაქალაქში აღებულ ხმებს, თბილისის გარეთ, პრაქტიკულად ყველა რეგიონში ასევე დიდი უპირატესობით ლიდერობს "ნაციონალური მოძრაობა".

"მაგრამ ეს სულაც არ ნიშნავს, რომ ჩვენ ვყოფთ ქვეყანას - თბილისად და რეგიონებად, ჩვენ ყველანი ქართველები და ჩვენი ქვეყნის მოქალაქეები ვართ. არსებული დემოკრატიის პირობებში ერთად უნდა შევძლოთ მუშაობა და საქართველოს ყველა მოქალაქის ინტერესის დაცვა. ჩვენ უნდა შევძლოთ საქართველოს ყველა რეგიონისა და მოქალაქის ინტერესების წარდგენა და დაცვა ახალ პარლამენტში. მე, როგორც პრეზიდენტი გარანტი ვარ იმისა, რომ ამ პარლამენტის ქუთაისში გადასვა უმტკივნეულოდ და კონსტიტუციის ფარგლებში მოხდება. მე დარწმუნებული ვარ, რომ ახალი პარლამენტი შეძლებს ქვეყნისთვის სასარგებლო გადაწყვეტილებების მიღებას უახლოესი თვეების განმავლობაში", - დასძინა მიხეილ სააკაშვილმა.

"ინტერპრესნიუსი"