ბიძინა ივანიშვილი - აუდიოჩანაწერები დამონტაჟებულიც რომ არ იყოს, კატასტროფა არაფერია
ბესო სურმავას მიერ ატვირთული ფარული აუდიოჩანაწერები დამონტაჟებულიც რომ არ იყოს, კატასტროფა არაფერია, - ამის შესახებ კოალიცია "ქართული ოცნების" ლიდერმა, ბიძინა ივანიშვილმა "მე-9 არხზე", გადაცემაში "ხაზზეა საქართველო" სტუმრობისას განაცხადა.
მისი თქმით, ბესო სურმავა ძალიან კარგი ადამიანია და მასთან მეგობრობდა, როგორც დაცვის დანარჩენ წევრებთან.
"მთელი დაცვა შოკშია. ვერ გაუგიათ, რა ხდება. ძალიან დიდი ეჭვია, რომ ეს ხელისუფლების ახალი ფანდია. რაც შეეხება ჩანაწერებს, სურმავა არაფერ შუაშია და ეს ჩვეულებრივია, ტიპიურია, რომ ისინი ყველაფერს უსმენენ და იწერენ. ეს კომბინაცია გაკეთებულია ხელისუფლების მიერ, რომ გადაკიდოს გუნდის წევრები ერთმანეთს. თუმცა ეს ყველაფერი დამონტაჟებულია და მსგავსი პრაქტიკაში არ ყოფილა, მაგრამ მთავარი ეს არ არის. ასეც რომ ყოფილიყო, აქ საოცარი არაფერი არ ხდება, რომ საზოგადოება შოკში ჩავარდეს, აქ კატასტროფა არაფერია. ამით ცდილობენ, როგორმე გადაფარონ ის წამებები, რაც ჩვენ ვნახეთ და რამაც მთელი მსოფლიო შოკში ჩაგდო. ამ დანაშაულებრივი ინფორმაციის გადაფარვა უნდათ ნებისმიერი ინფორმაციით. ამ დროს არაფერი ხდება, ყველაფერი მათივე დამონტაჟებულია, ჩვენ გვაქვს მეგობრული გუნდი" - განაცხადა ივანიშვილმა.
მისივე თქმით, ძალიან განიცდის დაცვის წევრის ბედს, რადგან მასზე ზეგავლენას ახდენენ, "რაღაცით ძალადობენ".
LIVE: გია ხუხაშვილი "ნიუსრუმიდან"
"ანტიგმირი უნდა დამალო" - გია ხუხაშვილი პარლამენტიდან ვანო ზარდიაშვილის წასვლაზე
