25
მაისიდღის ზოგადი ასტროლოგიური პროგნოზი
Youtube-ზე გავრცელებულ ვიდეოჩანაწერში დედაქალაქის მერი გიგი უგულავა ბიზნესმენ ბადრი პატარკაციშვილს პრორუსულ ინტერესების გატარებაში ადანაშაულებს და განუმარტავს, რომ ის ხელისუფლების საერთო პოზიციას აფიქსირებს.
"მე მესენჯერის ფუნქციას ვასრულებ, "ობში" პოზიციას გამოვხატავ. ისეთი სიტუაცია იქმნება, რომ წყალგამოყოფი ხაზები ივლება. განსაკუთრებით იკვეთება პრორუსების აქტივობები. როცა წყალგამოყოფი ხაზები ივლება, მერე იქეთაც და აქეთაც ვეღარ იქნები, მერე ან იქეთ ხარ ან აქეთ. თქვენი გადასაწყვეტია, მაგრამ საბოლოო ჯამში საკმაოდ დაშორდება ჩვენი პოზიციები", - მიმართავს გიგი უგულავა პატარკაციშვილს.
ამასთან, უგულავა განმარტავს, რომ ზედაპირზე "ბევრი რამე ჩანს".
"ცოცხალი ცეცხლია გახსნილია, არსებობს კონკრეტული მიზანი და კონკრეტული ამოცანები. რუსეთმა გახსნა ცეცხლი და თუ წამოეგები, მერე შენც ხარ ცეცხლი. სამწუხაროდ, ეს ხაზები გაივლო და ჩვენ აქეთა გუნდში ვართ, თქვენ იქეთა გუნდში. ეს არის რაც ჩანს. ყოველგვარი ეჭვების გარეშე ვამბობ - ბევრი რამე ჩანს. ასეთი რაღაცეები უნდა ითქვას, რომ მერე მოულოდნელი არ იყოს", - მიმართავს თბილისის მერი ბიზნესმენს.
ვიდეომასალის მიხედვით, უგულავას ბრალდებებს პატარკაციშვილი პასუხობს და დედაქალაქის მერს შეკითხვით მიმართავს: "აღმოჩნდა, რომ მე ვარ რუსეთის მხარეს და თქვენ ხართ ამ გუნდის მხარეს? სწორად მესმის? მე მინდა რომ დავაზუსტო ფორმულირება, რომ განსაზღვრებებში ვიყო ზუსტი. აღმოჩნდა, რომ მე თქვენ გებრძვით?", - ეკითხება პატარკაციშვილი უგულავას, რაზეც დედაქალაქის მერი პასუხობს, რომ მან "აბსოლუტურად სწორად გაიგო".
ვიდეოჩანაწერი პატარკაციშვილის განცხადებით მთავრდება, რომელიც ამბობს, რომ ის გუნდიდან "გავა და მის სწორ პოზიციას დააფიქსირებს".
"ამდენი ხნის განმავლობაში ვცდილობდი ვყოფილიყავი ის ადამიანი, ვინც გააკეთებდა ქვეყნისთვის საჭირო საქმეს. ის, რომ თქვენ ასე ფიქრობთ, ჩემთვის აბსოლუტურად განმსაზღვრელია. თქვენ თუ გგონიათ, რომ მე ვარ ის ადამიანი, რომელიც ამ რაღაცეების უკან დგას, მაშინ სულ ცოტა ვალდებულება მაქვს იმისა, რომ დაგანახოთ, როგორი ადამიანი ვარ მე. ყველაფერში, თუკი რამე შეიძლებოდა, დამჩაგრეს და გადამაგდეს. თქვენი მესიჯი აბსოლუტურად გასაგებია და მე რა ადამიანი ვარ, როგორ ვარ გახსნილი და საზოგადოების ან თქვენთვის რას ვაკეთებ, ამას აბსოლუტურად გამოვიტან და დავალაგებ. მე ერთი შემიძლია გითხრათ, არასოდეს ჩემი მხრიდან არაადეკვატური ნაბიჯი არ ყოფილა. თუ თქვენ მიიჩნევთ, რომ ის ნაბიჯები, რომელიც იდგმება არაადეკვატური და მეტიც, არასწორია, მაშინ არანაირი პრობლემა არაა, მე გამოვალ და ჩემს სწორ პოზიციას დავაფიქსირებ. მე მიმაჩნდა, რომ ჩემი სწორი პოზიცია გაახარებდა მტრებს და 9 თვე ამიტომ საერთოდ გავერიდე ყველაფერს და ვიყავი ჩუმად", - განაცხადა პატარკაციშვილმა.
ბიზნესმენის მხრიდან აღნიშნული პოზიციის დაფიქსირების შემდეგ უგულავა პატარკაციშვილთან შეხვედრის ადგილს ტოვებს.
ვიდეოჩანაწერი სოციალური ქსელით რამდენიმე საათის წინ გავრცელდა.
იხილეთ ვიდეო: "გინდათ თქვათ, რომ მე თქვენ გებრძვით?" - გიგი უგულავას და ბადრი პატარკაციშვილის საუბრის ჩანაწერი
