ეკა ბესელია - როგორი ფარული ვიდეომასალაც არ უნდა გამოაქვეყნოს ხელისუფლებამ, ეს საზოგადოებას კიდევ უფრო გააღიზიანებს

კოალიცია "ქართული ოცნების" წარმომადგენლის, ეკა ბესელიას შეფასებით, როგორი ფარული ვიდეომასალაც არ უნდა გამოაქვეყნოს ხელისუფლებამ მათ წინააღმდეგ, ეს საზოგადოების კიდევ უფრო მეტად გაღიზიანებას გამოიწვევს.

როგორც ბესელიამ დღეს, ჟურნალისტებთან შეხვედრაზე განაცხადა, ბესელია მიიჩნევს, რომ მაკომპრომენტირებელი ვიდეომასალები, რომლებიც გუშინ ხელისუფლებამ წარმოადგინა და, რომლის წარმოდგენაც ასევე საფრანგეთიდან ანონსდება, მხოლოდ ხელისუფლების არაადეკვატურობაზე მიუთითებს.

"მე არ ვიცი, კანონიერ ქურდებთან დაკავშირებით რა კავშირების ამსახველი მასალების წარმოდგენას აპირებს მიხეილ სააკაშვილი. შემიძლია წარმოვიდგინო, რომ ეს დაახლოებით იმგვარი მცდარი და ფალსიფიცირებული მასალა იქნება, რაც არაერთხელ გვინახავს ბრაზილიური ტელესერიალის სტილში. ხელისუფლება ყოველთვის ცდილობს, მოამზადოს ასეთი მასალები, როდესაც მას ყველაზე მეტად უჭირს და როცა ქვეყანაზე პოლიტიკური კრიზისია", - აცხადებს ეკა ბესელია.

მან ჟურნალისტებთან შეხვედრისას კრიმინალურ ავტორიტეტებთან და ქურდულ სამყაროსთან კავშირში თავად მიხეილ სააკაშვილი და ხელისუფლება დაადანაშაულა და აღნიშნა, რომ არანაირი რეალური მასალა, რაც ამ მიმართულებით "ქართული ოცნების" ბრალეულობაზე მიუთითებს, არ შეიძლება არსებობდეს.

ბესელიამ ჟურნალისტებთან შეხვედრისას აღნიშნა ისიც, რომ ფარული ვიდეოჩანაწერების მომზადებისას ხელისუფლება და მათი აგენტები მიმართავენ დანაშაულის პროვოცირებას, რაც სისხლის სამართლის კოდექსით გათვალისწინებული და დასჯადი დანაშაულია და რაზეც პასუხი თავად ხელისუფლებას უნდა მოეთხოვოს.

"ინტერპრესნიუსი"