ლალი მოროშკინა - პატიმარი გოდერძი კიკნაძე ყვირის, რომ აწამებენ და კლავენ

რუსთავის N6 საპყრობილესთან მყოფი ჟურნალისტის ლალი მოროშკინას განცხადებით, პატიმარი გოდერძი კიკნაძე ყვირის, რომ მას აწამებენ და კლავენ, - ამის შესახებ მოროშკინამ "ინტერპრესნიუსს" განუცხადა.

მისი განმარტებით, უკვე მესამე დღეა, რაც საპატიმროსთან პატიმარ კიკნაძის დედა შიმშილობს და ცუდად არის. ადგილზე იმყოფება სასწრაფო დახმარების ბრიგადა.

მოროშკინას განცხადებით, პატიმართან არ უშვებენ ადვოკატს, რადგან შაბათი დღეა. მისივე თქმით, ტერიტორიაზე შეიმჩნევა სასჯელაღსრულების დაწესებულების მანქანების ხშირი გადაადგილება.

"საპატიმროს პირველი კორპუსი არის დაცლილი. როდესაც 2 დღის წინ აქ სტუდენტების აქცია მოეწყო, კორპუსიდან სკანდირებენ პატიმრებიც. ახლა აქ არავინ არის. დაიხურა სისტემა. არ ვიცი, რას აქვს ადგილი, თუმცა ვფიქრობთ, რომ შეიძლება პატიმრები სადმე გადაჰყავთ. აქ უმძიმესი ვითარებაა. ციხის ადმინისტრაცია, ურცხვად ამბობს, რომ მათ არ იცოდნენ პატიმრის დედის შიმშილობის შესახებ. ამ ქალს რომ რამე მოუვიდეს, ყველა ჩვენგანის პასუხისმგებლობის საქმე იქნება", - განაცხადა მოროშკინამ.

იხილეთ ვიდეო : პატიმარი კიკნაძე რუსთავის #6 მკაცრი რეჟიმის დაწესებულებაში შველას ითხოვს

"ინტერპრესნიუსი"