21
ივნისიდღის ზოგადი ასტროლოგიური პროგნოზი
პატიმრების წამებასთან დაკავშირებით საერთაშორისო მედიაში პირველი ანალიტიკური მოსაზრებები გაჩნდა. საქართველოში მომხდარ მოვლენებს ცნობილი პუბლიცისტი და პოლიტიკური რომანების ავტორი, "ვაშინგტონ პოსტის" ანალიტიკოსი, დავიდ იგნატიუსი გამოეხმაურა.
მისი სტატია საქართველოში არჩევნების წინ განვითარებულ მოვლენებზე "ვაშინგტონ პოსტში", "დეილი სტარში" და "ინდისტარში" სამი სხვადასხვა სათაურით დაიბეჭდა. სტატიაში იგნატიუსი აღნიშნავს, რომ აშშ-ის ფავორიტი სააკაშვილის რეჟიმი, რომელიც დემოკრატიისთვის ბრძოლით გახდა ცნობილი, ოპოზიციურ ძალებზე ზედმეტი ზეწოლის გამო კრიტიკის ქვეშ მოექცა.
იგნატიუსი სააკაშვილის რეჟიმის წინააღმდეგ ოპოზიციის რამდენიმე ბრალდებას ასახელებს, მაგრამ აღნიშნავს, რომ "ბინძური ხრიკების" გამოყენებას არც ოპოზიცია თაკილობს.
ანალიტიკოსი ხაზს უსვამს აშშ-ის ნეიტრალურ დამოკიდებულებას არჩევნებისადმი, თუმცა, აღნიშნავს, რომ ამერიკის მთავრობა კმაყოფილია იმ როლით, რასაც საქართველო ავღანეთის სამშვიდობო მისიაში ასრულებს.
"ის, რაც საქართველოში ხდება, არის გარე მოთამაშეთა ომი, რომელთაც უნდათ საქართველო თავიანთი გავლენის ქვეშ მოაქციონ - ომი, რომელშიც ფხუკიანი და ზოგჯერ ზედმეტად მონდომებული სააკაშვილი ცდილობს, წინ აღუდგეს რუსეთის მზარდ ზეწოლას, რომელსაც დაჟინებით სურს, რეგიონში საკუთარი გავლენის აღდგენა. პოლიტიკურმა დაპირისპირებამ კიდევ უფრო მწვავე ხასიათი მიიღო მას შემდეგ, რაც გავრცელდა ვიდეო ქართულ ციხეში პატიმრების წამების შესახებ. ეს ომია, რომელშიც სააკაშვილის რეჟიმი, რომელიც "ვარდების რევოლუციამ" დემოკრატიის მოდელად აქცია, შეიძლება იქცეს იმის სიმბოლოდ, რასაც წლების წინ ასე გააფთრებით ებრძოდა - ხელისუფლებაში გამაგრებული ელიტის, რომელსაც არ სურს პოლიტიკური ცვლილებები",- წერს დავიდ იგნატიუსი.
დავიდ იგნატიუსი ცნობილი პუბლიცისტი და პოლიტიკური რომანების ავტორია (მისი წიგნის "ტყუილის ერთობლიობა" მიხედვით ჰოლივუდში ფილმიც გადაიღეს, რომელშიც მთავარი როლი ლეონარდო დი კაპრიომ შეასრულა).
