ირაკლი ღარიბაშვილი - "თამაზ თამაზაშვილის სიცოცხლე საფრთხეშია"

თამაზ თამაზაშვილის სიცოცხლე საფრთხეშია და მას თუ რამე დაემართება, მთელი პასუხისმგებლობა მიხეილ სააკაშვილს ეკისრება, - ამის შესახებ გლდანის ციხესთან ჟურნალისტებს თამაზ თამაზაშვილის სიძემ, "ქართული ოცნების" წარმომადგენელმა ირაკლი ღარიბაშვილმა განუცხადა.

მისი თქმით, ის ინფორმაცია, რომელიც დღეს შინაგან საქმეთა სამინისტრომ გაავრცელა, არის სიბინძურე და მკრეხელობა, რომელსაც რეალობასთან არანაირი კავშირი არ აქვს.

"ის კრიმინალი, რომელიც სასჯელაღსრულების დაწესებულებაში ხდება, უნდათ, რომ დააბრალონ ჩემს სიმამრს, რომელიც არის მიხეილ სააკაშვილის მძევალი. მას ჩაუდეს ავტომატი და პოლიტიკური ნიშნით დააკავეს. დღეს კი მას აბრალებენ იმ საშინელებას, რომელიც სასჯელაღსრულების დაწესებულებაში დიდი ხანია ხდება. ჩემი სიმამრის სიცოცხლეს საფრთხე ემუქრება და პირადად სააკაშვილს დაეკისრება პასუხისმგებლობა", - განაცხადა ირაკლი ღარიბაშვილმა, რომელიც გლდანის ციხესთან "ქართული ოცნების" პრესსპიკერ მაია ფანჯიკიძესთან ერთად მივიდა.

ჟურნალისტებთან კომენტარი გააკეთა მაია ფანჯიკიძემაც, რომლის თქმითაც, თამაზ თამაზაშვილის სიცოცხლის საფრთხიდან გამომდინარე პოლიტიკური შეფასებების გაკეთება დღეს ნაადრევია.

"იმას, რომ თამაზ თამაზაშვილის სიცოცხლე საფრთხეშია, მაფიქრებინებს ის ფაქტი, რომ შსს-ს მიერ გავრცელებული ვიდეომასალის შემდეგ ტელეკომპანია "მაესტროს" მეშვეობით გავრცელდა რეალური ვითარება, რაც გლდანის ციხეში ხდება და არ არის გამორიცხული, რომ თამაზ თამაზაშვილს ხვალ იძულებით აღიარებითი ჩვენება მიაცემინონ და თუ ის ამაზე უარს იტყვის, შესაძლოა მის სიცოცხლეს სერიოზული საფრთხე დაემუქროს", - განაცხადა მაია ფანჯიკიძემ.

მან ტელეკომპანიებს "იმედს", "რუსთავი-2"-ს და განსაკუთრებით საზოგადოებრივ მაუწყებელს მოუწოდა, რომ შსს-ს მიერ გავრცელებული მასალის შემდეგ გაავრცელონ ის მასალაც, რომელიც "მაესტრომ" აჩვენა და რომელიც, მისი თქმით, ასახავს გლდანის #8-ე სასჯელაღსრულების დაწესებულებაში არსებულ რეალურ ვითარებას.

ამასთან, ფანჯიკიძის თქმით, თამაზაშვილთან ადვოკატი ხვალ დილით შევა, ამ დროისთვის კი "ქართულ ოცნებას" მისი მდგომარეობის შესახებ ინფორმაცია არ გააჩნია. "ქართული ოცნების" პრესსპიკერმა სახალხო დამცველსა და არასამთავრობო ორგანიზაციებს მოუწოდა, რომ დღესვე დაინტერესდნენ თამაზაშვილის მდგომარეობით და დღესვე მოინახულონ ის სასჯელაღსრულების დაწესებულებაში.

"ინტერპრესნიუსი"