ფოთისა და ხობის ეპარქია ფოთის საკათედრო ტაძართან მომხდარი ინციდენტის მიზეზად ჟურნალისტის ქცევას ასახელებს

ფოთისა და ხობის ეპარქია ფოთის საკათედრო ტაძართან მომხდარი ინციდენტის მიზეზად ჟურნალისტის ქცევას ასახელებს. 13 სექტემბერს, გვიან ღამით მომხდარ ინციდენტთან დაკავშირებით , რომლის ამსახველი ვიდეომასალა დღეს სააგენტო TSmpress-მა გაავრცელა, ეპარქიის სამდივნო სპეციალურ განცხადებას ავრცელებს. განცხადებაში ნათქვამია, რომ ფოთისა და ხობის მიტროპოლიტი, მაღალყოვლადუსამღვდელოესი გრიგოლი თანმხლებ პირებთან ერთად ათვალიერებდა საკათედრო ტაძარსა და მის ეზოში მიმდინარე სარეაბილიტაციო სამუშაოებს, როდესაც მღვდელმთავრისგან ტაძრის ეზოში მისულმა ჟურნალისტებმა ინტერვიუს აღება ითხოვეს. მათ მიტროპოლიტის წარმომადგენელმა თავაზიანად განუმარტა, რომ უკვე გვიანი იყო და ინტერვიუ არ შედგებოდა. ასე განმეორდა ორჯერ. მას შემდეგ, რაც მღვდელმთავარმა მიმდინარე სამუშაოების დათვალიერება დაასრულა, ტაძრის გალავნის ცენტრალური გასასვლელისკენ გაემართა.

"გზად მიმავალ მღვდელმთავართან მიახლოებას ცდილობდნენ მომართული გადამღები საშუალებებით შეიარაღებული ჟურნალისტები, რომელთაც კვლავ განუმარტეს, რომ ამის გაკეთება არ არის საჭირო, თუმცა, ერთ-ერთმა მათგანმა ბოროტად ისარგებლა იქ მყოფ სასულიერო და საერო პირთა მოკრძალებული ტონით და თავშეკავებული ქცევით, კადნიერად მიიჭრა მღვდელმთავართან და ეს იმდენად მოურიდებლად და თავხედურად გააკეთა, რომ მეუფეს გადაადგილების საშუალება აღარ მიეცა. ამ დროს მეუფე წაქცევას საოცარი ძალისხმევით გადარჩა, თუმცა ჟურნალისტისთვის არაფერი უთქვამს, გარდა იმისა, რომ გაეტარებინათ. ამას მოჰყვა თვით ამ ჟურნალისტის ისტერიული ქმედება. მომხდარმა დააბნია მღვდელმთავრის თანმხლები საერო და სასულიერო პირები და ერთ-ერთმა სასულიერო პირმა სცადა ჟურნალისტის გაჩერება. მას შემდეგ კი, რაც ეს ვერ მოახერხა, გადამღები საშუალება გადაუგდო და ამაზე თავად ძალიან წუხს", - ნათქვამია განცხადებაში.

ეპარქიის სამდივნოს განმარტებით, კამერის გადაგდების შემდეგ, ჟურნალისტმა მოძებნა გადაგდებული გადამღები საშუალება, ამოიღო მეხსიერების ბარათი, დაზიანების მიზნით იქვე ქვაფენილზე დააგდო, უკვე დაზიანებული აპარატის აღების მომენტი კი მეორე ჟურნალისტმა გადაიღო.

როგორც განცხადებაშია ნათქვამი, აღნიშნული ფაქტი იმდენად აღმაშფოთებელია, რომ მისი კომენტარისგან ეპარქია თავს იკავებს და განცხადებას მხოლოდ ფართო საზოგადოების სამართლიანი და საფუძვლიანი ინტერესის დაკმაყოფილების მიზნით აქვეყნებს. "ამით კი სიცხადე შეგვაქვს იმაში, რაც განგებ საკმაოდ დამახინჯებულად და ტენდენციურად მიეწოდა საინფორმაციო სააგენტოებს", - აღნიშნულია განცხადებაში.

ამასთან, ეპარქიაში აცხადებენ, რომ ადამიანები, რომელთაც პროვოკაციული ქმედება ჩაიდინეს, თავიდანვე აქტიურად იყვნენ დაპირისპირებული ეკლესიასთან ფოთის საკათედრო ტაძრის დაბრუნების იდეის გამო და ყველანაირად ცდილობდნენ ჩირქი მოეცხოთ მღვდელმთავრისთვის, რომელიც ეპარქიის სულიერი აღორძინებისთვის იღწვის.

"ინტერპრესნიუსი"